ޣައްޒާ އަށް ބޭނުންވާ އަސާސީ ޚިދުމަތްތައް ފޯރުކޮށްދީ، ފަލަސްޠީނު ރައްޔިތުންގެ އަސާސީ ކަންކަން ފުއްދައި ދިނުމަކީ އިސްރާއީލްގެ ޒިންމާއެއް ކަމަށް، އިންޓަނޭޝަނަލް ކޯޓު އޮފް ޖަސްޓިސް (އައިސީޖީ) އިން ބުނެފި އެވެ.

އައިސީޖޭ އިން ބުދަ ދުވަހު ނެރުނު ލަފާދޭ ނިންމުމުގައި ބުނެފައި ވަނީ، ޣައްޒާގެ މަދަނީ ރައްޔިތުންގެ އަސާސީ ބޭނުންތައް ފުއްދައި ދިނުމަކީ އިސްރާއީލްގެ ޒިންމާއެއް ކަމަށެވެ.

ޖުމުލަ 11 ފަނޑިޔާރުންގެ މައްޗަށް އެކުލެވޭ ޕެނަލް އިން ނެރެފައިވާ ނިންމުމުގައި ފާހަގަ ކޮށްފައި ވަނީ، އދ އިން ފޯރުކޮށްދޭ އެހީތެރިކަމަށް އެއްބާރުލުން ދިނުމަކީ ވެސް އިސްރާއީލްގެ މައްޗަށް އޮތް ޒިންމާއެއް ކަމަށެވެ. އޭގެ ތެރޭގައި ޔުނައިޓެޑް ނޭޝަންސް ރިފީލް އެންޑް ވާކްސް އެޖެންސީ ފޯ ޕަލަސްޠީން ރެފިއުޖީސް އިން ދަ ނިއާ އީސްޓް، (އަންރުވާ) ވެސް ހިމެނެ އެވެ.

ޕްރިސައިޑިން ޖަޖް ޔުޖި އިވަސަވާ ވިދާޅުވެފައި ވަނީ، އޮކިއުޕައިން ބާރެއްގެ ގޮތުން އިސްރާއީލް އިން ވަނާީ ސަރަހައްދުގެ ރައްޔިތުންނަށް ބޭނުންވާ ކަންކަން ފުއްދައިދޭން ކަމަށެވެ. އޭގެ ތެރޭގައި ކާބޯ ތަކެއްޗާއި، ފެން، ބޯހިޔާވަހިކަން، ތެޔޮ އަދި ޞިއްޙީ ޚިދުމަތްތައް ވެސް ހިމެނޭނެ ކަމަށް ވަނީ ވިދާޅުވެފަ އެވެ.

ދުނިޔޭގެ ކޯޓުގެ ނަމުން ވެސް މަޝްހޫރު އައިސީޖޭގެ ލަފާ ދޭ ނިންމުން ތަކަކީ ޤާނޫނީ އަދި ސިޔާސީ ބުރަދަން ހުރި ނިންމުންތަކެކެވެ. ނަމަވެސް، މިއީ ތަންފީޒު ކުރުން ލާޒިމު ނިންމުން ތަކެއް ނޫނެވެ. އަދި ކޯޓަށް މި ފަދަ ނިންމުންތައް ތަންފީޒު ކުރުމުގެ ބާރެއް ވެސް ލިބިގެން ނުވެ އެވެ.

އިސްރާއީލް އިން ވަނީ އެ ނިންމުމާ ދެކޮޅު ހަދައިފަ އެވެ. އެގޮތުން އިސްރާއީލް އިން ބުނެފައި ވަނީ، އެ ޤައުމަށް ބައިނަލްއަޤުވާމީ ޤާނޫނުތަކާ އެއްގޮތަށް އަމަލު ކުރަމުންދާ ކަމަށެވެ. އިސްރާއީލް އިން ވަނީ ޣައްޒާގައި އަންރުވާގެ މަސައްކަތްތައް މަނާ ކޮށްފަ އެވެ. މިއީ އެ ޖަމިއްޔާގެ ބައެއް މުވައްޒަފުންނަކީ ހަމާސް ޖަމާއަތުގެ މެމްބަރުން ކަމަށް ތުހުމަތުކޮށް އިސްރާއީލް އިން ނިންމާފައިވާ ނިންމުމެކެވެ.

އައިސީޖީގެ ފަނޑިޔާރުން ފާހަގަ ކުރި ގޮތުގައި އަންރުވާގެ ގިނަ މުވައްޒަފުންނަކީ ހަމާސްގެ މެމްބަރުން ކަމަށް ދައްކުވައިދޭ ހެކި އިސްރާއީލް އަށް ހުށަހެޅިފައި ނެތް ކަމަށެވެ. މިއަހަރުގެ އޭޕްރީލް މަހު އދ އާއި ފަލަސްޠީނުގެ ވަކީލުން މަނީ، މާޗު މަހުން ފެށިގެން މެއި މަހާ ހަމައަށް އިސްރާއީލް އިން އެހީ ވެއްދުން މަނާކޮށްފައިވާ ކަމަށް ބުނެ، އެއީ ބައިނަލްއަޤުވާމީ ޤާނޫނާ ޚިލާފު ކަމެއް ކަމަށް ބުނެފަ އެވެ.

އޭގެ ފަހުން ކޮންމެ ވެސް މިންވަރަކަށް އިންސާނީ އެހީ ވެއްދުމުގެ ހުއްދަ ދީފައި ވީ ނަމަވެސް، އދ ގެ އިސްވެރިން ބުނާ ގޮތުހައި އެއީ ބަނޑުހައި ހޫނު ކަމުގެ ކާރިސާ އަކަށް ވެފައިވާ ސަރަހައްދަށް ބޭނުންވާ މިންވަރަށް ވުރެ މާ މަދު އަދަދެއް ކަމަށެވެ.

މި މަހު އެކުލަވާލެވުނު ހަނގުރާމަ ހުއްޓާލުމުގެ އެއްބަސްވުމުގައި ވަނީ، ކޮންމެ ދުވަހަކު ވެސް ޣައްޒާ އަށް 600 ޓްރަކްގެ އެހީ ވެއްދުމަށެވެ. ނަމަވެސް، އދ އިން ބުނާ ގޮތުގައި މިހާތަނަށް ޣައްޒާ އަށް ފޮރުކޮށްދެވިފައި ވަނީ މަދު މިންވަރެއްގެ އެހީ އެވެ.