ވޯލްޑް ފުޑް ޕްރޮގްމް (ޑަބްލިޔުއެފްޕީ) އިން ޣައްޒާގައި ހާލުގައި ޖެހިފައިވާ ފަލަސްތީނު މީހުންނަށް ފޮނުވި އެހީގެ ގާފިލާ އަކަށް އިސްރާއީލު ސިފައިން ބަޑި ޖަހާ ހުއްޓުވައިފިއެވެ.

ޖެނުއަރީ 5 ވަނަ ދުވަހު މި ހާދިސާ ހިނގީ ޣައްޒާގެ މެދުތެރޭގައި ހުންނަ ވާދީ ޣައްޒާ ކައިރީގައި ހުރި އަސްކަރީ ޗެކްޕޮއިންޓެއްގައެވެ.

ޑަބްލިއުއެފްޕީން ނެރުނު ނޫސްބަޔާނެއްގައި ބުނެފައިވަނީ މި ބިރުވެރި ހަމަލާއިން އެ ފަރާތުގެ މުވައްޒަފުންގެ ފުރާނައަށް ނުރައްކާވެ، އުޅަނދުތައް ހުއްޓުމަކަށް އައިސްފައިވާ ކަމަށެވެ. މަދުވެގެން 16 ވަޒަން އުޅަނދުތަކަށް ޖަހާފައިވާ ކަމަށް ބަޔާނުގައި ބުނެއެވެ. ޑަބްލިއުއެފްޕީން ބުނެފައިވަނީ އެހީގެ ގާފިލާ ދަތުރު ކުރަމުން ދިޔައީ އިސްރާއީލުގެ ފަރާތުން ބޭނުންވާ ހުރިހާ ހުއްދައެއް ލިބިގެން ކަމަށެވެ. އެހީ ހިފައިގެން ދަތުރުކުރި ތިން އުޅަނދުގައި 8 މުވައްޒަފުން ތިބި ކަމަށާއި، ހަމަލާ ދިނީ ގަސްދުގައި ކަމަށްވެސް ޑަބްލިއުއެފްޕީން ބުނެފައިވެއެވެ.

މި ހާދިސާ ގައި އެއްވެސް މީހަކަށް އަނިޔާވެފައި ނުވި ނަމަވެސް، މިކަމުން ދައްކައިދެނީ ޣައްޒާ އަށް އެހީ ފޯރުކޮށްދިނުމަށް ޑަބްލިއުއެފްޕީ އާއި އެހެން ޖަމާއަތްތަކުން މަސައްކަތް ކުރަން ޖެހޭ ދަތި ބިރުވެރި ހާލަތު އޮތް ގޮތް ކަމަށް އެ ޖަމްއިއްޔާގެ ބަޔާނުގައި ވެއެވެ.

ޑަބްލިއުއެފްޕީ ގެ ބަޔާނުގައި އިންސާނުންގެ ފުރާނަ ސަލާމަތްކުރުމަށް ކުރެވޭ އިންސާނީ އެހީތެރިކަން ފޯރުކޮށް ދިނުމުގެ މަސައްކަތް ކުރިއަށް ގެންދިއުމަށްޓަކައި ޣައްޒާގެ ސަލާމަތީ ހާލަތު ރަނގަޅުކުރުމުގެ މުހިންމުކަން ވަނީ ފާހަގަ ކޮށްފައެވެ.

އދ.ގެ އެޖެންސީ އެއް ކަމަށްވާ ޑަބްލިއުއެފްޕީން އެންމެހާ ފަރާތްތަކަށް ގޮވާލާފައިވަނީ ބައިނަލްއަޤްވާމީ އިންސާނީ ޤާނޫނަށް އިޙްތިރާމްކޮށް، އާންމު ރައްޔިތުންގެ ފުރާނަ ރައްކާތެރިކޮށް، އިންސާނީ އެހީ ރައްކާތެރިކަމާއެކު ފޯރުކޮށްދިނުމަށް މަގުފަހިކޮށްދިނުމަށެވެ.

އިސްރާއީލުން މީގެ ކުރިން ވެސް އެތައް ފަހަރެއްގެ މަތިން ޣައްޒާ އަށް އެހީ ފޯރުކޮށް ދިނުމަށް ހުރަސް އަޅާފައިވެއެވެ.