ޔުއެފާ ނެޝަނަލް ލީގުގައި ފުރަތަމަ ޑިވިޝަނުގައި އިޓަލީ އަތުން ބަލިވެ ޕޮލެންޑް ދެ ވަނަ ޑިވިޝަނަށް ރެލިގޭޓްވެއްޖެއެވެ.

މި މުބާރާތުގެ ފުރަތަމަ ޑިވިޝަންގެ ގޮތުގައި ބަލާ ލީގު އޭގެ ގްރޫޕް ތިނެއްގެ އެއް ވަނައިގައި ހަ ޕޮއިންޓާ އެކު އޮތީ ޕޯޗުގަލެވެ. އިޓަލީ ހަތަރު ޕޮއިންޓާ އެކު ދެ ވަނައިގައި އޮތް އިރު ޕޮލެންޑް ރެލިގޭޓްވީ އެއް ޕޮއިންޓާ އެކު ފުލަށް ގޮސްގެންނެވެ.

ނުރައްކާތެރި ފައްތަރެއްގައި އޮތް އިޓަލީން ޕޮލަންޑުގެ މައްޗަށް ކުރި ހޯދީ ފަހު ވަގުތު ކްރިސްޓިއާނޯ ބިރާގީ ވައްދާލި ގޯލާ އެކުއެވެ.

ކޮންމެ ގްރޫޕެއްގެ އެއް ވަނަ އާއި ދެ ވަނަ ޓީމު ފުރަތަމަ ޑިވިޝަނުގައި ދެމި އޮންނައިރު މީގެ ތެރެއިން އެއް ވަނަ ޓީމަށް އަންނަ އަހަރުގެ ޖޫން މަހު އޮންނަ ފައިނަލް ބުރަކުން ފުރުސަތު ލިބޭނެއެވެ.

އާދިއްތަ ދުވަހުގެ ރޭ ޕޮލެންޑުގައި ކުޅުނު މެޗުން އިޓަލީ މޮޅުވިއިރު މިއީ އާ ކޯޗު ރޮބާޓޯ މަންޗިނީގެ އިރުޝާދުގެ ދަށުން އެ ޓީމުން ހޯދި ފުރަތަމަ މޮޅެވެ.

މި މެޗުގައި އިޓަލީން ވަނީ ބަލާ ހިތްވާ ފަދަ އެޓޭކިން ފުޓްބޯޅައެއް ކުޅެފައެވެ. ފުރަތަމަ ހާފުގައި ވެސް އެ ޓީމަށް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ.

އެ ޓީމުން ނަތީޖާ ނެރުނު ގޯލް އިތުރު ވަގުތުގެ ދެ ވަނަ މިނެޓުގައި ބިރާގީ ޖެހީ ކޯނަރަކުން ތަނަވަސްވި ފުރުސަތެއްގެ ބޭނުންހިފައިގެންނެވެ.

އިޓަލީގެ ފިއޮރެންޓީނާއަށް ކުޅޭ ބިރާގީ ވަނީ ލަނޑުޖެހުމަށް ފަހު އަތުގެ އިޝާރާތުން "13" ނަމްބަރު ދައްކާލާފައެވެ.

އޭނާގެ އިޝާރާތުގެ މާނައަކީ މިދިޔަ މާޗު މަހު މަރުވި ފިއޮރެންޓީނާ އާއި އިޓަލީގެ ޑިފެންޑަރު ޑޭވިޑް އެސްޓޯރީ އަށް ޚާއްސަކުރުމެވެ.

މި އަހަރުގެ ވޯލްޑް ކަޕަށް އިޓަލީ ކޮލިފައިނުވުމުން، އަލުން ޓީމެއް ބިނާކުރަން މަންޗިނީއާ ހަވާލުކޮށްފައިވާއިރު އޭނާ އަންނަނީ އާ ވަރަށް ގިނަ ކުޅުންތެރިންނަށް ފުރުސަތު ދެމުންނެވެ.

ވޯލްޑް ކަޕާއި ޔޫރޯ ނޯންނަ އަހަރުތަކުގައި ބާއްވާ މި މުބާރާތް ދެން އޮންނާނީ 2020 ގައެވެ. ހަތަރު ޑިވިޝަނެއްގެ ގޮތުގައި މި އަހަރު ކުރިއަށްދާއިރު 2020 ވަނަ އަހަރުގެ މުބާރާތުގެ ޑިވިޝަންތަކަށް ޓީމުތައް ރޭންކްކުރެވޭނީ މި އަހަރުގެ މުބާރާތުންނެވެ.