އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އަށް ދެ އަހަރަށް ވުރެ ގިނަ ދުވަސް ވެފައިވާއިރު، އެ ހަނގުރާމައިގައި ޝަހީދުވެފައިވާ މީހުންގެ އަދަދު 70،000 އިން އަރާފައިވާ ކަމަށް ޣައްޒާގެ ޞިއްޙީ ވުޒާރާ އިން ހާމަ ކޮށްފި އެވެ.

ޣައްޒާގެ ޞިއްޙަތާ ބެހޭ ވުޒާރާ އިން އެކަން ހާމަ ކޮށްފައި ވަނީ ހޮނިހިރު ދުވަހު އެވެ. ޝަހީދުވެފައިވާ މީހުންގެ އަދަދު މައްޗަށް އަރާފައި މި ވަނީ، އެމެރިކާ މެދުވެރިވެގެން އެކުލަވާލަފައިވާ ހަނގުރާމަ ހުއްޓާލުމުގެ އެއްބަސްވުމެއްގެ ދަށުން ކަންތައް ތަކެއް ހިނގަމުން އަންނަ ވަގުތެއްގަ އެވެ. ހަނގުރާމަ ހުއްޓާލުމުގެ އެއްބަސްވުމަށް އަމަލު ކުރަން ފެށި ފަހުން ވެސް، އިސްރާއީލް އިން ވަނީ ޣައްޒާ އަށް ހަމަލާ ދީފަ އެވެ.

އިސްރާއީލް އާއި، ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް އިން ވެސް ގެންދަނީ، އެއްބަސްވުމާ ޚިލާފުވެފައިވާ ކަމަށް ބުނެ އެއް ބަޔަކު އަނެއް ބަޔަކަށް ތުހުމަތުތައް އަމާޒު ކުރަމުންނެވެ. ހަމާސް އިން ބުނަމުން އަންނަނީ އިސްރާއީލް އިން ބޭނުން ވަނީ ހަމަލާތައް ދީ، އަދި ވެސް މީހުން ޝަހީދު ކުރަން ކަމަށެވެ.

ޣައްޒާގެ ޞިއްޙީ ވުޒާރާގެ ބަޔާނުގައި ބުނެފައި ވަނީ، އެ ހަނގުރާމައިގައި ޝަހީދުވެފައިވާ މީހުންގެ އަދަދު މިހާރު ވަނީ 70،100 އަށް އަރާފައި ކަމަށެވެ. މިއަހަރުގެ އޮކްޓޫބަރު މަހުގެ ތެރޭގައި ހަނގުރާމަ ހުއްޓާލުމުގެ އެއްބަސްވުމެއް އެކުލަވާލައި، އެއްބަސްވުމަށް އަމަލު ކުރަން ފެށި ފަހުން ވެސް އިސްރާއީލްގެ ހަމަލާ ތަކުގައި 354 މީހުން ޝަހީދުވެފައިވާ ކަމަށް ވަނީ ހާމަ ކޮށްފަ އެވެ.

މީގެ އިތުރުން އެ އިދާރާ އިން ބުނެފައި ވަނީ ފާއިތުވި 48 ގަޑިއިރުގެ ތެރޭގައި ވެސް ޝަހީދުވެފައިވާ ދެ މީހެއްގެ ހަށިގަނޑު ހޮސްޕިޓަލް އަށް ގެނެވިފައިވާ ކަމަށެވެ. އޭގެ ތެރެއިން އެކަކީ، އަނދަމުން ދިޔަ އިމާރާތެއްގެ ތެރެއިން ނަގާފައިވާ މީހެއް ކަމަށް ވެސް ބުނެފައިވެ އެވެ.

ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކޮށްފައި ވީ ނަމަވެސް، ޣައްޒާގެ އިންސާނީ ޙާލަތު އަދި ވެސް އޮތީ ނާޒުކު ހިސާބެއްގައި ކަމަށް މާހިރުން އަންނަނީ ފާހަގަ ކުރަމުންނެވެ. އެގޮތުން އަދި ވެސް ޣައްޒާ އަށް ބޭނުންވާ އިންސާނީ އެހީ އާއި، ކާބޯ ތަކެއްޗާާއި އަދި ބޭސް ފަރުވާގެ އާލަތްތައް ފޯރު ކޮށްދެމުން އަންނަ ކަމަށް ފާހަގަ ކޮށްފައިވެ އެވެ.