ގައުމީ ފުޓުބޯޅަ ޓީމުގެ ފެންވަރު އިތުރަށް ރަނގަޅު ކުރުމަށްޓަކައި އަންނަ އަހަރު އެންމެ ބޮޑަށް ބަލާނީ ވަރުގަދަ ޓީމުތަކާ ދެކޮޅަށް ކުޅުމަށް ކަމަށް އެފްއޭއެމުން ބުނެފިއެވެ.
އެފްއޭއެމްގެ ރައީސް ބައްސާމް ވިދާޅުވީ ދެން ކުރިއަށް ދިއުމުގައި ވިސްނާނީ ކުޅުންތެރިންގެ ފެންވަރު އިތުރަށް ރަނގަޅު ކުރުމަށް ބޭނުންވާނެ ކަންތައްތައް ކަމަށެވެ.
އެގޮތުން މި ސަރަހައްދުގެ ގައުމުތަކަށް ވުރެ ބޮޑަށް ތަންކޮޅެއް ވަރުގަދަ ޓީމުތަކާ ދެކޮޅަށް މެޗުތަކެއް ކުޅުމަށް ވިސްނަމުންދާ ކަމަށް ބައްސާމް ވިދާޅުވިއެވެ.
ބައިނަލްއަގްވާމީ ޓީމުތަކުން މެޗުތައް ރޭވުމުގައި އެންމެ ބޮޑަށް ބޭނުން ހިފަނީ މުޅި އަހަރުގެ ކަލަންޑަރުން ފީފާ އިން ނަގާފައި އޮންނަ ދުވަސްތަކެވެ.
އެފްއޭއެމްގެ ވިސްނުން ހުރީ އަންނަ އަހަރުގެ ފީފާއަށް ޚާއްސަ ހަތަރު ސެޓުގައި ހިމެނޭ ޖުމްލަ 36 ދުވަސް ގައުމީ ޓީމަށް ބޭނުންކުރާށެވެ.
މި އަހަރުގެ އޭޝިއަން ގޭމްސްގައި ރާއްޖޭގެ 23 އަހަރުން ދަށުގެ ފުޓްބޯޅަ ޓީމު ބައިވެރިނުވެއެވެ. އެކަމާ ގިނަ ބަޔެއްގެ ފާޑުކިޔުން އަމާޒުވިއެވެ.
އެފްއޭއެމުން އަންނަ އަހަރު އެންމެ ގިނަ އިން ބައިވެރި ވާނީ 23 އަހަރުން ދަށުގެ ޓީމުގެ މުބާރާތްތަކުގައެވެ. ގައުމީ ޓީމަށް ގިނަ މެޗުތަކެއް ކުޅެން ނުލިބޭތީ އެކަމަގެ ޝަކުވާ އެންމެ ފަހުން ގައުމީ ޓީމާ ހަވާލުވެ ހުރި ކޯޗު ވަނީ ކޮށްފައެވެ.
މި ފަހަރުގެ ސާފް ސުޒުކީ ކަޕްގެ ކާމިޔާބަށް ފަހު ގައުމީ ޓީމު ދެން އެންމެ އަވަހަށް ކުޅޭ މެޗަކަށް ވެގެންދާނީ އަންނަ މަހު 3 ވަނަ ދުވަހު މެލޭޝިއާއާ ދެކޮޅަށް އެ ގައުމުގައި ކުޅޭ މެޗެވެ.
އަންނަ އަހަރު ސީނިއާ ޓީމަށް އޮތީ މޮރިޝަސްގައި ޖޫން މަހު އޮންނަ އިންޑިއަން އޯޝަން އައިލެންޑް ގޭމްސްއެވެ.
