ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު އަށް ވަގަން ދިން ގޯތީގައި އިންފާރު ރާނާފައި ހުއްޓާ ނޫސްވެރިންނަށް ފެނިއްޖެއެވެ.

އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދުގެ ބޭބެ މުޙައްމަދު ފަޒީލް ރަޝީދަށް ވަގަށް ދިން ގޯތި ވެރިފައި ކުރަން ހައުސިން މިނިސްޓްރީއަށް ފޮނުވީ އިންފާރު ރާނަން ހުއްދަ ވެސް ދީފަ ކަން ބުދަ ދުވަހުގެރޭ އެޗްޑީސީން ބޭއްވި ނޫސްވެރިންގެ ބައްދަލުވުމުގައި، ފާޒުލްގެ ވާހަކައިން ވަނީ ފަޅާ އަރާފައެވެ.

މި ނޫސްވެރިންގެ ބައްދަލުވުމަށްފަހު، ބައެއް ނޫސްވެރިން ވަނީ، ހައުސިން މިނިސްޓަރު ޑރ. އަލީ ހައިދަރަށް ފޮނުވާފައިވާ ސިޓީގައި އެ ބުނާ ހުޅުމާލެ ލޮޓް ނަންބަރު 20768, 1250 އަކަފޫޓުގެ ގޯތި ދީފައިވާ ސަރަހައްދަށް ގޮސްފައެވެ. އެ ބުނާ ގޯތީގައި ވަށާ ފާރު ރާނާފައިވާތަން ފެންނަ ހުރި، ބުދަ ދުވަހުގެ ނޫސްވެރިންގެ ބައްދަލުވުމުގައި ފަޒުލް ވަނީ ވަރަށް ބޮޑަށް އެކަން ދިފާއުކޮށް ވާހަކަ ދައްކަވަން މަސައްކަތް ކުރައްވާފައެވެ.

ބުދަ ދުވަހުގެ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ފަޒުލް ވަރަށް ސާފުކޮށް ވިދާޅުވީ، އިންފާރަު ރާނާފައި ނުވާ ކަމަށެވެ.

"ޕާމިޓް އެއީ އަޅުގަނޑުމެންނަށް ހައިލައިޓްވި ހިސާބަކީ، ފާރު ރާނާފަކާ އެއް ނޫން ހުރީކީ. ޕާމިޓް ދެވިފައި އޮތީ، ކެންސަލްކުރީ ދެފަރާތަކަށް" ފަޒުލް ވިދާޅުވިއެވެ.

އެޗްޑީސީ ތެރޭގައި ހިނގައި އެއްވެސް ކަމެއް އޭނާ އަށް ނޭނގި ނުހިގާނެ ކަމަށެވެ. ނަމަވެސް ފަޒުލްގެ ބޭބެ ފަޒީލް އަށް ގޯއްޗެއްދީ އިންފާރު ރާނަން ހުއްދަ ދިން އިރު އެއީ ފަޒުލްގެ ބޭބެކަން އެނގިލައްވާތޯ، ރާއްޖެޓީވީން ސުވަލުކުރުމުން، ފަޒުލް ވިދާޅުވީ "ނޭނގޭ" ކަމަށެވެ.

ހުޅުމާލެއިން ވަގަށް ގޯތިތަކެއް ދިން މައްސަލަ ފެންމަތިވެ ރައްޔިތުންގެ މެދުގައި ނުތަނަވަސްކަން އުފެދުމުން ފަޒުލް ބުދަ ދުވަހުގެ ރޭ ކުއްލި ގޮތަކަށް ބޭއްވި މި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ސާފު ބަހުން ޖަވާބު ދިނުމުގެ ބަދަލުގައި ފަޒުލް އުޅުއްވީ އޮޅުވާލައްވައިގެން ސުވާލުން ރެކުމަށެވެ. ނޫސްވެރިން ވަނީ ސުވާލަށް ޖަވާބު ނުލިބޭ ކަމަށް ބުނެ ހިތްހަމަ ނުޖެހުން ފާޅު ކޮށްފައެވެ.