2 މިލިއަން ފަތުރުވެރިން ރާއްޖެއައިސްފިއެވެ.
ބުރާސްފަތި ދުވަހު ރާއްޖެއަށް މިއަހަރުގެ ދެ މިލިއަން ވަނަ ފަތުރުވެރިޔާ އައުމާއެކު 2024 ވަނަ އަހަރަކީ ފަތުރުވެރިން ޒިޔާރަތްކުރި އަދަދުގެ ގޮތުން ދިވެހި ފަތުރުވެރިކަމުގެ ތާރީޚުގައި ރެކޯޑު އަހަރަކަށް މިވަނީ ވެފައެވެ.
ދެ މިލިއަން ވަނަ ފަތުރުވެރިޔާއަކީ އޭނާގެ ފިރިމީހާއާއި ދެ ދަރިންނާއެކު ޗުއްޓީ ހޭދަކުރުމަށް އައީ އޮސްޓްރިއާގެ އަންހެނެކެވެ. ބުރާސްފަތި ދުވަހުގެ ހެނދުނު ވެލާނާ އިންޓަރނޭޝަނަލް އެއަރޕޯޓަށް (ވީއައިއޭ) އިން އޭނާއަށް ހޫނު މަރުޙަބާއެއް ކިޔާފައިވެއެވެ.
އޭނާއަށް މަރުޙަބާ ދެންނެވީ ޓޫރިޒަމް މިނިސްޓަރ އިބްރާހީމް ފައިޞަލެވެ.
މިއަހަރުގެ ދެ މިލިއަން ވަނަ ފަތުރުވެރިޔާގެ ގޮތުގައި، އޭނާއަށް ސާއީ ލެގޫން މޯލްޑިވްސް، ކިއުރިއޯ ކަލެކްޝަން ބައި ހިލްޓަންގެ އިނާމެއްގެ ގޮތުގައި 6 ދުވަހުގެ ޗުއްޓީއެއް ލިބިފައިވެއެވެ. އަދި މީގެ އިތުރުން މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އިމިގްރޭޝަން އަދި ކަސްޓަމްސްއިން ހަދިޔާތަކެއް ދީފައިވެއެވެ.
