ބޮޑުތިލަދުންމައްޗަކީ ދިވެހިންގެ ހައްގުގައި ތެދުވާނެ ދަރިންތަކެއް ތިބި ތަނެއް ކަމަށާއި ޤާނޫނުއަސާސީގެ ދިފާއުގައި ބޮޑުތިލަދުންމަތިން ތެދުވާނެ ކަމަށް ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ކުޅުދުއްފުށީގައި ބޭއްވި ޤާނޫނުއަސާސީގެ ދިފާއުގައި ބޭއްވި މައިދާނީ އެއްވުމުގައި ވާހަކަދައްކަވަމުންނެވެ.
1932ގައި ޤާނޫނުއަސާސީ އުފެދި ރާއްޖެ ދައުލަތެއްގެ ގޮތުގައި ހިނގަމުން އައީ އެ ހިސާބުން ކަމަށް އޭނާވިދާޅުވިއެވެ. އޭގެ ފަހުން ދިވެހިން ބޭނުންވާ ގޮތަށް ޤައުމު ހިންގާނެ ފޮތެއް ޤައުމުގެ ވެރިންނަށް ހޯދާދީފައިވާ ކަމަށާއި އެއީ ފެހި ޤާނޫނުއަސާސީކަމަށް އޭނާ ވިދާޅުވިއެވެ. އެ ޤާނޫނުއަސާސީ އަކީ ދިވެހިން ހޯދި ޑިމޮކްރަސީގެ ނަތީޖާ ކަމަށް ވެސް އޭނާ ވަނީ ވިދާޅުވެފައެވެ. އާތިފް ވަނީ އެ ޤާނޫނުއަސާސީ ދިވެހިންނާއި ހަމައަށް ގެނެސްދީފައިވަނީ މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ބުރަ މަސައްކަތާއި ގުރުބާނީގެ ސަބަބުން ކަމަށް ވިދާޅުވެފައެވެ. ބޮޑުތިލަދުންމަތީ ރައްޔިތުންނަކީ ދިވެހިންގެ ހައްގުގައި މަސައްކަތް ކުރާ ބައެއްކަން ފާހަގަކުރައްވާ އާތިފް ވިދާޅުވީ ޗޯޅާއިންނާއި، ޕޯޗުގީޒުންގެ ކިބައިން ރާއްޖެ ދިފާއުކުރިފަދައިން، ޤާނޫނުއަސާސީ ދިފާއުކުރުމަށް ވެސް ބޮޑުތިލަދުންމަތި އޮތީ ތައްޔާރަށް ކަމަށެވެ.
މި ނުކުތީ ބޮޑުތިލަދުންމަތިން. އަޅުގަނޑުމެން މި ނުކުތީ ބޮޑުތިލަދުންމަތިން. ދިވެހިރާއްޖެ އާއި ޗޯޅާއިން ދިމާކުރި އިރު ވެސް ޕޯޗުގީޒުން ދިމާކުރި އިރު ވެސް ހޮޅިން ދިމާކުރި އިރު ވެސް ދިވެހިރާއްޖޭގެ ދިފާއުގައި ނުކުތީ މި ބޮޑުތިލަދުންމަތިން. މިއަދު ޤާނޫނުއަސާސީގެ ދިފާއުގައި ނުކުތީ އަނެއްކާވެސް މި ނުކުތީ ބޮޑުތިލަދުންމަތިން. މި ފަޚުރުވެރި ކުޅުދުއްފުށީގެ ފަހުރުވެރި ދަރިން. އަޅުގަނޑުމެންގެ ހިތްވަރު ބަލިކައްޓެއް ނުވާނެ. އަޒުމެއް ބަލިކަށްޓެއް ނުވާނެ. މި މަސައްކަތް އަޅުގަނޑުމެން ކާމިޔާބުކުރާނަން.ކުޅުދުއްފުށި ސިޓީގެ މޭޔަރ މުހައްމަދު އާތިފް
އާތިފް ވަނީ ބާރު ލިބޭ ކޮންމެ ފަހަރު ޤާނޫނުއަސާސީ އާއި ނުކުޅުމަށް ސަރުކާރަށް ގޮވާލައްވާފައެވެ. ޤާނޫނުއަސާސީ އިސްލާހުކުރުމަކީ ކުރިއަށް ވުރެ ރަނގަޅުކުރުން ކަމަށާއި ޤާނޫނުއަސާސީ އިސްލާހުކުރުމުގައި ހައްގުތައް ހަނިކުރުމަކީ ރައްޔިތުން ބަލައިގަންނާނެ ކަމެއް ނޫންކަމަށް އާތިފް ވިދާޅުވިއެވެ. އަދި ރައްޔިތުންގެ ބާރުތައް ނިގުޅައިގަތުމަކީ ޤާނޫނުއަސާސީ ލިޔުނު ބޭނުން ނޫންކަމަށް އޭނާ ވިދާޅުވިއެވެ. ރައީސް ޑރ.މުހައްމަދު މުއިއްޒު ބޭނުންފުޅުވަނީ ޤާނޫނުއަސާސީ އާއި ޚިލާފަށް ޚުދުމުހުތާރުވެރިކަމެއް ކުރައްވަން ކަަމަށް އާތިފް ވިދާޅުވިއެވެ. އެކަން އެނގޭ ކަމަކީ ރައީސްގެ މެމްބަރުން އެކަނި މަޖިލީހުގައި ބޭތިއްބުމުގެ ވިސްނުމާއި، މިނިވަން މުއައްސަސާތަކަށް ރައީސްގެ ނުފޫޒު ފޯރުވަމުންދާ ދިއުން ކަމަށް ވެސް އާތިފް ވިދާޅުވިއެވެ. ނަމަވެސް ރާއްޖެއަށް ބޭނުންވަނީ ބާރުތައް ވަކިވެފައިވާ، ލާމަރުކަޒީ ނިޒާމެއް ކަމަށް އާތިފް ވިދާޅުވިއެވެ.
ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ ނުވަތަ އަމިއްލަ މެންބަރަކު ޕާޓީއަކާއި ގުޅިއްޖެނަމަ މަޖިލީހުގެ މެންބަރުކަން ގެއްލޭގޮތަށް ޤާނޫނުއަސާސީ އަށް ގެނައި އިސްލާހު ރައީސުލްޖުމްހޫރިއްޔާ މުޙައްމަދު މުޢިއްޒު ތަސްދީގުކުރެއްވީ ނޮވެމްބަރު މަހުގެ ތެރޭގައެވެ. ދިވެހި ޖުމްހޫރިއްޔާގެ ގާނޫނުއަސާސީއާ ހިލާފަށް، އެ ގާނޫނުއަސާސީއަށް ގެނެވުނު 6 ވަނަ އިސްހާލު ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ވަނީ ހުށަހަޅާފައެވެ.
