ގަލްފް ކޯޕަރޭޝަން ކައުންސިލް (ޖީސީސީ) އަކީ އެރޭބިއަން ޕެނިންސިއުލާގައި ހިމެނޭ ސިޔާސީ އަދި އިގްތިސާދީ އިއްތިހާދެކެވެ. މި އިއްތިހާދުގައި ހިމެނެނީ ބަހްރެއިން، ކުވެއިތު، އޮމާން، ޤަތަރު، ސައުދީ އަރަބިއްޔާ އަދި އެކުވެރި އަރަބި އިމާރާތް(ޔޫއޭއީ)އެވެ.
މެމްބަރު ގައުމުތަކުގެ މެދުގައި ސަލާމަތީ ކަންކަމާއި، އިގްތިސާދީ، އަދި އިޖުތިމާއީ ކަންކަން ކުރިއެރުވުމަށް މަސައްކަތްކުރާ މި ޖަމާއަތް އުފައްދާފައިވަނީ 1981 ވަނަ އަހަރުއެވެ.
ސަރަހައްދީ ކަންކަމުގައި އެއްބާރުލުންދީ މަޝްވަރާކުރުމަށް މި ޖަމާއަތުގެ ވެރިންގެ ސަމިޓެއް ކޮންމެ އަހަރަކުވެސް ބާއްވައެވެ.
ޖިއޮގްރަފީގެ ގޮތުން މި ގައުމުތައް އޮންނަ ސަރަހައްދުގެ ގޮތުންނާއި، އެއްގޮތް ސިޔާސީ ނިޒާމްގެ ސަބަބުން އަދި އެއްގޮތް އިޖުތިމާއީ ސަގާފަތްތަކެއްގެ ސަބަބުން މި ގައުމުތަކުގެ މެދުގައި އެއްބަސްވެވޭ އެއްކަމެއް އޮވެއެވެ. އެއީ އިރާން އިރާގް ހަނގުރާމައަށްފަހު އެފަދަ ބިރުވެރިކަމަކުން ސަލާމަތްވެ އޮތުމެވެ.
ޖީސީސީގެ އޮނިގަނޑު
ޖީސީސީ އުފެދިފައިވަނީ މައިގަނޑު ހަ ގޮތްޕެއްގެ މައްޗަށް ކަމަށްވާއިރު، ކޮންމެ ގޮތްޕަކަށްވެސް ބައްދަލުވުން އިންތިޒާމް ކުރުމުން ފެށިގެން ސިޔާސަތުތައް ތަންފީޒުކުރުމާ ހަމައަށް ތަފާތު މަސައްކަތްތަކެއް ހަވާލުކުރެވިފައިވެއެވެ.
ސުޕްރީމް ކައުންސިލަކީ ޖަމާއަތުގެ އެންމެ އިސް ގުނަން ކަމަށްވާއިރު، ޖަމާއަތުގެ މެމްބަރު ގައުމުތަކުގެ ވެރިންގެ މައްޗަށް އެކުލެވޭ މި ގުނަނުން އަހަރަކު އެއްފަހަރު ބައްދަލުވުން ބާއްވައެވެ. މުހިއްމު މައްސަލަތަކުގައި ގޮތެއް ނިންމަންޖެހޭނީ ހުރިހާ ގައުމެއްގެ އިއްތިފާގުންނެވެ.
މިނިސްޓީރިއަލް ކައުންސިލަކީ މެމްބަރު ގައުމުތަކުގެ ޚާރިޖީ ވަޒީރުން ނުވަތަ އެ ގައުމަކުން ކަނޑައަޅާ ވަޒީރަކު ހިމެނިވަޑައިގަންނަވާ ކައުންސިލެކެވެ. ސިޔާސަތުތައް ހުށަހެޅުމަށާއި ނިންމުންތައް ތަންފީޒުކުރުމަށް މި ކައުންސިލުން ކޮންމެ ތިން މަހުން އެއް މަހު ބައްދަލުވުންތައް ބާއްވައެވެ.
ސެކްރެޓޭރިއަޓް-ޖެނެރަލް އަކީ އިދާރީ ކަންކަން ބަލަހައްޓާ ގުނަނެވެ. ބައްދަލުވުންތައް ބޭއްވުމާއި ސިޔާސަތުތައް ތަންފީޒު ކުރޭތޯ ބަލާނީ މިތަނުންނެވެ.
ކޮންސަލްޓޭޓިވް ކޮމިޝަން އުފެދިފައިވަނީ ކޮންމެ ގައުމަކުން ފަސް މެމްބަރުން ހިމެނޭ ގޮތަށެވެ. މި ކޮމިޝަނުގެ ޒިންމާއަކީ ސުޕްރީމް ކައުންސިލަށް ލަފާ ދިނުމެވެ.
ކޮމިޝަން ފޮރ ސެޓްލްމެންޓް އޮފް ޑިސްޕިއުޓްސް އުފައްދާފައިވަނީ މެމްބަރު ގައުމުތަކުގެ މެދުގައި އުފެދޭ ޚިލާފްތަކާ ދެބަސްވުންތަކަށް ޑިޕްލޮމެޓިކް ހައްލެއް ގެނެސްދިނުމަށެވެ.
ސެކްރެޓަރީ ޖެނެރަލް އައްޔަން ކުރަނީ ތިން އަހަރުގެ މުއްދަތަށް ސުޕްރީމް ކައުންސިލުންނެވެ.
މިހާރު އެ މަގާމު އަދާކުރައްވަމުން ގެންދަވަނީ 2011 ވަނަ އަހަރުން ފެށިގެން އެ މަގާމް ފުރުއްވަމުން ގެންދަވާ ބަހްރެއިނުގެ ކުރީގެ ލެފްޓިނެންޓް ޖެނެރަލް އަބްދުލްއާތިފް ބިން އަލް-ޒަޔާނީ އެވެ.
