މިހާރު މި އޮތް ރައީސް ޑރ. މުހައްމަދު މުއިއްޒުގެ ވެރިކަމަށް އެއް އަހަރު ފުރިގެން ދިއައިރު، އެ އެއް އަހަރު ދުވަސްތެރޭގައި ފެނިގެން ދިއައީ ހަމަ އެކަނި ވައްކަމާއި، ކަރަޕްޝަނާއި ހިޔާނާތް ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
މި ސަރުކާރުގެ ވައްކަމާއި ކަރަޕްޝަނާއި ގުޅޭގޮތުން ބުރާސްފަތި ދުވަހުގެ ރޭ ރާއްޖެ ޓީވީން ގެނެެސްދިން " ފަލަ ސުރުޚީ" ޕްރޮގްރާމުގައި ވާހަކަދައްކަވަމުން މެމްބަރު ސަމީރު ވިދަޅުވީ މިހާރުގެ ރައީސް ޑރ، މުހައްމަދު މުއިއްޒަށް ރާއްޖޭގެ ރައްޔިތުން ވެރިކަން ދިނީ ވަރަށް ފޮނި އުންމީދުތަކަކާއި އެކުގައި ކަމަށާއި ނަމަވެސް، މި ވެރިކަމަށް އައިސް، މި ވޭތުވެ ދިއަ އެއް އަހަރު ދުވަހުގެ ތެރޭގައި ތަރައްޤީއެއް، ނުވަތަ ރައްޔިތެއްގެ ހިތައް ތަސައްލީއެއް ނުވަތަ ރައްޔިތެއްގެ ހިތައް ލުޔެއް ލިބޭނޭ އެއްވެސް ކަމެއް މި ސަރުކާރުން ކޮށްފައި ނުވާކަމަށެވެ.
ސަމީރު ވިދާޅުވީ ރައްޔިތުން މި ސަރުކާރާއި މެދު ކުރަމުން އައި ފޮނި އުންމީދުތަކުގެ ބަދަލުގައި، ވޭތުވެ ދިޔަ އެއް އަހަރު ދުވަހުގެ ތެރޭގައި ފެނިގެން ދިއައީ ހަމަ އެކަނި ވައްކަމާއި، ކަރަޕްޝަނާއި ހިޔާނާތުގެ މަސައްކަތް ކަމަށެވެ. އަދި ހަމަ އެކަނި އެޗްޑީސީ އަށް ބަލާލި ނަމަވެސް މިކަން ވަރަށް ރަނގަޅަށް ހާމަވެގެން ދާ ކަމަށް ސަމީރު ވިދާޅުވިއެވެ.
އެޗްޑީސީގެ ބޮޑު ވައްކަމުގެ މައްސަލައަށް އަލިއަޅުވާލައްވަމުން ސަމީރު ވިދާޅުވީ މި އުޅެނީ އެ ތަނަކާއި ހަވާލުވާ ވެރިއެއްގެ މައްސަލައެއް ނޫން ކަމަށާއި މި އުޅެނީ ސިސްޓަމުގެ މައްސަލައެއް ކަމަށެވެ. އަދި މި ސިސްޓަމް ރަނގަޅު ކުރުމައްޓަކައި މީގެން އެއްވެސް ފަރާތަކުން އެއްވެސް މަސައްކަތެއް ނުކުރާކަމަށް ސަމީރު ވިދަޅުވިއެވެ.
ސަމީރު ވިދާޅުވީ އޭރު އެޗްޑީސީއާއި ހަވާލުވެ ހުންނެވި ފަރާތުން އެތަނުގައި ހިނގަމުން ދިއަ ކޮރަމަޝަނާއި ހިޔާނާތުގެ މައްސަލަތައް ބަޔާންކޮށް ފޮނުވި ސިޓީ ނުލިބޭކަމަށް ރައީސް މުއިއްޒު ވިދާޅުވީމަ އެކަމާއި ހިތާމަކުރައްވާ ކަމަށެވެ. އަދި އެނގިލައްވާފައިވާ ގޮތުގައި އެ ސިޓީ ހަމަ އެކަނި ރައީސް އޮފީހަށް ހުށަހެޅީކީވެސް ނޫން ކަމަށާއި ވަޓްސްއެޕުން ވެސް އެ ސިޓީ ރައީސްއަށް ފޮނުވިކަމުގެ މައުލޫމާތު ލިބިފައިވާ ކަމަށް ސަމީރު ވިދާޅުވިއެވެ.
މިއުޅެނީކީ އެތަނުގައި ހުންނަ މީހެއްގެ މައްސަލައެއް ނޫން. މިއުޅެނީ ސިސްޓަމުގެ މައްސަލައެއް. މި ސިސްޓަމް ރަނގަޅުކުރުމަޓަކައި އެއްސް މަސައްކަތެއް ނުކުރޭ. އަޅުގަނޑު ހަމަ ހިތާމަކުރަން، ރައީސް މުއިއްޒު އެބަ ވިދާޅުވޭ ތިމަންނައަށް އެއްގޮތަކައްވެސް އެނގި ނުލައްވައޭ އޭރު އެޗްޑިސީ އާއި ހަވާލުވެ ހުންނެވި ބޭފުޅާ ސިޓީއެއް ދިންކަމެއް. އެކަމް އަޅުގަނޑުމެން ދެކޭ ގޮތުގަ. އަޅުގަނޑުމެނަސް މައުލޫމާތު ލިބުނު ގޮތުގަ، އެ ސިޓީ ރައީސް އޮފީހަށް ހަމައެކަނި ހުށަހެޅީކީވެސް ނޫން އޭގެ އިތުރުން ވަޓްސްއެޕް ވެސް ކުރި،"މެމްބަރު ސަމީރު
މީގެ އިތުރުން ސަމީރު ވިދާޅުވީ ސިޓީ ފޮނުއްވި ބޭފުޅާ ވަޓްސްއެޕް ކުރެއްވުމުގެ އިތުރުން ސިޓީ ފޮނުއްވިކަމަށް ރައީސް އަށް "ޓެކްސްޓް" ވެސް ފޮނުއްވިކަމަށް މައުލޫމާތު ލިބޭ ކަމަށެވެ. އަދި މިފަދަ ބޮޑެތި ކަރަޕްޝަނާއި ހިޔާނާތާއި ބޮޑެތި ވައްކަންތައް ކުރަމުން ގެންދާއިރު ގައުމުގައި މި ހިނގާ އެއްވެސް ކަމެއް އެނގިވަޑައި ނުގަންނަވާކަމަށް ވިދަޅުވުމަކީ ކަންބޮޑުވާ ކަމެއްކަމަށް ވެސް ސަމީރު ވިދާޅުވިއެވެ. އަދި ރައީސަށް ގައުމުގައި މި ހިނގާ ކަންކަން އެނގޭނޭ ގޮތަކަށް ކަންކަން ކުރަން އެބަޖެހޭ ކަމަށް ވެސް ސަމިރު ވިދާޅުވިއެވެ.
ބިންވެރިޔާ ސްކީމަށް ޝަރުތު ހަމަނުވާ ބަޔަކަށް ހުޅުމާލެއިން ބިންތަކެއް އެޗްޑީސީން ދިން ކަމަށް ބުނާ މައްސަލަ އާއި ވިނަރެސް ފްލެޓް ދިނުމުގައި ކޮރަޕްޝަންގެ އަމަލުތަކެއް ހިންގި ކަމަށް ބުނާ މައްސަލަ އާއި ގެދޮރުވެރިޔާގެ ސްކީމްގެ ދަށުން ފްލެޓު ދިނުމުގައި ބޮޑެތި އޮޅުވާލުންތަކެއް ހުރި ކަމަށް ތުހުމަތުކުރެވޭ މައްސަލަ ފުލުހުންނާއި އޭސީސީން ވެސް އަންނަނީ ތަހުގީގުކުރަމުންނެވެ
ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ ކުރީގެ އެމްޑީ ފަޒުލްގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ވަނީ ގޯތީގެ ރެޖިސްޓްރީއެއް ހަދައިފަ އެވެ. އޭނާގެ އިތުރުން އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ވަނީ ފަޅާއަރައިފަ އެވެ. ފަޒުލް ވެސް ވަނީ އެ މަގާމުން ސަސްޕެންޑް ކޮށްފަ އެވެ. އަދި އޭގެ ދުވަސްކޮޅެއް ފަހުން އޭނާ ވަނީ މަގާމުން އިސްތިއުފާ ވެސް ދީފައެވެ.
އެޗްޑީސީގެ ވަގު ގޯތީގެ މި މައްސަލަތައް ފުލުހުންނާއި އޭސީސީން މިހާރު ދަނީ ތަހުގީގު ކުރަމުންނެވެ.
