ބާސެލޯނާ އަށް ކުޅެމުން އަންނަ ސްޕެއިންގެ ޑިފެންޑަރު އެރިކް ގާސިއާ އެ ކުލަބުގައި ހުންނަން އެދޭ ކަމަށް، ބާސެލޯނާގެ ކޯޗު ހަންސީ ފްލިކް ބުނެފި އެވެ.

އުމުރުން 24 އަހަރުގެ ގާސިއާ ބާސެލޯނާ އަށް ބަދަލުވީ 2021 ވަނަ އަހަރު އެވެ. މެންޗެސްޓަރ ސިޓީ ދޫކޮށްލުމަށްފަހު، އެ އަހަރު ގާސިއާ ބާސެލޯނާ އަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާ އެކު ގާސިއާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ބާސެލޯނާ އަށް ބަދަލުވީ ފަހުން އެ ކުލަބުގައި ގާސިއާ އަށް އެންމެ އެކަށީގެންވާ ވަރަށް ކުޅުމުގެ ފުރުސަތު ނުލިބޭތީ، އޭނާ ހުރީ ކުލަބު ދޫކޮށްލަން ބޭނުންވެފައި ކަމަށް ބައެއް މީޑިއާ ތަކުގައި ވަނީ ބުނެފަ އެވެ. ބާސެލޯނާ އަށް ބަދަލުވީ ފަހުން 2023 ވަނަ އަހަރު ގާސިއާ ވަނީ ލޯނު އެއްބަސްވުމެއްގެ ދަށުން ޖިރޯނާ އަށް ވެސް ކުޅެފަ އެވެ. އެ ލޯނު އެއްބަސްވުމުގެ މުއްދަތު ހަމަވުމުން ގާސިއާ ވަނީ އެނބުރި ބާސެލޯނާ އަށް އައިސްފަ އެވެ.

ގާސިއާގެ މުސްތަޤުބަލާ މެދު ސުވާލު އުފެދިފައިވާ ދަނޑިވަޅެއްގައި ބާސެލޯނާ އަށް އިރުޝާދު ދެމުން އަންނަ ޖަރުމަނުގެ ފްލިކް ވަނީ، ގާސިއާ އެ ކުލަބުގައި ހުންނަން އެދޭ ކަަމަށް ބުނެފަ އެވެ. ސްޕެނިޝް ލީގުގައި ބާސެލޯނާ އިން ވެލެންސިއާއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުން ފްލިކް ބުނެފައި ވަނީ، ގާސިއާގެ ފަރާތުން ބާސެލޯނާ އަށް ހަމަޖެހުން ލިބޭ ކަމަށާއި، އޭނާ އަކީ ކޮންމެ ރޯލެއް ވެސް އަދާ ކުރެވޭނެ ކުޅުންތެރިޔެއް ކަމަށެވެ. އެހެންކަމުން ގާސިއާ ބާސެލޯނާގައި ހުންނަން އޭނާ ބޭނުންވާ ކަމަށާއި، ވެލެންސިއާ މެޗުގައި ވެސް ގާސިއާގެ މުހިންމުކަން ފެނިފައިވާނެ ކަމަށް ފްލިކް ބުންޏެވެ.

ގާސިއާ ވަނީ ބާސެލޯނާ އަށް ބަދަލުވީ ފަހުން އެ ކުލަަބަށް 87 މެޗު ކުޅެދީ ތިން ލަނޑު ޖަހައިފަ އެވެ. އަދި ގާސިއާ ވަނީ ބާސެލޯނާ އާއެކު ސްޕެނިޝް ލީގު އަދި ސްޕެނިޝް ސުޕަ ކަޕް ކާމިޔާބު ކޮށްފަ އެވެ. އޭގެ ތެރެއިން ސްޕެނިޝް ސުޕަ ކަޕް ވަނީ ދެ ފަހަރެއްގެ މަތިން ކާމިޔާބު ކޮށްފަ އެވެ.

މީޑިއާ ތަކުގައި ބުނެފައިވާ ގޮތުން ޖިރޯނާގެ އިތުރުން ރެއާލް ސޮސިއެޑާޑުން ވެސް އޮތީ ގާސިއާ ހޯދުމަށް ޝައުޤުވެރިވެފަ އެވެ. މީގެ އިތުރުން އިޓަލީގެ ކޯމޯ އިން ވެސް ގާސިއާ އަށް ޝައުޤުވެރިވާ ކަމަށް މީޑިއާ ތަކުގައި ބުނެފައިވެ އެވެ.