ނަވާރަ އަހަރަށް ފަހު ތާލިބާނާއި އަފްގާނިސްތާނުގެ ސިފައިންނާ ދެމެދު ބަޑީގެ ހަމަލާ ނުދޭނެ ފުރަތަމަ ދުވަސް އިއުލާން ކޮށްފިއެވެ. މިދުވަސް ވެގެން ދާނީ އެމެރިކާއިން އަފްގާނިސްތާނަށް 2001 ވަނަ އަހަރުގައި ވެރިވެގެން ފަހުން ހަމަލާ ނުދޭނެ ފުރަތަމަ ދުވަހަށެވެ.
ތާލިބާނުން ހޮނިހިރު ދުވަހު ބުނީ ރޯދަ މަސް ނިންމާލުމަށް ފަހު އަންނަ ފިތުރު އީދުގެ 3 ދުވަސް ވަންދެން ބަޑިން ހަމަލާ ނުދޭނެ ކަމަށެވެ. އެހެން ނަމަވެސް އެ ގައުމަށް ވެރިވެ ގަންނަން އުޅޭ "ބޭރު ގައުމުތަކުގެ" ސިފައިންނާ ދެކޮޅަށް ކުރާ ހަނގުރާމަ ކުރިއަށް ގެންދާނެ ކަމަށެވެ.
ތާލިބާނުން ބުނީ އެމީހުންނަށް ފިތުރު އީދުގައި ހަމަލާ ދީފިނަމަ ދިފާއުވާން ރައްދުގައި ވަރުގަދަ ހަމަލާތަކެއް ދޭނެ ކަމަށެވެ. މިހެން ތާލިބާނުން ބުނެ މީޑިއާތަކަށް ސިޓީ ފޮނުވިއިރު އޭގެ ދެ ދުވަސް ކުރިން އެ ގައުމުގެ ސަރުކާރުން ވަނީ ހަފްތާއެއް ވަންދެން ހަތިޔާރު އެޅި ޖަމާތްތަކާ ދެކޮޅަށް ކުރާ ހަނގުރާމަ މަޑުޖައްސާލުމަށް ނިންމާފައެވެ. ހަފްތާ ގުނަން ފެށޭނީ ރަމަޟާން މަހުގެ 27އިން ފެށިގެނެވެ. ސަރުކާރުގެ ނިންމުމުގެ ސަބަބުން ގިނަ ބަޔަކު ވަނީ ހައިރާންވެފައެވެ.
ދެ ފަރާތުން (ސަރުކާރާއި ތާލިބާންއިން) ހަމަލާ ބަދަލު ނުކުރަން އެއްބަސް ވީއިރު، ހަމަލަ ދިނުމާއި އަމިއްލަ ގައިގައި ބޮން ހަރުކޮށްގެން މީހުން މެރުމާ ދެކޮޅަށް އަފްޣާނިސްތާނުގެ އެންމެ އިސް ދީނީ އިލްމުވެރިން ފަތުވާވަނީ ދީފައެވެ. އަދި ވަނީ ދެ ފަރާތުގެ ހަމަލާ ބަދަލު ކުރުން ނިމުމަކަށް ގެންނަން ގޮވާލާފައެވެ.
އަފްޣާނިސްތާނުގެ ރައީސް އަޝްރަފް ގާނި ވެސް ވަނީ ދީނީ އިލްމުވެރިންގެ ނިންމުމަށް ތާއީދު ކޮށްފައެވެ. ރައީސް ގާނީ ވަނީ މި އަހަރުގެ ފެބްރުއަރީ މަހު ވެސް ހަމަލާ ބަދަލު ހުއްޓާލުމަށް ގޮވާލާފައެވެ. އަދި ވަނީ ތާލިބާން ސިޔާސީ ޕާޓީއެއްގެ ގޮތުގައި ރަޖިސްޓްރީ ކުރުމާ ބެހޭ ގޮތުން ވެސް ވާހަކަ ދައްކަވާ ފައެވެ.
ތާލިބާނުން މިކަމަށް ރައްދެއް ދީފައެއް ނުވެއެވެ. ނުވީތާކަށް އެ ޖަމާއަތުން ދިޔައީ ކުރިން ދިން ގޮތަށް ހަމަލާތައް ދެމުންންނެވެ. ފާހަގަ ކޮށްލެވޭ ގޮތުގައި މިއީ ސަރުކާރުން މިހާތަނަށް ތާލިބާނުންނަށް ހުށަހެޅި، އެންމެ ރަގަނޅު ހުށަހެޅުމެވެ.
އަފްގާނިސްތާނުގެއާއި ތާލިބާނުންގެ އިސް އޮފިޝަލުންތަކެއް ދެފަރާތުންދޭ ހަމަލާ ބަދަލު ކުރުން ހުއްޓުވުމަށް ސިއްރުން މަޝްވަރާ ކުރުމުގެ ހަރަކާތްތަކެއް ހިންގަމުންދާ ކަމަށް މިދިޔަ މަހު ޕެންޓަގޮން އިން ވަނީ ބުނެފައެވެ. އެހެން ނަމަވެސް އިތުރު އެއްވެސް މައުލޫމާތެއް މިކަމާ ބެހޭ ގޮތުން ޕެންޓަގޮން އިން ދީފައެއް ނުވެއެވެ.
ހަމަލާ ބަދަލު ކުރުން ހުއްޓާލުމަށް އިއުލާން ކުރުމާއި ގުޅިގެން އާންމުން ދަނީ އުފާ ފާޅު ކުރަމުންނެވެ.
