މި ސަރުކާރުން ފެހި ޤާނޫނު އަސާސީ ފުނޑާލައި، ރައްޔިތުންގެ މަޖިލިސް ވާކޮށްލައި ރައްޔިތުން ބިކަކޮށްލާފައިވާ ކަމަށާއި އެހެންކަމުން ދެން ޖެހޭނީ ރައީސް ޑރ. މުޙައްމަދު މުއިއްޒަށް މަގުމަތިން އަޑުއިއްވަން ކަމަށް އެންޑީޕީގެ ކުރީގެ ޗެއާރޕާސަން، އަދި ކުރީގެ ޑިފެންސް މިނިސްޓަރ މާރިޔާ އަޙުމަދު ދީދީ ވިދާޅުވެއްޖެއެވެ.
ހުކުރު ދުވަހުގެ ރޭ ދިއިކޮޅު އެމްޑީޕީން ބޭއްވި "ފުދިއްޖެ، ފުނޑިއްޖެ" މުޒާހަރާގައި ބައިވެރިންނާއި މުޙާތަބު ކުރައްވައި ވާހަކަ ދައްކަވަމުން މާރިޔާ ވިދާޅުވީ އެމްޑީގެ މުޒާހަރާގައި ތިބީ އެންމެ ތިން މީހުންކަމަށް ބަޔަކު ރައީސް މުއިއްޒު ގާތު ވިދާޅުވެދާނެ ކަމަށެވެ. އެހެން ނަމަވެސް އެމްޑީޕީގެ މުޒާހަރާގައި ތިބީ އެންމެ ތިން މީހުންތޯ ބައްލަވާލެއްވުމަށް ރައީސް މުއިއްޒު މަގުމައްޗަށް ނުކުމެ ވަޑައިގަތުމަށް މާރިޔާ ވަނީ ގޮވައިލައްވާފައެވެ. އަދި ގާތުން މަންޒަރު ބަލާލެއްވުމަށް ވަޑައިގެން ދެއްވުމަށް ރައީސް މުއިއްޒުގެ ކިބައިން މާރިޔާ ވަނީ އެދިވަޑައިގެންފައެވެ.
މާރިޔާ ވިދާޅުވީ ބަޔަކު ބުރަމަސައްކަތުން، ވުޖޫދުކުރި، ފެހި ޤާނޫނު އަސާސީ ފުނޑާލައި، ރައްޔިތުންގެ މަޖިލިސް ވައު ކޮށްލައި ރައްޔިތުން ބިކަކޮށްލީމަ ދެން އޮތީ މަގުމައްޗަށް ނުކުތުންކަމަށާއި ރައްޔިތުންގެ ކަންބޮޑުވުންތައް ދެން ރައީސް މުއިއްޒަސް އަޑު އިއްވާނީ މަގުމަތިން ކަމަށެވެ. އަދި މިހާރު މިތިބީ މަގުމައްޗަށް ނުކުމެ ކަމަށް ވެސް މާރިޔާ ވިދާޅުވިއެވެ. އަދި ދެން ކުރިއަށް އޮތްތަނުގައި ވެސް މި ސަރުކާރަށް ރައްޔިތުންގެ ކަންބޮޑުވުންތަކުގެ އަޑުއިއްވާނީ މަގުމަތިން ކަމަށްވެސް މާރިޔާ ވިދާޅުވިއެވެ.
ރައީސް މުއިއްޒާއި ހޯމް ނިމިސްޓަރ އަލީ އިހުސާންގެ އިސްތިއުފާއަށް ގޮވާލައްވައި މާރިޔާ ވިދާޅުވީ ދެން ކުރިއަށް އޮތްތަނުގައި ސިލްސިލާކޮށް އެމްޑީޕީގެ މުޒާހަރާތައް ކުރިއަށް ދާނެ ކަމަށާއި މި ސަރުކާރަށް ޖެހޭނީ ރައްޔިތުންގެ ކަންބޮޑުވުމްތަކުގެ އަޑުއަހަން ކަމަށެވެ.
ރައީސް މުއިއްޒު.. އިސްތިއުފާ.. ރައީސް މުއިއްޒު.. އިސްތިއުފާ.. މަނިކުފާނަށް އެނގިލައްވާތޯ މިތާ ތިބި މީހުންގެ އަދަދު. ރައީސް މުއިއްޒުގެ އަރިހުގައި ބަޔަކު އެތަނުގައި ތިބީ 3 މީހުންނޭ ދެންނެވިޔަސް މިތަނަށް ވަޑައިގެން، ނުކުމެ ވަޑައިގެން އަދަދު ބައްލަވާލައްވާ. ރައީސް މުއިއްޒު ވަޑައިގެންބައްލަވާ މިތަނަށް.. އަޅުގަނޑުމެން ރައްޔިތުންގެ އަޑު އަހާލައްވަން.. އަޅުގަނޑުމެން ދަންނަވަން އޮތީ ތި ޤާނޫން އަސާސީ ފުނޑާލައްވާ، ރައްޔިތުންގެ މަޖިލިސް ވައު ކޮށްލީމާ، ހަމަ ދެން އޮތީ މަގުމައްޗަށް ނުކުމެ، މަގުމަތިން ތިޔަ ބޭފުޅުންނަށް އަޑު އިއްވުން.. ރައީސް މުއިއްޒު، އިސްތިއުފާ.. ހޯމް މިނިސްޓަރު ވަކިކުރޭ.އެންޑީޕީގެ ކުރީގެ ޗެއާރޕާސަން، އަދި ކުރީގެ ޑިފެންސް މިނިްސްޓަރ މާރިޔާ އަޙުމަދު ދީދީ
އެމްޑީޕީން ހުކުރު ދުވަހުގެ ރޭ ކުރިއަށް ގެންދިޔަ މި އެއްވުމުގައި ގިނަ އަދަދެއްގެ މީހުން ބައިވެރިވެފައިވާއިރު، އެމްޑީޕީގެ އިސް ފަރާތްތަކުގެ އިތުރުން އެ ޕާޓީއަށް ނިސްބަތްވާ ކުރީގެ މަޖިލިސް މެމްބަރުންނާއި މިހާރުގެ މެމްބަރުން ވަނީ ބައިވެރި ވެފައެވެ. މުޒާހަރާގެ ހުރިހާ ބައިވެރިންވެސް އެއް އަޑަކުން ގޮވާލަމުން ދަނީ ހޯމް މިނިސްޓަރު އަލީ އިހުސާން މަޤާމުން ވަކި ކުރުމަށާއި ރައީސް މުއިއްޒު އިސްތިއުފާ ދެއްވުމަށެވެ.
