އިނގިރޭސި ޕްރިމިއާ ލީގުގައި ލެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މެންޗެސްޓަރ ސިޓީން ހަމަޖެހުމެއް ހޯދައިފި އެވެ.

ލެސްޓަރގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗުން ސިޓީ މޮޅުވީ 2-0 އިންނެވެ. މެޗުގެ ފުރަތަމަ ހާފުގައި ސިޓީން އެއް ލަނޑު ޖެހިއިރު، ދެ ވަނަ ހާފުގައި ވަނީ އަނެއް ލަނޑު ޖަހައިފަ އެވެ. އެ މެޗާ ކުރިމަތިލީއިރު ސިޓީގެ ނަތީޖާތައް އިންތިހާ އަށް ދަށްވުމުގެ ސަބަބުން އެ ޓީމު އޮތީ ޕްްރެޝަރުގަ އެވެ. އެގޮތުން އެންމެ ފަހުން ސިޓީ ކުޅުނު 14 މެޗުގެ ތެރެއިން އެ ޓީމު މޮޅުވީ ދެ މެޗުންނެވެ. ނުވަ މެޗަކުން ސިޓީ ވަނީ ބަލިވެފަ އެވެ.

ލެސްޓަރއާ ދެކޮޅަަށް ކުޅުނު މެޗުގައި ސިޓީން ލަނޑު ޖަހައި ލީޑު ނެގީ ފުރަތަމަ ހާފުގެ 21 ވަނަ މިނެޓުގަ އެވެ. އެ ލަނޑު ސިޓީ އަށް ޖަހައިދިނީ ސަވީނިއޯ އެވެ. ދެ ވަނަ ހާފުގައި ސިޓީގެ ދެ ވަނަ ލަނޑު ޖެހީ ނޯވޭގެ ފޯވާޑު އާލިން ހާލަންޑު އެވެ. މެޗުގެ 74 ވަނަ މިނެޓުގައި ހާލަންޑު އެ ލަނޑު ޖެހީ ސަވީނިއޯ ތަނަވަސްކޮށްދިން ފުރުސަތެއްގަ އެވެ.

މޮޅާއެކު ސިޓީން ވަނީ ލީގު ތާވަލްގެ ފަސް ވަނަ މަގާމަށް ޖެހިލައިފަ އެވެ. މިހާތަނަށް ލީގުގައި ސިޓީން 19 މެޗު ކުޅެފައިވާއިރު، މޮޅުވެފައި ވަނީ ނުވަ މެޗުންނެވެ. ހަ މެޗުން ބަލިވެފައިވާއިރު، ހަތަރު މެޗުން ވަނީ އެއްވަރުވެފަ އެވެ. ލީގު ތާވަލްގެ ފަސް ވަނައިގައި ސިޓީ އޮތީ 31 ޕޮއިންޓާ އެކު އެވެ. ތާވަލްގެ ހަތަރު ވަނައިގައި އޮތް ޗެލްސީ އާއި ސިޓީއާ ދެމެދު އޮތީ ހަތަރު ޕޮއިންޓުގެ ފަރަގެކެވެ.