ރާއްޖޭގައި ސީދާ ދުންފަތުގެ ސަބަބުން އަހަރަކު 172 މީހުން މަރުވާ ކަމަށް ހެލްތް މިނިސްޓްރީން ބުނެފިއެވެ.

ބުރާސްފަތި ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ދުންފަތުގެ ސަބަބުން ކުރިމަތިވާ ނުރައްކާތެރިކަމާ ގުޅޭގޮތުން ޕްރެޒެންޓޭޝަނެއް ހިއްސާކޮށްފައެވެ.

މި ޕްރެޒެންޓޭޝަންގެ މައުލޫމާތުތައް ހިއްސާ ކުރައްވައި މިނިސްޓްރީގެ އޮފިޝަލް ވިދާޅުވީ މި މުޖުތަމައުގައި ގާތްގަޔަށް ނާރާ ބަލިތައް އިތުރުވަމުންދާ ކަމަށާއި، މި ބަލިތަކަށް ހުށަހެޅޭ ހިރާސްތަކުގެ ތެރޭގައި ދިރިއުޅުމުގެ ވައްޓަފާޅިއަށް ގެނެވޭ ބަދަލާއެކު، މި ބަލިތަކުން ރައްކާތެރިވުމަށް މަސައްކަތް ކުރެވޭނެ ކަމަށެވެ.

ރާއްޖޭގެ ހާލަތަށް ބަލާއިރު، ރާއްޖޭގައި އެންމެ ގިނައިން މީހުން ބަލި މަޑުކަމާއި، ނުކުޅެދުންތެރި ކަމަށް ހުށަހެޅޭ އަދި މަރުވާ އެއް ސަބަބަކީ ވެސް ދުންފަތުގެ އިސްތިއުމާލު ކުރުމާ ދުންފަތުގެ ދުމަށް ހުށަހެޅުންކަން ފާހަގަކުރައްވައި އޮފިޝަލް ވިދާޅުވީ ތަފާސްހިސާބުތަކަށް ބަލާއިރު، ސީދާ ދުންފަތުގެ ސަބަބުން 172 މީހުން އަހަރަކު މަރުވާ ކަމަށެވެ.

އެންމެފަހުން ހެދިފައިވާ ސްޓެޕް ސަރވޭ ނަތީޖާއަށް އިޝާރާތް ކުރައްވައި އޮފިޝަލް ވިދާޅުވީ މި މުޖުތަމައުގައި ކޮންމެ 4 މީހަކުން އެކަކަކީ ދުންފަތުގެ އިސްތިއުމާލު ނުވަތަ ދުންފަތް ކޮންމެވެސް ގޮތަކަށް ބޭނުންކުރާ ފަރާތެއް ކަމަށެވެ. އަދި 15 އަހަރާއި 29 އަހަރުގެ 20.1 އިންސައްތަ 30 އަހަރާއި، 44 އަހަރު 29.0 އިންސައްތަ، 45 އަހަރާއި، 65 އަހަރު 23.4 އިންސައްތަ ދުންފަތުގެ އިސްތިއުމާލު ކުރާ ކަމަށް އޮފިޝަލް ވިދާޅުވިއެވެ.

މީގެ އިތުރުން އޮފިޝަލް ވިދާޅުވީ 30 އަހަރާއި، 44 އަހަރުގެ މީހުންނަކީ މަސައްކަތް ކުރާ އުމުރުފުރާގެ މީހުން ކަމަށްވާއިރު، މިއުމުފުރާގެ މީހުންގެ ބޮޑެތި ބަލިތަކަށް ހުށަހެޅޭ ހިރާސްތަކުގައި އުޅެމުންދާ ކަމަށްވާނަމަ އެކަމުގެ އަސަރު ގައުމުގެ އުފެއްދުންތެރިކަމަށް ވެސް ކުރާ ކަމަށެވެ.

ދިވެހިރާއްޖޭގައި 2019 ވަނަ އަހަރު ހެދިފައިވާ ގްލޯބަލް ޔޫތް ޓޮބޭކޯ ސަރވޭގެ ނަތީޖާއާ ގުޅޭގޮތުން އޮފިޝަލް ވިދާޅުވީ މިސަރވޭގައި ބައިވެރިވި ކުދިންގެ ތެރެއިން 45.7 އިންސައްތަ ކުޑަކުދިންނަކީ ކޮންމެވެސް ހިސާބެއްގައި ދުންފަތުގެ ކޮންމެވެސް ބާވަތެއް ބޭނުންކޮށްފައިވާ ކުދިން ކަމަށެވެ. އެއީ 13 އަހަރާއި 15 އަހަރުގެ ކުދިން ކަމަށް ވެސް އޭނާ ވިދާޅުވިއެވެ. އަދި ވިދާޅުވީ 45.7 އިންސައްތަ ކުދިންގެ ތެރެއިން 17.1 އިންސައްތަ ކުދިންނަކީ އީ ސިގްރޭޓް ބޭނުންކޮށްފައިވާ ކުދިން ކަމަށާއި، 3.1 އިންސައްތަ ކުދިންނަކީ ސީޝާ ނުވަތަ ގުޑަގުޑާ ބޭނުންކޮށްފައިވާ ކުދިން ކަމަށެވެ.

އޮފިޝަލް ވިދާޅުވީ ރާއްޖޭގެ މުސްތަގުބަލަށް މިއީ ކަންބޮޑުވާ މައްސަލައެއް ކަމަށާއި، ހައްލު ކުރުމަށް ބޮޑެތި ގިނަ މަސައްކަތްތައް ކުރަންޖެހޭ ކަމަށެވެ.

މިހާރު ކުރަމުންދާ ކުރިއަށް ރޭވިފައިވާ ބައެއް ކަންކަމާއި ގުޅޭގޮތުން އޭނާ ވިދާޅުވީ މުއައްސަސާތައް އަދި ރަށު ފެންވަރުގައި އެންމެން ގުޅިގެން ދުންފަތް ކޮންޓްރޯލް ކުރުމަށް މަސައްކަތް ކުރަންޖެހޭ ކަމަށެވެ. މިހާރު ދަފަރާ ނަމުގައި ކެންޕޭނެއް ފަށާފައިވާ ކަމަށް އޮފިޝަލް ވިދާޅުވިއެވެ. އަދި ވިދާޅުވީ މިކެންޕޭން ކުރިއަށް ގެންދަނީ އާއްމުން ހޭލުންތެރިކުރުވައި، ދުންފަތަށް ހުށާހެޅޭ ކުދިން މަދުކުރުމާއި، ދުންފަތުން ރައްކާތެރި ކުރުމަށް ފަރުވާ ދިނުމަށް ސިއްހީ ޚިދުމަތްތެރިން ތަމްރީން ކުރުމާއި، ޕޮލިސީ ބަދަލުތައް ގެނައުމަށް މަސައްކަތް ކުރަމުންދާ ކަމަށެވެ.