މާލޭގެ ޕާކިން ޒޯނެއްގައި ޕާކުކޮށްފައި އޮތް ކާރެއްގައި ރޯކޮށްލި މައްސަލާގައި ހައްޔަރުކުރި ދެމީހުންގެ ބަންދުގެ މުއްދަތު އިތުރުކޮށްފިއެވެ.

ކާރުގައި ރޯކޮށްލި މައްސަލާގައި 28 ނޮވެންބަރު 2024 ވީ ބުރާސްފަތި ދުވަހު ދެ މީހަކު ވަނީ ހައްޔަރުކޮށްފައެވެ.

އެއީ މ. އަރާރަތްކުރި، 35 އަހަރުގެ ޚާލިދު މަހްމޫދު އަދި، އދ. މާމިގިލީ، ބްލޫވިންޑް 31 އަހަރުގެ ހަސަން ނަސީމް އެވެ. އަދި 29 ނޮވެންބަރު 2024 ވީ ހުކުރު ދުވަހު އެމީހުންގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހާފައެވެ. އޭގެފަހުން ބަންދުގެ މުއްދަތު ހަމަވުމާއެކު، 13 ޑިސެންބަރު 2024 ވީ ހުކުރު ދުވަހު ކޯޓަށް ހާޒިރު ކުރުމުން އިތުރަށް 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ.

ކޯޓު އަމުރުގައި ބުނެފައިވަނީ ކާރުގައި ރޯކުރީ ދެބައެއްގެ ދެމެދުގައި ހިނގި ހަމަނުޖެހުމެއްގެ ތެރެއިން ކަމަށް ބެލެވޭ ކަމަށެވެ.

މި މީހުން ބަންދުގައި ބަހައްޓަންޖެހޭ ހާލަތެއްކަމަށް ބަޔާންކޮށްފައި ވަނީ، ކުށްކުރުމުގައި އަމަލީގޮތުން ބައިވެރިވެފައި ވާތީއެވެ.

މި މައްސަލައިގައި ހެކީގެ ގޮތުގައި ފުލުހުން ވަނީ ސީސީޓީވީ ފުޓޭޖް ހުށަހަޅާފައެވެ. އެ ސިސީޓީވީ ފުޓޭޖުން ފެންނަ ގޮތުގައި ދެމީހަކު ވެގެން ކާރުގައި ރޯކޮށްލުމަށްފަހު ދުވެފައި ދާ މަންޒަރު ފެނެއެވެ. މީގެ އިތުރުން އިންޓެލިޖެންސް ރިޕޯޓާއި ހެކިންގެ ބަޔާން ހުށަހަޅާފައެވެ.

މި ހާދިސާގައި ކާރު ބޭނުން ނުކުރެވޭ ވަރަށް ވަނީ އަނދާފައެވެ. އަދި މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.