އިދިކޮޅު މައި ސިޔާސީ ޕާޓީ އެމްޑީޕީން ހުކުރު ދުވަހު ހަވީރު ބޭއްވުމަށް ހަމަޖެހިފައިވާ "ފުދިއްޖެ-ފުނޑިއްޖެ" ހިނގާލުން ހުކުރު ދުވަހުގެ ރެއަށް ބަދަލުކޮށްފިއެވެ.
އެމްޑީޕީން ފުރަތަމަ މި ހިނގާލުން ބޭއްވުމަށް ނިންމީ ހުކުރު ދުވަހުގެ ހަވީރު 4:00 ގައެވެ. ނަމަވެސް އެމްޑީޕީން ވަނީ ހިނގާލުމުގެ ގަޑި ބަދަލުކޮށްފައިވާކަން ހާމަކޮށްފައެވެ. އެމްޑީޕީގެ ރަސްމީ އެކްސް އެކައުންޓުން ކުރި ޕޯސްޓެއްގައި ބުނެފައިވަނީ 31 ޖެނުއަރީވާ ހުކުރު ދުވަހުގެ ހަވީރު ބާއްވާ ހިނގާލުން އެރޭ 8:00ށް ބަދަލުވެފައިވާ ކަމަށެވެ. އަދި ކުރިންވެސް ރާވާފައިވާ ގޮތަށް ހިނގާލުމަށް މީހުން އެއްވާން ޖެހޭނީ އާޓިފިޝިއަލް ބީޗަށް ކަމަށް ބުނެފައިވެއެވެ.
އެމްޑީޕީން ބޮޑު އެއްވުމެއް ރާވާފައިވަނީ، ސަރުކާރު ޖަވާބުދާރީކޮށް ރައްޔިތުންގެ އަޑު ރައީސް ޑރ. މުހައްމަދު މުއިއްޒުއަށް އިއްވުމަށެވެ.
އެމްޑީޕީން ވަނީ ސަރުކާރު ހަމަމަގަށް އެޅުވުމަށް އިދިކޮޅު މައި ސިޔާސީ ޕާޓީގެ ހައިސިއްޔަތުން މީގެ ކުރިންވެސް ބޮޑު އެއްވުމެއް ބާއްވާފައެވެ. އެއީ "ގާނޫއަސާސީގެ ދިފާއުގައި" ނަމުގައި ޑިސެމްބަރު މަހުގެ 10 ވަނަ ދުވަހުއެވެ.
ހުކުރު ދުވަހު ބާއްވާ ހިނގާލުމަކީ ރައީސް ޑރ. މުހައްމަދު މުއިއްޒުގެ ވެރިކަން ހަމަމަގަށް އަޅުވައި، ރާވައިގެން އެމްޑީޕީން ބާއްވާ ފުރަތަމަ ބޮޑު ހިނގާލުމެވެ.
