ރާއްޖޭގެ ރިސޯޓުތަކުގެ މުވައްޒަފުންނަށް ދިވެހި ރުފިޔާއިން މުސާރަ ދޭން ރައީސުލްޖުމްހޫރިއްޔާ ޑރ މުޙައްމަދު މުއިއްޒު މަޖުބޫރު ކުރައްވާ ދުވަހަކީ ރާއްޖޭގެ ވެރިކަން ވައްޓާލާނެ ދުވަސްކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.

"ޤާނޫނުއަސާސީގެ ދިފާއުގައި ރައްޔިތުން" ނަމުގައި ކާނިވާ ސަރަހައްދުގައި އެމްޑީޕީން ބޭއްވި ބޮޑު ޖަލްސާގައި ވާހަކަ ދައްކަވަމުން މައުރޫފް ވިދާޅުވީ، ރިސޯޓު މުވައްޒަފުންނާއި، މަސްވެރިންނާ، ޓެކްސީ ޑްރައިވަރުންނާ، ފްލެޓްތަކުގެ ވެރިން ނުކުމެ މި ގައުމު ހަމަ މަގަށް އަޅުވާނެ ކަމަށެވެ.

"ޑޮލަރާ ނުކުޅޭތި ބަޑި، ދިވެހިރާއްޖޭގެ ރިސޯޓުތަކުގައި ތިބި މުވައްޒަފުންނަށް ދިވެހި ރުފިޔާއިން މުސާރަދޭން މުއިއްޒު މަޖުބޫރު ކުރައްވާ ދުވަހު ވެރިކަން ވައްޓާލާނަން" މައުރޫފް ވިދާޅުވިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ތައާރަފް ކުރި ޑޮލަރު މާރުކުރުމުގެ ގަވައިދާ އެކު އެތައް ބައެއްގެ ފާޑުކިއުންތައް ސަރުކާރަށް އަމާޒުވެ، ރިސޯޓްތަކުގެ ވެރިން ވެސް ވަނީ އެކަން އެގޮތަށް ނުކުރެއްވުމަށް ސަރުކާރަށް ގޮވާލައްވާފައެވެ. ރިސޯޓް އޯނަރުންގެ ކަންބޮޑުވުންތަކަށް ވެސް ބެލުމެއް ނެތި، ޑޮލަރު މާރުކުރާ ގަވައިދަށް ބަދަލު ނުގެންނަވާނެ ކަމަށް ރައީސް މުއިއްޒު ވިދާޅުވިއެވެ. ނަމަވެސް ކުރިން ކަނޑައެޅި އުސޫލަށް ބޮޑެތި ބަދަލުތަކެއް ގެނެސް ބޭރު ފައިސާއާ ބެހޭ ބިލު ރައްޔިތުންގެ މަޖިލީހަށް ހޯމަ ދުވަހު ވަނީ ހުށަހަޅައިފައެވެ.

މީގެ އިތުރުން މަސްވެރިންނަށް ރައީސް މުއިއްޒު ވެވަޑައިގެންނެވި ވައުދު ފުއްދަވައިފި ކަމަށް އެމަނިކުފާނު ވިދާޅުވި، ވިދާޅުވުމަށް އިޝާރާތް ކުރައްވާ މައުރޫފް ވިދާޅުވީ، ރައީސްގެ ހުރި ނުބައި ނުލަފާ ހީލަތްތެރިކަން ފެނިފައިވާ ކަމަށެވެ. މަސްވެރިންނަށް މުއިއްޒު ވައުދުވެވަޑައިގަތީ، 20 ރުފިޔާ އަށް މަސްކިލޯއެއް 48 ގަޑީއިރުތެރޭގައި ޑޮލަރުން ފައިސާދޭން ކަމަށެވެ.

"ބައްލަވާ އޮޅުވާލި ވަރު، މުޅި އެތި އޮޅުވާލާފައި 48 ގަޑީއިރުގެ ތެރޭގައި ބޭންކް އޮފް މޯލްޑިވްސްގެ އެކައުންޓެއް އޮތިއްޔާ ލޯނަށް ކަނޑާފައި ބާކީ ދޭނަމޯ. ބަލާލަބަލަ ހީލަތްތެރިކަން. ކޮންމެ ކަމެއްގާ މަކަރާ ހީލަތާ އޮޅުވާލުން" މައުރޫފް ވިދާޅުވިއެވެ.

މައުރޫފް ވިދާޅުވީ މިއަދަކު ދިވެހި ރައްޔިތުންނެއް މި ގުބޯގައެއް ނުޖެއްސޭނެ ކަމަށެވެ. އެމްޑީޕީން މިތިބީ ދޫކުރާ ގޮތަކަށް ނޫން ކަމަށެވެ.