މިއަހަރުގެ އާއްމު އިންތިޚާބުގެ ކުރިން ޕާކިސްތާނުގެ ގައުމީ އެއަރލައިން ވިއްކާލަން ނިންމާފައިވާ ކަމަށް ޕާކިސްތާނުގެ ޕްރައިވެޓައިޒޭޝަން މިނިސްޓަރ ދަނިޔާލް އަޒީޒް ވިދާޅުވެއްޖެއެވެ.

ޕާކިސްތާން އިންޓަރނޭޝަނަލް އެއަރލައިން (ޕީއައިއޭ) އަށް ވަނީ ފައިސާގެ ތާށިކަން ކުރިމަތި ވުމުގެ އިތުރުން، އިއްތިހާދު އާއި އެމިރޭޓްސް ފަދަ އެއަރލައިން ތަކުގެ ސަބަބުން މާރކެޓްގައި ވާދަ ކުރުމުގައި ގޮންޖެހުން ތަކެއް ކުރިމަތި ވެފައެވެ. އޭގެ އިތުރުން މެނޭޖްމަންޓް މައްސަލަ ތަކާއި 2016 ވަނަ އަހަރު އެ އެއަރލައިންގެ ބޯޓެއް ވެއްޓުމުގެ ސަބަބުން 47 މީހުން މަރުވި ހާދިސާ އާ ގުޅިގެން ބޮޑެތި ގެއްލުންތަކެއް އެއަރލައިނަށް ވަނީ ކުރިމަތި ވެފައެވެ.

ގައުމީ އެއަރލައިންގެ އިތުރުން ސަރުކާރުގެ އެތައް ކުންފުންޏަކަށް ފައިސާގެ ތާށިކަން ކުރިމަތިވެފައި ވުމުގެ ސަބަބުން ސަރުކާރުގެ މިފަދަ ކުންފުނިތައް ޕްރައިވެޓައިޒް ކުރުމަށް ސަރުކާރު ހިންގާ ޕާޓީ ކަމުގައިވާ ޕާކިސްތާން މުސްލިމް ލީގް—ނަވާޒް (ޕީއެމްއެލް-އެން) އިން ވަނީ ވައުދު ވެފައެވެ. މި ގޮތުން 68 ކުންފުންޏެއް ޕްރައިވެޓައިޒް ކުރުމަށް ލިސްޓް ކުރެވިފައިވާ ކަމަށް ރިޕޯޓުތަކުގައި ވެއެވެ. ދަރަނީގައި ހިނގަމުންދާ ކުންފުނިތައް ޕްރައިވެޓައިޒް ކުރުމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ވެސް ވަނީ ޕާކިސްތާން ސަރުކާރަށް ލަފާ ދީފައެވެ.

ޕާކިސްތާނުގެ ގައުމީ އެއަރލައިން ޕްރައިވެޓައިޒް ކުރުމަށް މީގެ ކުރިންވެސް ސަރުކާރުން މަސައްކަތްތަކެއް ކުރި ނަމަވެސް އެފަހަރު އެކަން ކާމިޔާބު ނުވީ އެއަރލައިންގެ މުވައްޒަފުން ހަޅުތާލު ކުރުމުގެ ސަބަބުންނެވެ. އޭގެ ފަހުން ގައުމީ އެއަރލައިން ޕްރައިވެޓައިޒް ކުރުން ހުއްޓުވުމަށް ޕާކިސްތާނުގައި ގާނޫނެއްވެސް ވަނީ ފާސް ކޮށްފައެވެ.

ކަން މިހެން އޮތް ނަމަވެސް އަޒީޒް ރޮއިޓާރސް އަށް ދެއްވި އިންޓަވިއު އެއްގައި ވިދާޅުވީ، ޕީއައިއޭ ވިއްކާލުމަށް އައު ޕްލޭން ތަކެއް އެކުލަވާލާފައިވާ ކަމަށާއި، ޕްރައިވެޓައިޒޭޝަން އާ ބެހޭ ކެބިނެޓް ކޮމިޓީ އަށް ޕްރޮޕޯސަލް ހުށަހެޅުމަށް ތައްޔާރު ވެފައިވާ ކަމަށެވެ. މި ކޮމިޓީ އަކީ ޕާކިސްތާނުގެ ބޮޑުވަޒީރު ޝާހިދު ޚައްގާން އައްބާސީ ރިޔާސަތު ބަލަހައްޓަވާ ކޮމިޓީއެކެވެ.

އަޒީޒް ވިދާޅުވި ގޮތުގައި އެއަރލައިން ވިއްކާލުމަށް ކެބިނެޓުން ފާސް ކުރި ނަމަވެސް، މިކަން މުޅިން ނިންމާލެވޭނީ، 2016 ވަނަ އަހަރު ޕީއައިއޭ، ލިމިޓެޑް ކޮމްޕެނީ އަކަށް ބަދަލުކޮށް ފާސް ކޮށްފައިވާ ގާނޫނު ބަދަލު ކޮށްގެން ކަމަށެވެ.

އެއަރލައިން ވިއްކާލުމުގެ ފަހަތުގައިވާ އެންމެ ބޮޑު ސަބަބަކީ އިތުރުވަމުންދާ ދަރަނި ކަމަށް ރިޕޯޓްތަކުގައި ވެއެވެ. މި ގޮތުން 2016 ވަނަ އަހަރުގެ ނިޔަލަށް ދަރަނީގެ ގޮތުގައި 1.8 ބިލިއަން ޑޮލަރު ވަނީ ރެކޯޑް ކުރެވިފައެވެ.

އެއަލައިން ވިއްކާލާނީ ކޮން އިރަކުންތޯ ރޮއިޓާސް އިން ސުވާލު ކުރުމުން އަޒީޒް ވިދާޅުވީ "މާދަމާ ހެނދުނުވެސް ފައިސާ ހުރިއްޔާ އައިސް ގަނެގެން ދާންވީ" ކަމަށެވެ.

އެއަރލައިން ވިއްކާލަން ކަނޑައަޅާފައިވާ އަގެއް އަދި ޕާކިސްތާނު ސަރުކާރުން ހާމަ އެއް ނުކުރެއެވެ.

ޕާކިސްތާނުގެ އެކްސްޕްރެސް ޓްރިބިއުން އިން ހާމަ ކޮށްފައިވާ ގޮތުގައި އެމިރޭޓްސް އާއި އިއްތިހާދުން ވެސް ވަނީ އެއަރލައިން ގަތުމަށް ޝައުގުވެރިވާ ކަން ކުރިން ފާޅު ކޮށްފައެވެ.

ގައުމީ އެއަރލައިން އަވަހަށް ވިއްކާލުމަށް ސަރުކާރުން ބޭނުންވި ނަމަވެސް މި އަހަރުގެ ޖުލައި ނުވަތަ އޮގަސްޓުގައި އޮންނަ ޕާކިސްތާނުގެ އާއްމު އިންތިޚާބާ ދެމެދު އޮތް މުއްދަތު ކުރު ކަމާއެކު އެއަރލައިން އޭގެ ކުރިން ވިއްކާލުމުގެ ކަންކަން ނިންމިދާނެ ކަމާ މެދު ބައެއް ފަރާތްތަކުން ވަނީ ސުވާލު އުފައްދާފައެވެ.