ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ މި ވެރިކަން، ފަސް އަހަރު ވަންދެން އޮންނަން ޖެހޭ ކަމަށް ޤަބޫލު ނުކުރައްވާ ކަމަށް، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ ކުރީގެ ނައިބު ރައީސް މުޙައްމަދު ޝިފާޒު (ޝިއްޕެ) ވިދާޅުވެއްޖެ އެވެ.

ޝިފާޒު މިހެން ވިދާޅުވީ ހޯމަ ދުވަހުގެ ހެނދުނު ރާއްޖެ ޓީވީގެ ފަށާއިރު ޕްރޮގްރާމްގެ ޚާއްސަ މެހުމާނެއްގެ ގޮތުގައި ބައިވެރިވެ ވަޑައިގެން ވާހަކަ ދައްކަވަމުންނެވެ. ދާދި ފަހުން ޝިފާޒު ވަނީ ދަ ޑިކޮމްރަޓްސްގެ ނައިބު ރައީސް ކަމުން އިސްތިއުފާ ދެއްވައިފަ އެވެ. އަދި އާދީއްތަ ދުވަހު ޝިފާޒު ވަނީ އަލުން އެނބުރި އެމްޑީޕީއާ ގުޅިވަޑައިގެންފަ އެވެ.

ފަށާއިރު ޕްރޮގްރާމްގައި ވާހަކަ ދައްކަވަމުން ޝިފާޒު ވިދާޅުވީ، ރައީސް މުޢިއްޒުގެ މި ވެރިކަން ފަސް އަހަރު ވަންދެން އޮތުން އެއީ އަތް އުރާލައިގެން ތިބެވޭނެ ކަމެއް ކަމަށް ޤަބޫލު ނުކުރައްވާ ކަމަށެވެ. ޝިފާޒު ވިދާޅުވީ ބަޣާވާތެއް ކުރުން އެއީ ރަނގަޅު ކަމެއް ނޫން ކަމަށާއި، ރައީސް މުޢިއްޒު އާއި ސަރުކާރުން ކަންކަން ސިފަ ކުރައްވަނީ ވަރަށް ޒާތްޒާތަށް ކަމަށެވެ. އެގޮތުން ދާދި ފަހުން ވޮޝިންޓަން ޕޯސްޓުގައި ބަޣާވާތަކުން ރާއްޖޭގެ ވެރިކަން ބަދަލު ކުރަން މަސައްކަތް ކޮށްފައިވާ ކަމަށް ބުނެ ޝާއިއުކޮށްފައިވާ ލިޔުމަށް އިޝާރާތް ކުރައްވާ ޝިފާޒު ވިދާޅުވީ، ރާއްޖޭގެ ރައްޔިތުންގެ މަޖިލީހަކީ ވެރިކަން ބަދަލު ކުރުމުގެ ބާރު ދީފައި އޮތް ތަން ކަމަށެވެ. މަޖިލިހުން ސަރުކާރެއް ބަދަލު ކުރުމަށް ވެސް، ރައީސް މުޢިއްޒު އާއި މިހާރުގެ ސަރުކާރުން ކިޔަނީ ބަޣާވާތް ކަމަށް ޝިފާޒު ވިދާޅުވެފައިވެ އެވެ.

މީގެ އިތުރުން ޤައުމީ ބޭންކުން ޑޮލަރުގެ ލިމިޓަށް ގެނައި ބަދަލަށް ވެސް ރައީސް މުޢިއްޒު އާއި ސަރުކާރުން ކިޔާފައި ވަނީ ބަޣާވާތްކަން ފާހަގަ ކުރައްވައި ޝިފާޒު ވިދާޅުވީ، ރައީސް މުޢިއްޒު އާއި ސަރުކާރުން ބަޣާވާތް ސިފަ ކުރާ ގޮތާއި، ޝިފާޒުމެން ސިފަ ކުރައްވާ ގޮތް ވަރަށް ތަފާތު ކަމަށެވެ. އެކަމަށް ކިޔާ ނަން ތަފާތުވާކަން ފާހަގަ ކުރައްވައި ޝިފާޒު ވިދާޅުވީ، ރައީސް މުޢިއްޒުގެ މި ވެރިކަން ފަސް އަހަރު ދުވަަހަށް އޮންނަން ނުޖެހޭ ކަމަށް އޭނާ ޤަބޫލު ކުރައްވާ ކަމަށެވެ.

މީގެ އިތުރުން ޝިފާޒު ވިދާޅުވީ މީގެ ކުރިން ރައްޔިތުންގެ މަޖިލީހުގެ ތެރެއިން ވެރިކަން ބަދަލު ކުރުމުގެ މަސައްކަތް ކުރިކަން، ކުރީ ބައިގައި އެނގިވަޑައިގެންނެވި ނަމަ، އެކަމުގައި އެއްބާރުލުން ދެއްވާނެ ކަމަަށެވެ. ވެރިކަން ބަދަލު ކުރުމުގެ ޒިންމާ އާއި ބާރު އޮތީ ރައްޔިތުންގެ މަޖިލީހަށް ކަމަށާއި، އެކަން ކުރެވޭނީ މަޖިލީހަށް ކަމަށް ޝިފާޒު ވަނީ ތަކުރާރުކޮށް ވިދާޅުވެފަ އެވެ.

ޝިފާޒުގެ އިތުރުން ކުރިން އެމްޑީޕީގައި މަސައްކަތް ކުރެއްވި ބައެއް ބޭފުޅުން ވަނީ އަލުން އެމްޑީޕީއާ ގުޅިވަޑައިގެންފަ އެވެ. އެގޮތުން އެމްޑީޕީގެ ކުރީގެ ޗެއާޕާސަން އަލްއުސްތާޛް ޙަސަން ލަޠީފް (ޙަސަންކޮ) އާއި މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމްގެ އިތުރުން، ޙުސެއިން އަމްރު ވެސް ވަނީ އަލުން އެމްޑީޕީއާ ގުޅިވަޑައިގެންފަ އެވެ. މި ބޭފުންނަކީ އެމްޑީޕީގެ އެތެރޭގައި އުފެދުނު ޚިޔާލު ތަފާތުވުމުގެ ތެރޭގައި، ދަ ޑިކޮމްރަޓްސް އުފައްދަވައި، އެ ޕާޓީގައި މަސައްކަތް ކުރެއްވި ބޭފުޅުންނެވެ. އެގޮތުން އަމްރު އަކީ 2023 ވަނަ އަހަރު އޮތް ރިޔާސީ އިންތިޚާބުގައި ޑިމޮކްރަޓްސްގެ ރިޔާސީ ކެންޑިޑޭޓުގެ ރަނިންމޭޓު އެވެ. ޑިމޮކްރަޓްސް އިން ވަކިވުމާ ހަމައަށް ޙަސަން ލަޠީފް ހުންނެވީ އެ ޕާޓީގެ ރައީސްކަމުގަ އެވެ. ޝިފާޒު ހުންނެވީ އެ ޕާޓީގެ ނައިބު ރައީސްކަމުގަ އެވެ.

އެމްޑީޕީގައި ކުރިން އިސްކޮށް މަސައްކަތް ކުރެއްވި ބޭފުޅުން އަލުން އެ ޕާޓީއާ ގުޅިވަޑައިގެންނެވުމުން، އެ ޕާޓީގެ އިސްވެރިން އަދި އާންމު މެމްބަރުން ވެސް އަންނަނީ އެ ބޭފުޅުންނަށް މަރުޙަބާ ވިދާޅުވަމުންނެވެ.