އާ އަހަރު ފެށެން ކުޑަ ދުވަސްކޮޅަކަށް ވެފައިވާ އިރު ވެސް ލިޓްލްޖެމްސް ޕްރީސްކޫލްގެ އެގްރީމެންޓަށް ވާގޮތެއް ނޭނގޭތީ ބެލެނިވެރިން އެކަމާއި މެދު ކަންބޮޑުވުން ފާޅުކޮށްފިއެވެ.
2025ގައި ފެށޭ ދިރާސީ އަހަރަށް ކުދިން ވެއްދުމާއި، ރެޖިސްޓްރީ ކުރުމާއި މެދު ސްކޫލުން ލިޓްލް ގެމްސް ޕްރީސްކޫލުން ވަނީ ބެލެނިވެރިންނާއި ބަޔާނެއް ހިއްސާކޮށްފައެވެ. އެ ބަޔާނުގައި ބުނެފައި ވަނީ މި އަހަރުގެ އެޕްރިލް 6 އިން ފެށިގެން ކުރިއަށްދާ ދިރާސީ އާ އަހަރަށް ކުދިން އަލަށް ވެއްދުމަށާއި، މިހާރު ކިޔަވާ ކުދިންގެ ތެރެއިން އާ ދިރާސީ އަހަރު ސްކޫލްގައި ތިބޭ ކުދިން ސްކޫލްގައި ރަޖިސްޓްރީކުރުމަށް، ފޯމް ބަލައިގަތުން ކުރިއަށް ދާނެ ގަޑިތައް އަންގާފައެވެ.
މީގެ އިތުރުން މިހާރު ސްކޫލްގައި ކިޔަވާ ކުދިންގެ ތެރެއިން ފެށޭ ދިރާސީ އަހަރުވެސް އެ ސްކޫލްގައި ބައިތިއްބަން އެދޭ ދަރިވަރުންގެ ބެލެނިވެރިންނަށް ދޭންޖެހޭ އިރުޝާދުތައް ވަނީ އެ ބަޔާނުގައި ފޯރުކޮށްދީފައެެވެ. އެ ބަޔާނުގައި ރެޖިސްޓްްރޭޝަންގެ މަރުހަލާ ފުރިހަމަކުރި ނަމަވެސް އާ ދިރާސީ އަހަރު އެ ސްކޫލުން ޖާގަ ދެވޭނެކަމުގެ ޔަޤީންކަން ނެތްކަމަށް ވަނީ ފާހަގަކޮށްފައެވެ. ސަބަބެއް ކަމަށް ބުނެފައި ވަނީ މިހާރު ސްކޫލް ހިންގާ އިމާރާތުގައި ސްކޫލް ހިންގަމުން ދަނީ އެޑިއުކޭޝަން މިނިސްޓްރީ އާއި އެކު ހަދާފައިވާ މެނޭޖްމެންޓް ކޮންޓްރެކްޓެއްގެ ދަށުން ކަަމަށް ވެފައި، އެ ކޮންޓްރެކްޓްގެ މުއްދަތު އަންނަ ޖޫން 24 އަށް ހަމަވާ އިރު އެ ތާރީހުގެ ފަހުން އެ އިމާރާތުގައި ސްކޫލް ކުރިއަށް ގެންދެވޭނީ އެޑިއުކޭޝަނުން އެ ފުރުސަތު ދޭ ހާލަތުގައިކަމަށްވުމެވެ.
ރާއްޖެއެމްވީ އަށް ވެސް ލިބިފައިވާ އެ ބަޔާނުގައިވާ ގޮތުން ސްކޫލުން ވަނީ މި މައްސަލަ އާއި ގުޅިގެން އެޑިއުކޭޝަން މިނިސްޓްރީ އާއި މުއާމަލާތުކޮށްގެން މައްސަލަ ހައްލުކުރުމަށް މަސައްކަތްކޮށްފައިވާ ކަމަށް ފާހަގަކޮށްފައެވެ. އެކަމާއި މެދު ގޮތެއް ނިންމާދިނުމަށް ތަކުރާރުކޮށް އެޑިއުކޭޝަން މިނިސްޓްރީގައި އެދުމުން ވެސް އެކަށީގެންވާ އިޖާބައެއް ނުލިބޭކަމަށް ސްކޫލުން ވަނީ ބެލެނިވެރިންނަށް އަންގާފައެވެ.
ރާއްޖެއެމްވީ އަށް މައުލޫމާތުދިން ބެލެނިވެރިޔަކު ކިޔާދިން ގޮތުގައި ނިމިދިޔަ އޮކްޓޯބަރ 7 ވަނަ ދުވަހު އެކަމާއި މެދު ގޮތެއް ނިންމާދިނުމަށް ސިޓީ އެއް ފޮނުވާ އެކި ފެންވަރުގައި އެކަމާއި މެދު މަޝްވަރާކޮށްފައިވާ ކަމަށް އެ ސްކޫލުން ދަނީ ބުނަމުންނެވެ. އަދި ޖެނުއަރީ މަހުގެ 7 ވަނަ ދުވަހުގެ ރޭ ބޭއްވި ވޮލެންޓިއަރ ބެލެނިވެރިންގެ ބައްދަލުވުމުގައި ލިބުނު ލަފާގެ މަތިން 8 ޖެނުއަރީގައި ވެސް އެޑިއުކޭޝަން މިނިސްޓްރީ އަށް ސިޓީ އެއް ވަނީ ފޮނުވާފަކަމަށް ރާއްޖެއެމްވީ އަށް މައުލޫމާތު ދިން ބެލެނިވެރިއަކު ވަނީ ބުނެފައެވެ. 8 ޖެނުއަރީގައި އެޑިއުކޭޝަން މިނިސްޓްރީ އާއި ސްކޫލްގެ ފަރާތުން ވަނީ ބައްދަލުވެސް ކޮށްފައެވެ. އެހެންނަމަވެސް މި މައްސަލައިގައި އެދެވޭ ކުރިއެރުމެއް ނުލިބޭ ކަމަށް ސްކޫލުން ވަނީ ބެލެނިވެރިންނށް އަންގާފައެވެ.
ސްކޫލާއި ހަވާލާދީ އެ ބެލެނިވެރިޔާ ބުނީ މި މަހުގެ 12އިގެ ނިޔަލަށް އެކަމާއި މެދު ޖަވާބެއް ދޭނެ ކަމަށް އެޑިއުކޭޝަން މިނިސްޓްރީން ބުނި ނަމަވެސް އަދިވެސް އެކަމާއި މެދު އެއްވެސް ޖަވާބެއް ނުލިބޭ ކަމަށެވެ. އެކަން އެހެން އޮތުމުން އެ ސްކޫލުގައި ކިޔަވާ ދަރިވަރުންގެ މުސްތަގްބަލާއި މެދު ސުވާލު އުފެދިފައިވާ ކަމަށް ރާއްޖެއެމްވީ އާއި ވާހަކަދެއްކި ބެލެނިވެރިން ވަނީ ބުނެފައެވެ.
1500 އަށް ވުރެ ކުދިންގެ ވާހަކަ މި ދައްކަނީ. މިހާވަރަށް މިކަންކަން ބޮއްސުންލާއިރު ކަންކަން ބަލާ ޖަވާބުދާރީ ވާނެ މީހެއް ނެތް. ފަސޭހަ އެއް ނޫން މުޒާހަރާކުރާކަށް. ސްކޫލަށް އަލިމަގެއް ނެތް. ސްކޫލުން ފޮނުވާ ސިޓި އަށް ވެސް ޖަވާބެއް ނުލިބޭކަމަށް ސްކޫލުން ބުނޭ. ސްކޫލުން މާޔޫސްވެ، މިދިޔަ މަހު ބެލެނިވެރިންނަށް ވާގޮތް ވަރަށް ސާފުކޮށް ކިޔާދިން. އެހެން މެނޭޖްމެންޓެއް ހޯދީތޯ ނުވަތަ ނޫންތޯ، ހޯދާނެތޯ ނޫންތޯ ވެސް ބެލެނިވެރިންނަށް އެނގެންވާނެ.ބެލެނިވެރިއެއް
މިކަމާއި ގުޅޭގޮތުން ރާއްޖެއެމްވީ އަށް މައުލޫމާތުދެއްވަމުން އެޑިއުކޭޝަން މިނިސްޓްރީގެ ޑެޕިއުޓީ މިނިސްޓަރ ތޯރިފް މުހައްމަދު ވިދާޅުވިގޮތުގައި ލިޓްލްޖެމްސްގެ އެގްރީމެންޓްގައި ވާގޮތުން، 2022 ވަނަ އަހަރުގެ ފުރަތަމަ ޓަރމްގައި މިނިސްޓްރީގެ ޓީމަކުން ސުޕަރވައިޒްކޮށް، ހިންގުން ހިފެހެއްޓިފައިވާ ނަމަ، އިތުރު 2 އަހަރު ދުވަހަށް މެނޭޖްމެންޓް ހަވާލުވާ ފަރާތާއި ޕްރީސްކޫލް ހިންގުން ހަވާލުކުރުމުގެ އިޚްތިޔާރު އެ ވުޒާރާއަށް އޮވެއެވެ. އެހެންނަމަވެސް އެ މުއްދަތަށް ފަހު ސްކޫލް ހިންގާނެ ފަރާތެއް ހޯދަން އާއްމުކޮށް އިއުލާންކުރަންވާނެ ކަމަށް އެ އެއްބަސްވުމުގެ 6 ވަނަ މާއްދާގައި ވަނީ ބުނެފައެވެ.
އެހެންކަމުން އެއާއި ޚިލާފަށް ޢަމަލު ނުކުރުމަށް އެޓަރނީޖެނެރަލް ލަފާދެއްވާފައިވާތީ ސްކޫލް ހިންގާނެ ފަރާތެއް ހޯދަން އިޢުލާންކުރާނެ ކަަމަށް އޭނާ ވިދާޅުވިއެވެ. އަދި އެ ޓެންޑަރ ކޮންމެ ފަރާތަކުން ކާމިޔާބުކުރިއަސް ލިޓްލް ޖެމްސްގެ ބެލެނިވެރިންނާއި ދަރިވަރުން އަދި ސްކޫލްގެ ކަންބޮޑުވުންތައް ހައްލުކޮށްދޭނެ ކަމަށާއި ދަރިވަރުންގެ ހައްގުތަކާއި މުދައްރިސުންގެ ހައްގުތައް ކަށަވަރުކުރާނެ ކަމަށް އޭނާ ވިދާޅުވިއެވެ.
އެޑިއުކޭޝަން މިނިސްޓްރީން މިހެން ބުނެފައިވާއިރު ސްކޫލްގެ މަސައްކަތް ކުރިއަށް ގެންދަން އަނގަ ބަހުން ސްކޫލަށް އަންގާފައިވާކަމަށް އިތުބާރު ހުރި މަސްދަރަކުން ވަނީ ރާއްޖެއެމްވި އަށް މައުލޫމާތު ދީފައެވެ. އެހެންނަމަވެސް ލިޔުމުން އެގްރީމެންޓަށް ވާގޮތެއް ހޯދަން ތަކުރާރުކޮށް އެދިގެން ވެސް ޖަވާބެއް ނުލިބޭ ކަމަށް އޭނާ ވަނީ ބުނެފައެވެ.
އެޑިކޭޝަން މިނިސްޓްރީ އިން މިހެން ވިދާޅުވެފައިވާއިރު މިހާތަނަށް ވެސް އެކަމާއި ގުޅޭ މައުލޫމާތު ރަސްމީކޮށް ނާންގާތީ ބެލެނިވެރިން ވަރަށް ބޮޑަށް ކަންބޮޑުވުން ފާޅުކޮށްފައިވެއެވެ. އަދި ބޮޑު އޮޕަރޭޝަނެއް ކުއްލިއަކަށް ބަދަލުކުރަންޖެހިއްޖެ ނަމަ އެއީ ވަރަށް ބޮޑު ތަކުލީފެއް ކަމަށް އެ ފަރާތްތަކުން ފާހަގަކުރެއެވެ. އަދި މެނޭޖްމެންޓް ބަދަލުވާ ހާލަތު ނުވަތަ ސްކޫލްގެ ހިންގުން ބަަދަލުވާ ނަމަ އެހެން ސްކޫލަކަށް ދާން ބޭނުންވާ ދަރިވަރުންނަށް އެ ފުރުސަތު ގެއްލުން ނުވަތަ ހަނިވުމުގެ ފުރުސަތު ބޮޑުކަމަށް ބެލެނިވެރިން ދަނީ ފާހަގަކުރަމުންނެވެ.
