ކުރީގެ ރައީސް މުހައްމަދު ނަޝީދުގެ ވެރިކަމުގައި މިހާރުގެ ރައީސް އަބްދުﷲ ޔާމީން އަބްދުލް ޤައްޔޫމް އާރަށުގައި ބެހެއްޓި މައްސަލައިގައި ނަޝީދުގެ މައްޗަށް ކޮށްފައިވާ ދައުވާ ކްރިމިނިލް ކޯޓުން ބާތިލް ކޮށްފިއެވެ.
ރައީސް ނަޝީދުގެ މައްޗަށް ދައުވާ އުފުލާފައިވަނީ ރައީސް އަބްދުﷲ ޔާމީން މުލަކު ދާއިރާގެ ރައްޔިތުން މަޖިލީހުގެ މެންބަރަކަށް ހުންނަވަނިކޮށް، 2010 ވަނަ އަހަރުގެ ޖުލައި 10 ވަނަ ދުވަހުގެ ރޭ އެމަނިކުފާނު ހައްޔަރުކޮށް ކ. އާރަށުގައި ބެހެއްޓި މައްސަލައިގައެވެ.
ގާނޫނީ ވަކީލް ހިސާން ހުސައިން ކުރެއްވި ޓުވީޓެއްގައި ވިދާޅުވީ ރައީސް ނަޝީދުގެ މައްޗަށް ފަހުން ޕްރޮސިކިއުޓަރ ޖެނަރަލްގެ ފަރާތުން އުފުލި ދައުވާ ކުރިމިނަލް ކޯޓުން ބާތިލްކޮށް އަނބުރާ ފޮނުވާލާފައިވާ ކަމަށެވެ. އެ މައްސަލާގައި ރައީސް ނަޝީދު ހައްޔަރުކުރަން ކޯޓު އަމުރެއް ވެސް ނެރުނެވެ. އަދި ކްރިމިނަލް ކޯޓުން ވަނީ އެ އަމުރު ވެސް ބާތިލްކޮށްފައެވެ. އެ ދައުވާކޮށް ހައްޔަރުގެ އަމުރު ނެރެފައިވަނީ ރައީސް ނަޝީދު ބޭސްފަރުވާއަށް އިނގިރޭސިވިލާތަށް ވަޑައިގެންނެވި ފަހުންނެވެ.
Criminal Crt today has sent back to PG the 2nd terrorism charge against Pres. Nasheed & annulled the arrest warrant issued against him in relation to the new charge. In line with UNWGAD & UNHRC rulings & today’s Majlis petition, we hope PN will soon be cleared of his conviction.
— Hisaan ؟ (@hisaanhussain) October 24, 2018
ނޮވެމްބަރު އެއްވަނަ ދުވަހު ރައީސް ނަޝީދު ރާއްޖެ ވަޑައިގަންނަވާއިރު އެމަނިކުފާނު މިހާރު ހުންނެވީ ކުރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު ރަހީނުކުރި ކަމުގެ ކުށް ސާބިތުވެ 13 އަހަރަށް ޖަލަށްލާން ހުކުމްކޮށްފައެވެ. އެއަށްފަހު އެމަނިކުފާނު ހުންނެވީ އިނގިރޭސިވިލާތުން ހިމާޔަތް ހޯއްދަވައިގެން އެ ޤައުމުގައެވެ.
ގުޅިފައިވާ ސިޔާސީ ޕާޓީތަކުގެ ބޭފުޅުންނާއި އެމްޑީޕީން ތަކުރާރުކޮށް ބުނަމުންދަނީ ރައީސް ނަޝީދު ރާއްޖެ ވަޑައިގަންނަވާނީ މިނިވަނެއްގެ ގޮތަށް ކަމަށާއި އެކަމަށް ކުރަން ޖެހޭ ހުރިހާ ކަމެއް އެ ފަރާތުން ކުރާނެ ކަމަށެވެ.
