މަނިޓަރީ ގަވާއިދުގެ ދަށުން ބޭރު ފައިސާ ގަނެ ވިއްކުމުގެ ހުއްދަ ނަގާފައިވާ ފަރާތްތަކުން އަންނަ އަހަރުގެ ފީ ދެއްކުމަަށް އެމްއެމްއޭ އިން އަންގައިފިއެވެ.

ދައުލަތުގެ މާލީ އިދާރާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނީ މަނިޓަރީ ގަވާއިދުގެ ދަށުން ބޭރު ފައިސާ ގަނެ ވިއްކުމުގެ ހުއްދަ ނަގާފައިވާ ފަރާތްތަކުން އަންނަ އަހަރުގެ ލައިސެންސް ފީ ޖެނުއަރީ 31 ކުރިން ދައްކާ ނިންމަންޖެހޭނެ ކަމަށެވެ.

ލައިސެންސް ފީގެ ގޮތުގައި ދައްކަން ޖެހެނީ 1200ރ. އެވެ. މި ފީއަކީ އަހަރު އެއް ފަހަރު ދައްކަންޖެހޭ ފީއެކެވެ.

މަނިޓަރީ ގަވާއިދުގެ ދަށުން ބޭރު ފައިސާ ގަނެ ވިއްކުމުގެ ލައިސަންސް ނެތި ބޭރު ފައިސާ ގަނެ ވިއްކުމާއި ބޭރު ފައިސާ ގަނެ ވިއްކާ ކަން ހާމަކުރުމަކީ މަނާ ކަމެކެވެ.

އެގޮތުން ދިވެހިރާއްޖޭގައި ކުރާ ހުރިހާ ވިޔަފާރިއެއްގެ ހުރިހާ އެއްޗެއްގެ އަގާއި، މަސައްކަތުގެ އަގާއި، ހިދުމަތުގެ އަގާއި، ފީ އާއި ކުލި ފަދަ ތަކެތީގެ އަގު އަދާކުރުމަށް ރާއްޖޭގެ ރުފިޔާ ފިޔަވައި، އެހެން ފައިސާއެއް ބޭނުން ކުރުމަކީ މަނާކަމެއް ކަމަށް ވެސް މި ގަވާއިދުގައި ބުނެއެވެ. އަގު އަދާކުރުމަށް ފައިސާގެ އިތުރަށް ބޭންކް ޓްރާންސްފަރ އާއި ޗެކް ވެސް ހިމެނެނީ ފައިސާގެ ގޮތުގައި ކަމުގައިވާ އިރު ބޭރު ފައިސާ ލިބޭ ފަރާތްތަކުންނާއި ބިދޭސީންގެ އަތުން ސަރުކާރަށް ލިބެންޖެހޭ ޓެކްސް، ކުލި، ފީ ފަދަ ތަކެއްޗާއި ހިދުމަތުގެ އަގު، އަދި އެކަން ކަމާ ގުޅޭ ޖޫރިމަނާ ސަރުކާރުން އަންގައިފި ހިދެއްގައި ދައްކަންޖެހޭނީ ބޭރު ފައިސާ އިން ކަމަށް ވެސް މި ގަވާއިދުގައި ބުނެއެވެ.

މީގެ އިތުރުން އެމެރިކާ ޑޮލަރާއި ގަންނަ އަގާއި ވިއްކާ އަގު ކަމަށް އެމްއެމްއޭ އިން ކަނޑާއަޅާ އަގު ފިޔަވައި އެހެން އަގެއްގައި އެއްވެސް ފަރާތަކަށް ޑޮލަރު ގަނެ ނުވަތަ ވިއްކައި ހެދުން މަނާ ކަމަށް ގަވާއިދުގައި ބުނެއެވެ.

މި ގަވާއިދާ ހިލާފަށް އަމަލު ކުރާ ފަރާތްތަކުން 2،000ރ. އާއި 10،000ރ. ދެމެދުގެ އަދަދަކުން ޖޫރިމަނާކުރެވޭނެ ކަމަށް އެމްއެމްއޭ އިން ބުނެއެވެ.

އެމްއެމްއޭ އިން އެކުލަވާލާފައިވާ މޮނިޓަރީ ގަވައިދަކީ 1 މަރޗު 1987 ވަނަ އަހަރުން ފެށިގެން އަމަލުކުރަމުންދާ ގަވައިދެކެވެ.

1200