ދެހާސް ވިހި ވަނަ އަހަރުން ފެށިގެން ދިވެހި ކުލަބުތަކަށް ބިދޭސީ ގޯލްކީޕަރުން ނުގެނެވޭ ގޮތަށް އެފްއޭއެމުން ނިންމައިފިއެވެ.
އެފްއޭއެމްގެ މި ނިންމުމަކީ ދިވެހި ގޯލްކީޕަރުންނަށް ފުރުސަތުތައް އިތުރު ކުރުމުގެ ގޮތުން އެޅި ފިޔަވަޅެކެވެ. 2020 ވަނަ އަހަރުން ފެށިގެން އެގޮތަށް އަމަލުކުރަން ނިންމި ނަމަވެސް ކުރިން އޮތީ އަންނަ އަހަރު ފެށިގެން ބިދޭސީ ކުޅުންތެރިން ނުގެވޭ ގޮތަށެވެ.
ދެހާސް ވިހިވަނަ އަހަރާ ހަމައަށް މުއްދަތު އިތުރުކުރީ އެއް އަހަރު ކުރިއަށް ދުރާލާ ޓީމުތަކަށް އެކަން އެންގުމުން އެކަން ކުރަން ފަސޭހަވާނެ ކަމަށް އެފްއޭއެމަށް ގަބޫލުކުރެވިގެންނެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ދިވެހި ކީޕަރުން ކުރިއެރުވުމުގެ މަސައްކަތް އަންނަ އަހަރު ފަށާނެ ކަމަށެވެ.
ދިވެހި ކީޕަރުންނަށް ފުރުސަތު ދިނުމަށް ދިވެހި ކީޕަރުން އުފެއްދުމަށްޓަކައި ގިނަ މަސައްކަތްތަކެއް މި އަންނަ އަހަރު ތެރޭގައި ފެށިގެންދާނެ ކަމަށެވެ.
އެގޮތުން ކީޕަރުންގެ އެކަޑަމީއެއް ފެށުމަށްޓަކައި ކުރަންޖެހޭ ހުރިހާ މަސައްކަތެއް ކުރިއަށްދާ ކަމަށާއި ބޭނުމަކީ ދިވެހި ކީޕަރުން ކުރިއެރުވުން ކަމަށް ބައްސާމް ވިދާޅުވިއެވެ.
ގޯލްކީޕަރު އެކެޑަމީގެ މަސައްކަތްތަކުގައި އެންމެ އިސްކޮށް އުޅޭނީ ގައުމީ ފުޓްބޯޅަ ޓީމުގެ ގޯލްކީޕަރު ޓްރެއިނަރު އަސްލަމް އަބްދުއްރަހީމްއެވެ.
އެފްއޭއެމުން ހަމަޖައްސާފައި ވަނީ ޓީމުތަކުގައި އަންނަ އަހަރުން ފެށިގެން ކޯސް ހަދައިގެން ތިބި ގޯލްކީޕަރު ޓްރެއިނަރުން ބެހެއްޓުމަށެވެ.
އަންނަ އަހަރަށް ގެނެވުނު ބަދަލުތަކުގެ ތެރޭގައި ކުލަބުތަކުގެ ގޯލްކީޕަރު ޓްރެއިނިން އަށް ތިބެން ޖެހޭނީ ކޯސް ހަދައިގެން ލައިސަންސް ލިބިފައިވާ ޓްރެއިނަރުންނެވެ.
މުޅި ރާއްޖެ އަށް ބަލާއިރު ހުނަރުވެރި ގިނަ ކީޕަރުން ތިބޭނެ ކަމަށާއި އެ ކީޕަރުން ހޯދައި ކުރިއަރުވަން ގިނަ މަސައްކަތްތަކެއް ކުރަން ޖެހޭ ކަމަށް ބައްސާމް ފާހަގަކުރެއްވިއެވެ.
ފާއިތުވި އަހަރުތަކުގައި ރާއްޖޭގެ ކްލަބްތަކުން ދިވެހި ކީޕަރުން ފެންނަ އަދަދު އަންނަނީ މަދުވަމުންނެވެ. މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ކުޅޭ 10 ޓީމުގެ ތެރެއިން ހަތަރު ޓީމުގައި ތިބީ ބިދޭސީ ކީޕަރުންނެވެ.
