އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ޔުނައިޓެޑަށް ލަދުވެތި ނަތީޖާއަކާ ކުރިމަތިލާން ޖެހިއްޖެ އެވެ.

ޔުނައިޓެޑުގެ އަމިއްލަ ދަނޑުގައި ހޯމަ ދުވަހުގެ ކުޅުނު މެޗުން އެ ޓީމު ބަލިވީ 2-0 އިންނެވެ. މެޗުގައި ނިއުކާސަލް އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗު ފަށައިގެން ހަތަރު ވަނަ މިނެޓުގައި ނިއުކާސަލަށް ލީޑު ނަގައިދިނީ އެލެގްޒެންޑާ އިސާކް އެވެ. އޭގެ ފަހުން މެޗުގެ 19 ވަނަ މިނެޓުގައި ނިއުކާސަލްގެ ދެ ވަނަ ލަނޑެއް ޖަހައި ލީޑު ފުޅާ ކޮށްދިނީ ޖޮއިލަންޓަން އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެންތަނީ ގޯޑަން އެވެ.

އަމިއްލަ ދަނޑުގައި ނިއުކާސަލް އަތުން ޔުނައިޓެޑު ބަލިވެފައިވާއިރު، މިއީ 45 އަހަރުގެ ތެރޭގައި ޔުނައިޓެޑުގެ އަމިއްލަ ދަނޑުގައި ޖެހި ޖެހިގެން ތިން މެޗުން ބަލިވި ފުރަތަމަ ފަހަރެވެ. ޑިސެމްބަރު މަހުގެ ހަތް ވަނަ ދުވަހު ނޮޓިންހަމް ފޮރެސްޓާ ދެކޮޅަށް ކުޅުނު މެޗުން ޔުނައިޓެޑު ބަލިވެފައިވާއިރު، ޑިސެމްބަރު މަހުގެ 22 ވަނަ ދުވަހު އަމިއްލަ ދަނޑުގައި ބޯންމައުތު އަތުން ވެސް ވަނީ ބަލިވެފަ އެވެ. ލީގު ތާވަލްގެ 14 ވަނައިގައި ޔުނައިޓެޑު އޮތީ 19 މެޗުން 22 ޕޮއިންޓާ އެކު އެވެ. މި ސީޒަންގެ ލީގުގައި ނުވަ މެޗަކުން ޔުނައިޓެޑު ވަނީ ބަލިވެފަ އެވެ.