މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ދެ ވަނަ ބުރުގެ ގުރޫޕު ސްޓޭޖުގައި ތ.ތިމަރަފުއްޓާ ދެކޮޅަށް ކުޅުނު މެޗުން ފުވައްމުލައް ސިޓީ އެއްވަރުވެއްޖެ އެވެ.

ގުރޫޕު އީގައި ގަލޮޅު ރަސްމީ ދަނޑުގައި ހޯމަ ދުވަހުގެ ހަވީރު ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މި މެޗާ ކުރިމަތިލީއިރު، ފުވައްމުލައް ސިޓީން ވަނީ މުބާރާތުގެ ފުރަތަމަ ބުރުގެ ގުރޫޕު ސްޓޭޖުގައި ކުޅުނު ހުރިހާ މެޗަކުން ވެސް މޮޅުވެފަ އެވެ. ފުރިހަމަ ރެކޯޑާއެކު އޮތް ފުވައްމުލައް ވަނީ ތިމަރަފުއްޓާ އެއްވަރުވެ، މޮޅުވުމުގެ ސިލްސިލާ އަށް ހުއްޓުމެއް އައިސްފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެެސް ތިމަރަފުށިންނެވެ. ނަމަވެސް ފުވައްލުމައް ސިޓީން ވަނީ ފަހަތުން އަރައި ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ. މެޗު ފަށައިގެން 10 ވަނަ މިނެޓުގައި ތިމަރަފުއްޓަށް ލީޑު ނަގައިދިނީ އިލްމާން އަޙުމަދު މޫސާ އެވެ. އޭނާ އެ ލަނޑު ޖެހީ އާދަމް ނާސިހު ތަނަވަސްކޮށްދިން ފުރުސަތެއްގަ އެވެ.

މެޗުގެ ފުރަތަމަ ހާފުގެ 25 ވަނަ މިނެޓުގައި ފުވައްމުލައް ސިޓީން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ މުބާރާތުގައި މޮޅު ކުޅުމެއް ދައްކަމުން އަންނަ ފުވައްމުލައް ސިޓީގެ ބިދޭސީ ކުޅުންތެރިޔާ ކޯފީ އޮވޫސޫ އެވެ. ފުވައްމުލައްގެ ކުޅުންތެރިޔަކު ޖައްސާލި ބޯޅަ ހިފައިގެން ތިމަރަފުށީގެ އޭރިޔާ ތެރެއަށް ވަދެ ކޯފީ ފޮނުވާލި ބޯޅަ އަމާޒުވީ ގޯލުގެ ކަނަށެވެ.

ގުރޫޕު ސްޓޭޖުގެ ފުރަތަމަ މެޗުގައި ފުވައްމުލައް އެއްވަރުވެފައިވާއިރު، މި ގުރޫޕުގައި ދެން އޮތީ ތ.ގުރައިދޫ އެވެ.