ހައުސިންގ ޑިވެލޮޕްމަންޓު ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދުގެ ބޭބެ މުޙައްމަދު ފަޒީލް ރަޝީދަށް ވަގަށް ދިން ގޯތި ވެރިފައި ކުރަން ހައުސިން މިނިސްޓްރީއަށް ފޮނުވީ އިންފާރު ރާނަން ހުއްދަ ވެސް ދީފަ ކަން ފާޒުލްގެ ވާހައިން ފަޅާ އަރައިފިއެވެ.
ހުޅުމާލެއިން ވަގަށް ގޯތިތަކެއް ދޫކޮށްގެން އުޅޭ މައްސަލައެއް ފެންމަތިވުމާ ގުޅިގެން، އެކަން ތަހުގީގު ކުރުމަށް ކަމަށް ބުނެ ފުލުހުން ވެސް ވަނީ ބުދަ ދުވަހުގެ ވަގުތެއްގައި އެޗްޑީސީ އަށް ވަދެފައެވެ.
ވަގަށް ގޯތި ދިން ފަރާތްތަކުގެ ތެރޭގައި އެޗްޑީސީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދު ހިމެނޭ ކަން ފަޅާ އެރުމާ ގުޅިގެން، އެކަން ދިފާއުކޮށް ބުދަ ދުވަހުގެ ރޭ އެޗްޑީސީން ބޭއްވި ނޫސްވެރިންގެ ބައްދަލުވުމުގައި، ރާއްޖެޓީވީން ކުރި ސުވާލަކަށް ޖަވާބުދެއްވަމުން ފަޒުލް ވިދާޅުވީ، އޭނާގެ ބޭބެ އަށް، މުޙައްމަދު ފަޒީލް ވުމަކީ އިއްތިފާގެއް ކަމަށެވެ. އެކަމުގައި އޭނާގެ މައްސަލައެއް ނެތް ކަމަށެވެ.
"ވެރިފިކޭޝަން ޕްރޮސެސް އަޅުގަނޑުމެން ކުރިއަށް އިނީޝިއޭޓް ކޮށްފަ އިންނާނީ،" ފަޒުލް ވިދާޅުވިއެވެ.
ހައުސިންގ މިނިސްޓްރީން ވެރިފިކޭޝަން ލިބުމުގެ ކުރިން ފަޒުލްގެ ބޭބެ ފަޒީލް އަށް ގޯއްޗެއްދީ އިންފާރު ރާނަން ހުއްދަ ދިން އިރު އެއީ ފަޒުލްގެ ބޭބެކަން އެނގިލައްވާތޯ، ރާއްޖެޓީވީން ސުވަލުކުރުމުން، ފަޒުލް ވިދާޅުވީ "ނޭނގޭ ކަމެއެވެ. ވެރިފައި ނުކޮށް ހުއްދަ ދިނީ ކީއްވެތޯ ރާއްޖެޓީވީން ތަކުރާރުކޮށް ސުވާލު ކުރުމުން ފަޒުލް ވަނީ ސުވާލުގެ ޖަވާުބުގެ މިސްރާބު ބަދަލުކޮށްލަން މަސައްކަތް ކޮށްފައެވެ.
"ނޫން އަޅުގަނޑަކަށް ނޭނގެ. އަޅުގަނޑެއް ނޫން ހުއްދަ ދިނީކީ. ހުއްދަ ދޭނީ މިތަނުގެ މުނިސިޕަލްއިން. މިތަނުގެ ޕްރޮސެސްއަކީ އޮޓަމޭޓެޑް ޕްރޮސެސް އެއް، މިތަނުގެ މުނިސިޕަލް އަށް އަންނަ ކޮންމެ މައުލޫމާތަކީ އަޅުގަނޑަށް އެނގޭނެ މައުލޫމާތެއް ނޫން" ފަޒުލް ވިދާޅުވިއެވެ.
ފަޒުލް މިހެން ވިދާޅުވި އިރު، މި ނޫސްވެރިންގެ ބައްދަލުވުމުގައި އެހެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން އޭނާ ވިދާޅުވީ، މިތަނުގައި ހިނގައި އެއްވެސް ކަމެއް އޭނާ އަށް ނޭނގި ނުހިގާނެ ކަމަށެވެ.
"އަޅުގަނޑަށް ހީވަނީ މި ދައްކާ ޖަވާބު ސުވާލު، އެސެސް ރަނގަޅަށް ނުކުރައްވަނީ ހެން. މިކަން ހައިލައިޓްވީމަ ސާފުކުރަން ވެގެން މި ފޮނުވަނީ ދެއްތޯ. އެ ފޮނުވާފަ އޭގެ ޖަވާބު ހައުސިންގ ފަރާތުން މިއަންނަނީ" ފަޒުލް ވިދާޅުވިއެވެ.
ހުޅުމާލެއިން ވަގަށް ގޯތިތަކެއް ދިން މައްސަލަ ފެންމަތިވެ ރައްޔިތުންގެ މެދުގައި ނުތަނަވަސްކަން އުފެދުމުން ފަޒުލް ބުދަ ދުވަހުގެ ރޭ ކުއްލި ގޮތަކަށް ބޭއްވި ނޫސް ކޮންފަރެންސް ގައި ނޫސްވެރިން ކުރި ސުވާލުތަކަށް ސާފު ބަހުން ޖަވާބު ދިނުމުގެ ބަދަލުގައި ފަޒުލް އުޅުއްވީ އޮޅުވާލައްވައިގެން ސުވާލުން ރެކުމަށެވެ. ނޫސްވެރިން ވަނީ ސުވާލަށް ޖަވާބު ނުލިބޭ ކަމަށް ބުނެ ހިތްހަމަ ނުޖެހުން ފާޅު ކޮށްފައެވެ.
ފަޅާއަރުވާލި ލިޔެކިއުންތަކުން އިނގޭ ގޮތުގައި އެޗްޑީސީގެ ޑެޕިއުޓީ ޑިރެކްޓަރު އަހުމަދު އައިމަން ސޮއިކުރައްވައި، ހައުސިން މިނިސްޓަރު ޑރ. އަލީ ހައިދަރަށް ފޮނުވާފައިވާ ސިޓީގައި ބުނެފައިވަނީ ހުޅުމާލެ ލޮޓް ނަންބަރު 20768, 1250 އަކަފޫޓުގެ ގޯތި ލިބިފައިވާ ކަމަށް ބުނެ، ދެ ފަރާތަކުން ވަށާފާރު ރޭނުމުގެ ހުއްދަ އަދި ހުށަހަޅާފައިވާ ކަމަށެވެ. އެ ދެމީހުންނަކީ މުހައްމަދު ފަޒީލް ރަޝީދު އަދި އަބްދުލް މަޖީދު މާހިރެވެ. އެހެންކަމުން މި ގޯތި ލިބިފައިވަނީ ކޮން ފަރާތަކަށްކަން އަންގައިދިނުމަށް ސިޓީ ގައި ވަނީ އެދިފައެވެ.
ފަޒީލް އަށް ބިންވެރިޔާ ސްކީމްގެ ދަށުން ނުލިބޭ ބިމެއް ހޯދައިދިނުމަށް މަސައްކަތްކޮށްފައިވާ ކަން ފަޅާއަރާފައިވާއިރު، ހައުސިން މިނިސްޓްރީ އިން އާއްމުކޮށްފައިވާ ލިސްޓުގައި ފަޒީލް ރަޝީދު ބިންވެރިޔާ ސްކީމުގެ ދަށުން ގޯއްޗަށް ޝަރުތުހަމަނުވާކަން ހާމަވެއެވެ. މައުލޫމާތު ލިބިފައިވާ ގޮތުގައި ފަޒްލު ގެ ބޭބެ އަށް ސޯޝަލް ހައުސިންގ ސްކީމުން ކުރިން ވަނީ ފްލެޓް ވެސް ލިބިފައެވެ.
ފަޒުލްއަށް ގިނަ ތުހުމަތުތަކެއް ކުރެވޭއިރު، ގޯތި މައްސަލައިގައި މިހާތަނަށް މި ވައްކަމުގެ ތެރެއިން 50 އާ ގާތްކުރާ އަދަދަކަށް ގޯތިތައް ދޫކޮށްފައިވާ ތުހުމަތުކޮށްފައިވެއެވެ. އަދި ހުޅުމާލެއިން ބިން ވިއްކަމުންދާ އެވަރެޖު ރޭޓުގައި މި ބިންތައް އަގުކުރާއިރު ވިއްކާލި ބިންތަކުގެ އަގު 400 މިލިއަނަށް އަރާ ކަމަށް ހިސާބުތަކުން ދައްކައެވެ.
