ޤާނޫނު އަސާސީގެ މުޅި މަޙްފޫމަކީ އުނބަށް ނުޖެހުމާއި، ފަހަތަށް ނުދިއުން ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު އަދި ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ) ވިދާޅުވެއްޖެއެވެ.
އޭނާ އެފަދައިން ވިދާޅުވީ ދަ ޑިމޮކްރެޓްސްގެ ކަންމަތީ ޖަލްސާގައި ވާހަކަދައްކަވަމުންނެވެ. ޤާނޫނު އަސާސީގެ ދިފާއުގައި ބޭއްވި އެ ބައްދަލުވުމުގައި ވާހަކަދައްކަވަމުން ވަހީދު ވަނީ ރާއްޖޭގައި އެންމެ ފުރަތަމަ ޤާނޫނުއަސާސީ އެއް އެކުލަވާލީ ޝަމްސުއްދީން ރަދުންގެ ވެރިކަމުގައި ކަމަށާއި އެއީ ވީދާލި ޤާނޫނު އަސާސީކަމަށް ފާހަގަކުރައްވާފައެވެ. އޭގެ ފަހުން ރާއްޖޭގައި 15 ޤާނޫނުއަސާސީ އެކުލަވާލި ކަމަށް ވެސް ވަހީދު ވަނީ އެ ބައްދަލުވުމުގައި ވާހަކަދައްކަވަމުން ވިދާޅުވެފައެވެ. 15 ޤާނޫނުއަސާސީ ވުޖޫދުވި އިރު އެއިން ކޮންމެ ޤަނޫނުއަސާސީ އެއްވެސް އެކުލަވާލުމުގެ ރޫހަކީ އެއް ޤާނޫނުއަސާސީ އަށް ވުރެ ރަނގަޅަށް އަނެއް ޤާނޫނުއަސާސީ އެކުލަވާލުން ކަމަށް އޭނާ ވަނީ ވިދާޅުވެފައެވެ. ދައުލަތެއް، ސަރުކާރެއް، ރައްޔިތެއް އަދި މުއައްސަސާއެއް ވިޔަސް ފަހަތަށް ގޮސްގެން ނުވާނެ ކަމަށް އޭނާ ވަނީ ވިދާޅުވެފައެވެ. ނަމަވެސް ސަރުކާރުން އުނބަށް ޖަހާ، ކަންކަން ފަހަތަށް ގެންދާ މަންޒަރު ފެންނަ ކަމަށާއި، ދައުލަތެއްގެ އެންމެ ބޮޑު ބޭނުމަކީ ފަހަތަށް ނުދިއުންކަމަށް އޭނާ ވިދާޅުވިއެވެ. އަދި ދައުލަތް މިހާރު ހިންގާ ގޮތުން މި ސަރުކާރުގެ ކިބައިން އެކަން ނުފެންނަ ކަމަށް ވަހީދު ފާހަގަކުރެއްވިއެވެ.
އިސްލާހުގެ އުންމީދުގަ މިހާރު މި ހުރި މީހާއަށް ވެރިކަން ހަވާލުކުރީ. ވެރިކަމުގެ އިޚްތިޔާރެއްގަ އޮންނަ ކަމެއް ނޫން. ވެރިކަމުގައި އިޚްތިޔާރެއްގައި އޮންނަ ކަމެއް ނޫން، ވެރިކަމުގެ މަގަކީ ކުރިއަށް ދާން އޮންނަ ވަން ވޭ މަގެއް. އަނބުރާފަ ވަންވޭ ފަޅާފަ ފަހަތަށް އުނބަށް ޖަހަން ދާން އޮންނަ މަގެއް ނޫން ވެރިކަމުގެ މަގަކީ. ބައްލަވާ 17 ނޮވެމްބަރުގައި ވެރިކަމަށް އައި ގޮތަށް 22 ވަޒީރުން ކެބިނެޓަށް އައްޔަންކުރެއްވީ. 22 ވަޒީރުންނާއި އެކު އަޅާ ފިސްތޯލަ ގޮއްވާލީމަ ދުވީ ފަހަތަށް. ބާރަށް ފަހަތަށް. ހަމަ ބާރަށް ފަހަތަށް. ފިސްތޯލަ ގޮއްވާލި މީހާ އެބަ ބުނޭ މާތް ކަލާކޯ ފަހަތަށޭ ދުވަންވީ.ދަ ޑިމޮކްރެޓްސްގެ ލާމަރުކަޒީ ކޮމިޓީގެ ޗެއަރ މުހައްމަދު ވަހީދު (ވައްޑެ)
ދިވެހި ޖުމްހޫރިއްޔާގެ ގާނޫނުއަސާސީއާ ހިލާފަށް، އެ ގާނޫނުއަސާސީއަށް ގެނެވުނު 6 ވަނަ އިސްހާލު ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ހުށަހެޅިފައިވާ ދުސްތޫރީ މައްސަލައަށް ދަ ޑިމޮކްރެޓްސް އިން ތަދައްހުލުވާން ވަނީ ނިންމާފައެވެ. ވަހީދު ވަނީ ޤާނޫނުއަސާސީ އޮޅާލާ ސަރުކާރުން ޤާނޫނު އަސާސީވެސް އުނބަށް ޖަހާފައިވާ ކަމަށް ވިދާޅުވެފައެވެ. އެތައް ދުވަހެއްގެ މަސައްކަތުން ހޯދި ހައްގުތަށް ސަރުކާރުން ދަނީ ނިގުޅައިގަންނަމުން ކަމަށާއި ސަރުކާރުން ފަތުރަނީ އަމިއްލަ ޕްރޮޕެގެންޑާ ކަމަށް އޭނާ ވަނީ ވިދާޅުވެފައެވެ.
ރައްޔިތުންގެ މަޖިލީހުގެ މެންބަރުން ފްލޯކްރޮސްކުރުމުން ނުވަތަ ޕާޓީން ވަކިކުރުމުން ވެސް މެންބަރުކަން ގެއްލޭ ގޮތަށް ގާނޫނުއަސާސީ އަށް ގެނެސްފައިވާ އިސްލާހު ބާތިލުކުރަން ސުޕްރީމް ކޯޓަށް މައްސަލަ ހުށަހެޅުހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު، ގާނޫނީ ވަކީލު އަލީ ހުސައިނެވެ. އެ ފަދަ މައްސަލަ އެއް ހުށަހަޅާފައި މި ވަނީ މި އިސްލާހާއި ގުޅިގެން އާއްމުންނާއި، މެމްބަރުން އަދި ޤާނޫނީ ބޭފުޅުން ވެސް ވަރަށް ބޮޑަށް ކަންބޮޑުވުން ފާޅުކުރައްވަމުންދާ ދަނޑިވަޅެއްގައެވެ. މިދިޔަ މަހުގެ 20 ވަނަ ދުވަހު އެ އިސްލާހު ތަޞްދީޤުކުރައްވާ މިހާރު ވަނީ ދިވެހިސަރުކާރުގެ ގެޒެޓުގައި ޝާއިޢުކޮށް އަމަލު ކުރަން ފަށާފައެވެ.
