ޤައުމުގެ ކަންކަން ހަމަ މަގުން ނެއްޓޭ ކޮންމެ ފަހަރަކު ވެސް، އެކަންކަމާ ދެކޮޅަށް ބަސް ބުނެ، ކަންކަން ރަނގަޅު ކުރަން މަސައްކަތް ކުރައްވާ ކަމަށް، ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެމްބަރު އަލީ އާޒިމް ވިދާޅުވެއްޖެ އެވެ.
އާޒިމް މިހެން ވިދާޅުވީ، އާދީއްތަ ދުވަހުގެ ހެނދުނު ރާއްޖެ ޓީވީގެ ފަށާއިރު ޕްރޮގްރާމްގެ ޚާއްސަ މެހުމާނެއްގެ ގޮތުގައި ބައިވެރިވެ ވަޑައިގެން ވާހަކަ ދައްކަވަމުންނެވެ. އާޒިމް ވިދާޅުވީ ފާއިތުވި 17 ވަރަކަށް އަހަރުގެ ތެރޭގައި، ރާއްޖޭގެ ސިޔާސީ މަސްރަޙުގައި ހިނގާފައިވާ ގިނަ ކަންކަމުގައި އޭނާގެ ބައިވެރިވުން އޮންނާނެ ކަމަށެވެ. އެގޮތުން މި ފާއިތުވި އަހަރުތަކުގައި ރާއްޖޭގެ ސިޔާސީ މަސްރަޙުގައި ކަންކަން ހަމަ މަގުން ނެއްޓިގެންދާ ކޮންމެ ފަހަރަކު، ކޮންމެ ވެރިކަމެއް އޮތް ނަމަވެސް އެކަންކަމާ ދެކޮޅަށް ވަކާލާތު ކުރައްވާ ކަމަށް އާޒިމް ވިދާޅުވެފައިވެ އެވެ.
އެގޮތުން ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމުގެ ވެރިކަމުގައި ރައްޔިތުންގެ މަޖިލީހުގެ ތެރޭގައި ކަންތައް ވެގެން ދިޔަ ގޮތުގެ ވާހަކަ އާޒިމް ވަނީ ފާހަގަ ކުރައްވައިފަ އެވެ. ޤާނޫނާއި ޤަވާއިދަށް ބެލުމެއް ނެތި، ހުދުމުހުތާރު ވެރިކަމެއް އަށަގަންނަމުން ދިޔަކަން ފާހަގަ ކުރައްވައި އާޒިމް ވިދާޅުވީ، އޭރު މަޖިލީހުގައި މައިކު ބޭނުންކޮށްގެން ވާހަކަ ދެއްކުމުގެ ފުރުސަތު ވެސް މެމްބަރުންނަށް ނޯންނަ ކަމަށެވެ. އެކަންކަމާ ދެކޮޅަށް އޭރު މަޖިލީހުގެ ތެރޭގައި ބައެއް ކަންކަން ކޮށްފައިވާނެ ކަމަށް އާޒިމް ވިދާޅުވި އެވެ.
މީގެ އިތުރުން އާޒިމް ވިދާޅުވީ، ނިމިދިޔަ އެމްޑީޕީން ވެސް އޭނާ ވަކި ކުރަން ޖެހުނީ އެފަދަ ގޮތަކަށް ބަސްބުނުމުން ކަމަށެވެ. އެހެން ނަމަވެސް، އަލުން އެމްޑީޕީ އަށް ވަނުމުގެ ފުރުސަތު ލިބިގެން ދިޔުމުން، ސިޔާސީ ގޮތުން ރަނގަޅު މަސައްކަތެެއް ކުރެވޭނީ އެމްޑީޕީގައި ހުރެގެން ކަމަށް ޤަބޫލު ކުރެވުނު ކަމަށް އާޒިމް ވިދާޅުވި އެވެ. އެމްޑީޕީ އަކީ ވަރަށް ބޮޑު މުއައްސަސާއެއް ކަމަށާއި، އެއީ ރާއްޖޭގައި އޮތް ސިޔާސީ އެންމެ ބޮޑު މުއައްސަސާ ކަމަށް ޤަބޫލު ކުރަން ޖެހޭ ކަމަށް ވެސް އާޒިމް ވަނީ ވިދާޅުވެފަ އެވެ.
އަޅުގަނޑު އަނެއްކާ އެމްޑީޕީ އަށް ވަނުމުގެ ފުރުސަތު ލިބިގެން ދިޔައީމަ އަޅުގަނޑު ހިތަށް އެރީ، މީގެ ތެރޭގައި ހުރެގެންނޭ ކަމެއް ކުރެވޭނީ. ހަގީގަތުގައި އެމްޑީޕީ އަކީ ވަރަށް ބޮޑު އިންސްޓިޓިއުޝަނެއް. އަޅުގަނޑުމެން ޤަބޫލު ކުރަން ޖެހެނީ ދިވެހި ރާއްޖޭގައި އޮތް ސިޔާސީ އެންމެ ބޮޑު އެއް އިންސްޓިޓިއުޝަން އެމްޑީޕީ އަކީ. އެހެންވީމާ އަޅުގަނޑު އަބަދު ވެސް ލޯބިވާ ތަނެއް، އަބަދު ވެސް ހުންނަން ބޭނުންވާ ތަނެއް. ތަނެއްގެ ތެރޭގައި ހުރި ނަމަވެސް، އެތަނެއް ގޯސްކޮށް ދާ ނަމަ އަޅުގަނޑު ބަސް ބުނާނަން.އަލީ އާޒިމް / މެދު ހެންވޭރު ދާއިރާގެ ކުރީގެ މެމްބަރު
މީގެ އިތުރުން އާޒިމް ވަނީ އަލުން އެމްޑީޕީ އަށް ގުޅިވަޑައިގަންނަވާކަން ކަށަވަރުކޮށްދެއްވައިފަ އެވެ. އެގޮތުން އަލުން އެމްޑީޕީ އަށް ސޮއި ކުރުމުގެ މަސައްކަތް ކުރިއަށް ދާ ކަމަށާއި، އާދީއްތަ ދުވަހު ނުވަތަ ހޯމަ ދުވަހުގެ ވަގުތެއްގައި އެކަން ފުރިހަމަ ވެގެންދާނެ ކަމަށް އާޒިމް ވަނީ ވިދާޅުވެފަ އެވެ. އެމްޑީޕީ އަށް ބަދަލުވުމަށްޓަކައި އާޒިމް ވަނީ ހޮނިހިރު ދުވަހު ދަ ޑިމޮކްރަޓްސް އިން އިސްތިއުފާ ވެސް ދެއްވައިފަ އެވެ.
ނިމިދިޔަ 19 ވަނަ ރައްޔިތުންގެ މަޖިލީހުގައި މެދު ހެންވޭރު ދާއިރާގެ މެމްބަރުކަން ވެސް ކުރެއްވި އާޒިމް ވަނީ، އެ ދައުރުގައި އެމްޑީޕީގެ ޕާލިމެންޓަރީ ގުރޫޕު (ޕީޖީ) ލީޑަރުކަން ވެސް ކުރައްވައިފަ އެވެ. މެދު ހެންވޭރު ދާއިރާގެ މެމްބަރު ކަމުގައި އާޒިމް ވަނީ ތިން ދައުރު ފުރިހަމަ ކުރައްވައިފަ އެވެ. އެމްޑީޕީގެ ތެރޭގައި އުފެދިގެން އައި ދެބައިވުމުގެ ތެރޭގައި އާޒިމް ވެސް ވަނީ ޑިމޮކްރަޓްސް އަށް ސޮއި ކުރައްވައިފަ އެވެ.
