ނިއުރޭޑިއަންޓަށް ކުޅެމުން އަންނަ ގައުމީ ޓީމުގެ ކުރީގެ އެއް ނަންބަރު ގޯލްކީޕަރ އިމްރާން މުޙައްމަދަށް އެކުލަބުން މުސާރަނުދީ އޮތް މައްސަލައެއް އެފްއޭއެމް އަށް ހުށަހަޅައިފިއެވެ.
އިންމަ ބުނެފައި ވަނީ ނިއުރޭޑިއަންޓުން ދޭންޖެހޭ ޕޭމަންޓް ނުދޭ މައްސަލަ ތަކުރާރުވާން ފެށުމުން، ކުލަބަށް އެކަން ލިޔުމުން އެންގި ކަމަށެވެ. ކޮންމެ މަހަކު މުސާރަ ދިނުމުގެ ބަދަލުގައި އިންމައަށް ނިއުރޭޑިއަންޓުން ދެމުން އަންނަނީ ސީޒަންގެ ވަކި މުއްދަތުތަތަކަކުން ދޭ ޕޭމަންޓެކެވެ.
އިންމަ ބުނީ އެމައްސަލަ ތަކުރާރުވާން ފެށުމުން ޕްރެކްޓިހަށް ނިކުތުން މެދުކަނޑާލަފައިވާ ކަމަށެވެ. އަދި ޕްރެކްޓިސް މެދު ކަނޑާލި ސަބަބު ވެސް ކުލަބަށް އެންގާފައިވާ ކަމަށް ވެސް އިންމަ ބުންޏެވެ.
ޕްރެކްޓިސް މެދު ކަނޑާލުމުގެ ކުރިން ކުލަބުގެ މޭނޭޖުމެންޓަށް ހުރިހާ ކަމެއް ބަރާބަރަށް ލިޔުމުން އަންގަފައިވާނެ ކަމަށް އިންމަ ބުންޏެވެ. އަދި އެފްއޭއެމްއަށް ވެސް މައްސަލަ ހުށެހެޅީ އެކަން ކުލަބަށް އެންގުމަށް ފަހުގައި ކަމަށް ވެސް އިންމަވަނީ ބުނެފައެވެ.
އިންމަ ބުނީ ނިއު ރޭޑިއަންޓަކީ އޭނާ ވަރަށް ކުޅޭ ހިތުން ކުޅޭ ވަރަށް ލޯބިވާ ކުލަބެއް ކަމަށާއި އެފްއޭއެމަށް މައްސަލަ ހުށަހެޅީ ޙައްލެއް ނުލިބުމުން ކަމަށެވެ.
ކުލަބުން ލިބެންޖެހޭ ޕޭމަންޓް ނުލިބި ދިގުލައިގެން ދިޔުމުން ވެސް މަޑުކުރި ކަމަށާއި އެފްއޭއެމްއާ ހަމައަށް ދާންޖެހުނީ އެނޫން އެހެން ގޮތަކުން އެއްވެސް ވަރެއްގެ ކުރިއެރުމެއް ނުލިބިގެން ކަމަށް އިންމަ ބުންޏެވެ.
ނިއު ރޭޑިއަންޓްގެ ކުރީގެ ކެޕްޓަން އަލީ އަޝްފާގް 'ދަގަނޑޭ' އަށް މުސާރަ ނުދޭ މައްސަލަ ފެންމަތިވުމުން، މިއަހަރު ޖޫން މަހު އޭނާ ވެސް ވަނީ އެފްއޭއެމްގެ ޕްލޭއާސް ކޮމިޓީއަށް މައްސަލަ ހުށަހަޅާފައެވެ.
