އެމެރިކާގެ ރައީސް ކަމާ ހަވާލުވެވަޑައިގެންފައިވާ ޑޮނަލްޑް ޓްރަމްޕް އާއި ދެކޮޅަށް އަންހެނުން އިސްނަގައިގެން އަންހެނުންގެ ހައްގުތަކަށް ގޮވާލާ ބާއްވާ އެއްވުންތަކުގައި މުޅި އެމެރިކާއިން އެކަނިވެސް ދެމިލިއަނަށްވުރެ ގިނަމީހުން އެއްވުންތަކުގައި ބައިވެރިވެއްޖެ ކަމަށް ރިޕޯޓުތައް ބުނެއެވެ.
އެންމެ ގިނަ އަދަަދެއްގެ މީހުން މިހާތަނަށް އެއްވުންތަކުގައި ބައިވެރިވެފައިވަނީ ވޮޝިންޓަން ގައެވެ. އެގޮތުން ވޮޝިންޓަން ގައި ބޭއްވި އެއްވުންތަކުގައި އެއް މިލިއަނަށް ވުރެ ގިނަމީހުން ބައިވެރިވެފައިވާ ކަމަށް އެއްވުން އިންތިޒާމު ކުރި ފަރާތްތަކުން ބުނާއިރު ވޮޝިންޓަނަށް ޖަމާވި މީހުންގެ އަންދާޒާ އަދަދެއް އެމެރިކާގެ ރަސްމީ ފަރާތްތަކުން ހާމަކޮށްފައި ނުވެއެވެ. ވޮޝިންޓަންގައި އެންމެ ގިނަމީހުން ޖަމާވެފައިވަނީ އާ ރައީސް ޑޮނަލްޑް ޓްރަމްޕް ހުވާކުރެއްވުމުގެ ރަސްމިއްޔާތު ބޭއްވި ނޭޝަނަލް މޯލް މައިދާނަށެވެ.
އެމެރިކާގެ އަންހެނުން އިސްނަގައިގެން ބާއްވާ އެއްވުންތަކުގައި އެ އެއްވުންތަކަށް ތާއީދުކޮށް ދުނިޔޭގެ އެކި ކަންކޮޅުތަކުގައި 600 އަށްވުރެ ގިނަ އެއްވުން މިހާތަނަށް ބާއްވާފައިވެއެވެ. މި އެއްވުންތަކުގެ ބައިވެރިން ގޮވާލާފައިވަނީ އަންހެނުންގެ ހައްގުތައް ދިނުމަށާއި އަދިވެސް އެހެނިހެން ކަންކަމުގައި ޓްރަމްޕް ގެންގުޅުއްވާނެ ކަމަށް ވިދާޅުވެފައިވާ ސިޔާސަތުތައް ބަދަލު ކުރުމަށެވެ.
އެމެރިކާގެ އެކި ސިޓީތަކުގައި ބާއްވަމުންދާ މި އެއްވުންތަކުގައި އެމެރިކާގެ ހޮލީވުޑްގެ މަޝްހޫރު އެތައް ތަރިންނާއި، ފިލްމީ ދާއިރާގައި ހަރަކާތްތެރިވާ ފަރާތްތަކާއި އަދިވެސް އެކި ފަންނުތަކުގެ އެކި މަޝްހޫރު ފަރާތްތައް ވަނީ ބައިވެރިވެފައެވެ.
