ބްރޯޑްކާސްޓިން ކޮމިޝަނަށް މެމްބަރުން އައްޔަން ކޮށްފައި ވަނީ ގައުމުގެ ރައްޔިތުންގެ މެދުގައި ވަހުމްއުފެދޭގޮތަށް ކަމަށް ވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު (ފިއްޓޭ) ވިދާޅުވެއްޖެއެވެ.
ރައްޔިތުންގެ މަޖިލީހުގެ ދައުރުން ބޭރުން ބާއްވާ ދެވަނަ ޖަލްސާގައި ވާހަކަދައްކަވަމުން މެންބަރު ޒިޔާދު ވިދާޅުވީ، ރާއްޖޭގައި މިހާރު ކަންކަން ހިނގަމުންދާ ގޮތަށް ބަލާއިރު، މީ ރައްޔިތުންގެ ޓެކްސް ފައިސާއިން ސަރުކާރަށް ފާރަވެރިވުމަށް އުފައްދާފައި އޮތް ކޮމިޝަންތައް މިނިވަންކަމާއި އެކު ހިނގާކަމާއި މެދުގައި މިއަދު ރައްޔިތުންގެ އިތުބާރެއް ނެތްކަމަށެވެ. އަދި އެކަން އެނގޭ އެންމެ ބޮޑު ސަބަބެއްކަމުގައި ފިއްޓޭ ވިދާޅުވީ ދާދިފަހުން ރައްޔިތުންގެ ޒާތީ މައުލޫމާތުން ކުރި ބޮޑު ވައްކަމުގެ މައްސަލައެވެ. އެ ވައްކަން ހިނގާދިއަ ގޮތް މިއަދާއި ހަމައަށް ވެސް އެންމެމަތިން ޒިންމާތައް ހަވާލުކޮށްފައިވާ އެއްވެސް މުއައްސަސާއަކުން އިސްނަގައިގެން އެއްވެސް ކަމެއް ކޮށްފައި ނުވާކަން އޭނާ ފާހަގަކުރިއެވެ.
ފިއްޓޭ ވިދާޅުވީ ރައްޔިތުންގެ ޒާތީ މައުލޫމަތަކީ ރައްޔިތުންގެ ވަރަށް ބޮޑު އަމާނާތެއް ކަމަށާއި އެއިން ވައްކަން ކޮށްގެން ތިބި ފަރާތްތަކާއި މެދު އެއްވެސް ފިޔަޅެއް ނާޅައި، އެކަމާއި އަޅާނުލައި ތިބުމަކީ ރައްޔިތުންނަށް ދެވޭ ބޮޑު އަނިޔާއެއް ކަމަށެވެ. އަދި އެއީ އެހާ ފަސޭހައިން އަޅާނުލައި ދޫކޮށްލައިގެން ތިބެން ޖެހޭނޭ ފަދަ ކަމެއް ނޫންކަންވެސް ފިއްޓޭ ފާހަގަކުރިއެވެ.
ފިއްޓޭ ވިދާޅުވީ މިއީ ބޮޑު ޖަރީމާއެއް ކަމަށާއި މިކަން މިހާރުން މިހާރަށް ވެސް ބަލައި ފިޔަވަޅު އަޅަން ޖެހޭނޭ ކަމަށެވެ. އެހެން ނަމަވެސް މިވަރުގެ ބޮޑު ވައްކަމެއް ހިނގައިގެން ދިއަ އިރުގައިވެސް މުއައްސަސާތަކުން ބަހެއް ނުބުނެ، އަޅާނުލައި ތިބުމަކީ ދިވެހި ރައްޔިތުންގެ އެންމެ ބޮޑު އެއްކަންބޮޑުވުން ކަމަށް ވެސް އޭނާ ވިދާޅުވިއެވެ. އަދި ސަރުކާރުން މި ހިންގާ ވައްކަތަކާއި ކަރަޕްޝަންގެ އަމަލުތައް ތަކުރާރު ކޮށް ހިނގަނީ ނަމަ، މުޅި މުއައްސަސާތަކާއި ދައުލަތުގެ އަގު ރައްޔިތުންގެ ކުރިމަތީގައި ވެއްޓި، ރައްޔިތުންގެ އިތުބާރު ގެއްލުމުގެ ފުރުސަތު އޮތްކަން ވެސް އޭނާ ވަނީ ފާހަގަކުރައްވާފައެވެ.
މިއަދުގެ ހާލަތާއި ކަންކަން ހިނގާގޮތަށް ވިސްނާއިރުގަ. މި ރައްޔިތުންގެ ޓެކްސް ފައިސާއިން ސަރުކާރެއް ޒިންމާދާރުކުރަން، ޖަވާބުދާރީކުރަން، އަދި ސަރުކާރަށް ފާރަވެރިވުމަށް މި އުފައްދާ މިނިވަން ކޮމިޝަންތައް މިނިވަން ކަމާއި މެދުގަ މިއަދު ރައްޔުތުންގެ ޚިޔާލުތަފާތުވުން އެބައޮތް. ރައްޔިތުންނަށް މިއަދަކު އެ ކޮމިޝަންތަކުގެ މަސައްކަތާއި މެދު އިތުބާރެއް ނެތް. އެހެން އެކަން ވާންޖެހޭ ސަބަބުތަކެއްވެސް އެބަހުރި. ދާދި ފަހުން ދިވެހިރާއްޖޭގައި ހިނގާފައިވާ ހާދިސާއަށް ބަލާލާއިރުވެސް އަޅުގަނޑުމެނަށް ފެނިގެން މިދިޔައީ މިކަމުގެ އެންމެ މަތީ ޒިންމާ ހަވާލުކުރެވިފައިވާ ފަރާތުން އިސްނަގައިގެން ދިވެހި ރައްޔިތުންގެ ޒާތީ މައުލޫމާތު ނަންގަވައިގެން، އެ ބޭނުންކޮށްގެން ނަހަމަގޮތުގައި ބޮޑު ސިންގާ ޖަރީމާއެއް ހިނގާދިޔަތަންވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު
ބްރޯޑްކާސްޓިންގ ކޮމިޝަނަށް މެމްބަރުން އައްޔަން ކުރިގޮތަށް ފާޑުވިދާޅުވެ، ފިއްޓޭ ވިދާޅުވީ އެންމެ ފަހުން ބްރޯޑްކާސްޓިންގ ކޮމިޝަނަށް ވެސް މެމްބަރުން އައްޔަން ކޮށްފައިވަނީ ރައްޔިތުންގެ ހިތުގައި އެކަމާއި މެދު ވަހުމު އުފެދޭ ގޮތަށް ކަމަށެވެ. އެގޮތުން ބްރޯޑްކޮމް އަށް މެމްބަރުން އައްޔަން ކުރިއިރު، އެންމެ މަތިން މާކްސް ލިބުނު ފަރާތައްވެސް ވޯޓާއި ހަމައިން ގޯސްވެގެން ދިޔައީކަމަށް އޭނާ ވިދާޅުވިއެވެ.
ފިއްޓޭ ވިދާޅުވީ މިއަދު މިނިވަން މުއައްސަސާތަކަށް ސަރުކާގެ ނުފޫޒު އިންތިހާއަށް ވަދެފައި އޮތުމަކީ މިފަދަ ކަންކަން ނުސީދާ ގޮތްގޮތަށް ދިއުމަށް ކޮށިފައި އޮތް މަގެއް ކަމަށެވެ. އެހެން ކަމުން ރައްޔިތުންގެ ފުރިހަމަ އިތުބާރު އޮންނަ ތަންތަނަށް މިނިވަން މުއައްސަސާތައް ވާން އެބަޖެހޭކަމަށް ވެސް ފިއްޓޭ ވިދާޅުވިއެވެ.
