ކުލަބުތަކަށް ބިދޭސީ ކުޅުންތެރިން ގެނެވޭ ޤަވާއިދު ބަދަލުކޮށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކަން ކުލަބުތަކަށް އަންގައިފި އެވެ.
އެންމެ ފަހުން އަމަލު ކުރަމުން ދިޔަ ބިދޭސީ ކުޅުންތެރިންގެ ޤަވާއިދުގައި އޮތް ގޮތުން، ކޮންމެ ކުލަބަކަށް ވެސް ބިދޭސީ ހަ ކުޅުންތެރިން ގެނެވޭނެ އެވެ. އެގޮތަށް ޤަވާއިދަށް ބަދަލު ގެންނަން އެފްއޭއެމް އިން ނިންމީ 2023 ވަނަ އަހަރުގެ ތެރޭގަ އެވެ.
ނަމަވެސް މިހާރު އެފްއޭއެމް އިން ވަނީ، ކުލަބުތަކަށް ގެނެވޭނީ ބިދޭސީ ތިން ކުޅުންތެރިން ކަމަށް ކަނޑައަޅައި، އެ އަދަދު ކުޑަކޮށްފަ އެވެ. އެފްއޭއެމުން އެކަން ނިންމާފައި ވަނީ އެފްއޭއެމްގެ ޓެކްނިކަލް ކޮމެޓީއާ މަޝްވަރާކޮށް، އެ ކޮމެޓީން އިރުޝާދު ދީފައިވާ ގޮތުގެ މަތިން ކަމަށް އެ އެސޯސިއޭޝަނުން ވަނީ ބުނެފަ އެވެ.
އެފްއޭއެމުން މިހާރު މަސައްކަތް ކުރަމުން އަންނަނީ އަންނަ ފެބްރުވަރީ މަހުގެ ތެރޭގައި ރާއްޖޭގެ ފުޓުބޯޅަ ސީޒަން ފެށުމަށް މަސައްކަތް ކުރަމުންނެވެ. މިވަގުތު އެފްއޭއެމް އިން ތާވަލްކޮށްފައިވާ ގޮތުން އަންނަ ފެބްރުވަރީ މަހުގެ 14 ވަނަ ދުވަހު ސީޒަން ހުޅުވާ މެޗު ކުޅޭނެ އެވެ. އޭގެ ފަހުން ފެބްރުވަރީ މަހުގެ 21 ވަނަ ދުވަހު ޕްރެޒިޑެންޓްސް ކަޕް ފުޓުބޯޅަ މުބާރާތް ފަށާނެ އެވެ. އެ މުބާރާތަށްފަހު، ދިވެހި ޕްރިމިއާ ލީގު ފެށުމަށް ތާވަލްކޮށްފައި ވަނީ އޭޕްރީލް މަހުގެ އަށް ވަނަ ދުވަހު އެވެ.
އަންނަ މަހު ފުޓުބޯޅަ ސީޒަން ފަށަން ތައްޔާރުވަމުން އަންނައިރު، މިހާތަނަށް ރަސްމީކޮށް ފަރިތަކުރުންތައް ފެށި ހަމައެކަނި ޓީމަކީ މާޒިޔާ ސްޕޯޓްސް އެންޑް ރެކްރިއޭޝަން އެވެ.
