ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ)ގެ މެމްބަރުން ޕީޕަލްސް ނޭޝަނަލް ކޮންގްރެސް އަށް ވެއްދުމަށް ވަގު ފޯރމްތަކެއް ހުށަހަޅާފައިވާތީ އެކަމާއި ގުޅޭ ކަންބޮޑުވުންތައް އިލެކްޝަންސް ކޮމިޝަނާއި އެމްޑީޕީން ހިއްސާކޮށްފިއެވެ.
އެ ބައްދަލުވުން ބޭއްވީ ހޯމަ ދުވަހުގެ މެންދުރުގެ ވަގުތެއްގައެވެ.
އެ ބައްދަލުވުމަށް ފަހު ރާއްޖެ އެމްވީ އަށް މައުލޫމާތުދެއްވަމުން، އެމްޑީޕީގެ ތަރުޖަމާން އަނަސް އަބްދުއް ސައްތާރު ވިދާޅުވީ ވަގު ފޯރމް ހުށަހަޅާފައިވާތީ ޕީއެންސީގެ ފޯރމްތައް ޕްރޮސެސްކުރުން ހުއްޓުވާދޭން އެމްޑީޕީން އީސީގައި އެދިފައިވާނެ ކަމަށެވެ.
އަނަސް ވިދާޅުވީ އެމްޑީޕީގެ ދަފްތަރުގައި ތިބި މެމްބަރުންނަށް ވަގަށް އެހެނިހެން ސިޔާސީ ޕާޓީތަކުގެ ދަފްތަރުގައި ހިމަނަމުން މައްސަލަ ފެންމަތިވެފައިވާ ކަމަށެވެ. ވަކިން ހާއްސަކޮށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދަފްތަރުގައި ހިމަނަމުންދާކަމުގެ ގިނަ ޝަކުވާތަކެއް އެ ޕާޓީއަށް ވަނީ ލިބިފައިވާ ކަމަށް އޭނާ ވިދާޅުވިއެވެ. އެމްޑީޕީގެ އިތުރުން އެހެން ޕާޓީތަކުގެ މެމްބަރުން ވެސް ޕީއެންސީ އަށް އުސޫލާއި ޚިލާފަށް ވައްދާފައިވާ ކަމަށް އަނަސް ފާހަގަކުރެއްވިއެވެ. އާދިއްތަ ދުވަހު ބޭއްވި ބައްދަލުކުރެއްވުމުގައި އެކަންކަން އިލެކްޝަންސް ކޮމިޝަންގެ ސަމާލުކަމަށް ގެނެސްފައިވާނެ ކަމަށް އަނަސް ވަނީ ވިދާޅުވެފައެވެ.
އަނަސް ވިދާޅުވީ ޕީއެންސީއަށް ވަނުމަށް ފޯމު ފުރާފައި ނުވާ މި ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާ މައްސަލަ ފާހަގަކުރެވިފައިވާކަމަށެވެ. އެކަން ހަރުކަށި އިބާރާތުން ކުށްވެރި ކުރާ ކަަމަށާއި ވަކިވަކިން ފޯރމްތައް ބެލުމަށް ފަހު ނޫނީ ޕީއެންސީގެ ފޯރމްތައް ޕްރޮސެސްކޮށް ނުދިނުމަށް އެދިވަޑައިގެންފައިވާނެ ކަމަށް އަނަސް ވިދާޅުވިއެވެ. އަނަސް ވިދާޅުވި މި މައްސަލަތައް ދިމާވާކަން އެނގުނީ ޕާޓީގެ މެމްބަރުންގެ ނަން ކުއްލިއަކަށް ޕާޓީއަށް އުނިވުމުން އެކަންކަން އިތުރަށް ބެލި ބެލުމުން ކަމަށެވެ.
ފޯރމްތައް ބެލި އިރު އެނގުނީ ވަގު ފޯރމްކަން މިއީ. އައިޑީކާޑު ނަމްބަރުގަ އެހެން މީހެއްގެ ފޮޓޯގަ އަޅުގަމޑުމެންގެ ގައުމީ މަޖިލިސް މެމްބަރު ތޯރިގް ހުށަހެޅީ. ގައުމީ މަޖިލީހުގެ އެހެން މެމްބަރުންވެސް އެބަ ހިމެނޭ. ވަގު ފޯރމް ހުށަހަޅައިގެން މެމްބަރޝިޕް ގެއްލުވާލި މީހުން އެބަ ބަަލަން. ކަންބޮޑުވުން އީސީ އާ ހިއްސާކުރަން އައީ. މިކަން ކުރަނީ ކޮންބައެއްކަން އެބަ އެނގޭ. އަޅުގަނޑުމެން މިކަހަލަ ކަންކަމެއް ނުކުރަން. އެއްވެސް ޕާޓީއަކަށް ނިސްބަތްނުވާ މީހުންގެ ވަގު ފިންގަރޕްރިންޓް އެބަޖަހާ، ޖަހައިގެން އެބަ ފުރާ ފޯރމްތައް. ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރުމުން، މުޅި ނިޒާމް ގަޑުބަޑުވާނީ.އެމްޑީޕީގެ ތަރުޖަމާން އަނަސް އަބްދުއް ސައްތާރު
އަނަސް ވިދާޅުވީ ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ޕީއެންސީއަށް އެއް ލައްކަ މެމްބަރުން ހަމަކުރަން ކަމަށް ބުނެ މީހުންގެ ސޮއި ފޯޖުކޮށްގެން އިލެކްޝަންސް ކޮމިޝަނަށް ފޯމު ހުށަހަޅާފައިވާކަން މިކަމުން އެނގޭ ކަމަށެވެ. ދައުލަތުގެ ހުރިހާ އިދާރާއަކަށް ނުފޫޒު ފޯރުވައިގެން މިފަދަ ކަންކަން ކުރުމަކީ ބަލައިގަނެވޭ ކަމެއް ނޫން ކަމަށް އަނަސް ވިދާޅުވިއެވެ.
އޮޅުވާލައިގެން ފޯރމް ހުށަހަޅައިގެން ޕީއެންސީ އަށް ވެއްދި މީހުންގެ ތެރޭގައި މަނަދޫ ދާއިރާގެ ކުރީގެ މެމްބަރު މުހައްމަދު ތޯރިގް ހިމެނިވަޑައިގަންނަވައެވެ. ހޯމަ ދުވަހުގެ ބައްދަލުކުރެއްވުމުގައި އޭނާވެސް ވަނީ ބައިވެރިވެވަޑައިގަންނަވާފައެވެ. ރާއްޖެއެމްވީ އަށް މައުލޫމާތުދެއްވަމުން ތޯރިގް ވިދާޅުވީ އޭނާގެ ފޯރމް ހުށަހެޅީ އެހެން މީހެއްގެ ފޮޓޯ ބޭނުންކޮށްގެން ކަމަށެވެ. އަދި އެ ފޯމްގައި ޖަހާފައި ވަނީ އެހެން މީހެއްގެ ފޮޓޯ ކަމަށް ވެސް އޭނާ ވިދާޅުވިއެވެ. މީގެ އިތުރުން ފޯރމްގައި ހިމަނާފައިވާ ފޯނު ނަމްބަރަކީ ވެސް ނުބައި ނަމްބަރެއް ކަމަށް އޭނާ ވިދާޅުވިއެވެ. އެހެންކަމުން އެކަމުގައި ގޯސްތަކެއް ހެދިފައިވާކަން އީސީން ވެސް ޤަބޫލުކުރާ ކަމަށް ތޯރިގް ފާހަގަކުރެއްވިއެވެ.
މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ވެރިކަން ކުރާ ޕީއެންސީއަށް ފޯމު ފުރާ މައްސަލަ ބެލުމަށް އެމްޑީޕިން ވަނީ މީގެ ކުރިން ވެސް ގޮވާލާފައެވެ. އެގޮތުން އެމްޑީޕީގެ ދަފްތަރުގައި ތިބި މެމްބަރުން ވަގަށް އެހެނިހެން ޕާޓީތަކުގެ ދަފްތަރުގައި ހިމެނުން އެ ޕާޓީން ވަނީ ކުށްވެރިކޮށްފައެވެ.
މިފަދަ ގިނަ މައްސަލަތަކެއް ތިލަވެފައިވާއިރު ސިޔާސީ ޕާޓީތަކަށް މީހުން ވެއްދުމާއި ވަކިކުރުމަށް މިހާރު ކަނޑައަޅާފައިވާ އުސޫލުތަކާއި އިޖުރާއަތްތައް އިތުރަށް ހަރުދަނާކޮށް ވަގު ފޯމު ފުރައިގެން ޕީއެންސީގެ ދަފްތަރަށް މީހުން އިތުރުކުރަން ހުރި ދޮރުތައް ބަންދުކުރުމަށް އިލެކްޝަން ކޮމިޝަނަށް އެމްޑީޕީން ވަނީ ގޮވާލާފައެވެ.
