ސައުވީސް ގަޑީއިރު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ހުންނަވަނީ ޚިދުމަތުގައި ކަމަށް ބުނެ ޓްވީޓް ކުރައްވާ ފަރާތްތަކަށް މަޑަވެލީ ދާއިރާގެ ކުރީގެ މެމްބަރު ހުސެއިން ފިރުޝާން ރައްދު ދެއްވައިފިއެވެ.
ޤާނޫނުއަސާސީގެ ދިފާޢުގައި، ބުދަ ދުވަހުގެ ރޭ ދަ ޑިމޮކްރެޓިސް އިން ބޭއްވި ކަންމަތީ ޖަލްސާގައި ވާހަކަ ދައްކަވަމުން ފިރުޝާން ވިދާޅުވީ، ރައީސް މުއިއްޒު ގަޑިއަށް ބައްލަވައިގެން ހުންނަވާ ފޮޓޯއެއް އެ ޕާޓީގެ މެމްބަރުން ޓްވީޓްކޮށް އެމަނިކުފާނު ހުންނަވަނީ 24 ގަޑީއިރު، ޚިދުމަތުގައޭ ބުނާ ކަމަށެވެ. ނަމަވެސް އެއީ ހަގީގަތް ނޫން ކަމަށާއި، ހަގީގަތުގައި އެމަނިކުފާނު އެ ހުންނަވަނީ 24 ގަޑީއިރު، ވައްކަމެއް ކޮށްލެވޭނެ ގޮތެއް ބައްލަވަން ކަމަށެވެ.
ގަޑި ބަލަހައްޓަވައިގެން ރައީސް މުއިއްޒު ހުންނަވާ ފޮޓޯއެއް ޓްވީޓް ކޮށްފައި ޕީއެންސީ ބޭފުޅަކު މި ވިދާޅުވަނީ ރައްޔިތުންގެ ޚިދުމަތުގައޭ. ނޫން 24 ގަޑީއިރު ވައްކަމެއް ކޮށްލެވޭތޯ. ދޮގެއް ހެދޭތޯ. އުނބަށްޖެހޭތޯ. 24 ގަޑީއިރު މި ހުންނަވަނީ ވައްކަމެއް ކޮށްލެވޭތޯ. ހެޔޮނުވާނެ، މާތްކަލާކޯ ފައިބާ. ރައްޔިތުންނަށް މި އަނިޔާ ނުދީ.މަޑަވެލީ ދާއިރާގެ ކުރީގެ މެމްބަރު ހުސެއިން ފިރުޝާން
ފިރުޝާން އިތުރަށް ވިދާޅުވީ، ގާނޫނުއަސާސީ ދިވެހި ރައްޔިތުން ހޯދީ ވަރަށް މަސައްކަތުން ކަމަށާއި، އެހެން ކަމުން އެ ނިގުޅައި ނުގަނެވޭނެ ކަމަށެވެ. އަދި އެޖާގަ ނުދޭނެ ކަމަށާއި، ގުޅެންޖެހުނު ކޮންމެ ބަޔަކާ ގުޅިގެން ވެސް މި ސަރުކާރު ޖަވާބުދާރީ ކުރުވާނެ ކަމަށެވެ. ޑިމޮކްރެޓްސް އަކީ ކިތައްމެ ކުޑަ ޕާޓީއަކަށް ވީ ނަމަވެސް އެޕާޓީގެ އަޑު ގަދަވާނެ ކަމަށެވެ.
"އެ ހިތްވަރު ހުންނާނެ، އަޒުމެއް ނުގުޑާނެ. ސާބިތު ކަމާއެކު މި ހަރާކާތުގައި ތިއްބަވާނެ." ފިރުޝާން ވިދާޅުވިއެވެ.
ފިރުޝާން ވިދާޅުވި ގޮތުގައި ތިންބާރު ވަކިވެފައިވާ ގާނޫނުއަސާސީ މިއަދުގެ ސަރުކާރުން ޕެރެލައިޒްކޮށްލައިފި އެވެ. ރައީސް މުއިއްޒު އިސްވެ ހުންނަވައިގެން މި ގައުމުގައި އެތުރިފައި އޮތް ޑިމޮކްރެޓިކް ނިޒާމް ފުނޑާލުމުގެ މަސައްކަތް ކުރައްވަމުން ގެންދަވާ ކަމަށް ވެސް ފިރުޝާން ފާހަގަ ކުރެއްވިއެވެ.
މީގެ އިތުރުން މިއަދުގެ ސަރުކާރުގެ ސަބަބުން ރައްޔިތުންނަށް ދިމާވެފައިވާ ގޮންޖެހުންތަކުގެ ވާހަކަތައް ފާހަގަކުރައްވާ ފިރުޝާން ވަނީ ފަތުރުވެރި ކަމުގެ ދާއިރާ ހަލާކުކޮށްލަން ސަރުކާރުން ކުރަމުންދާ މަސައްކަތުގެ ވާހަކަ ފާހަގަކޮށްފައެވެ. އެގޮތުން ފިރުޝާން ވިދާޅުވީ، ތަރައްގީވަމުން އަންނަ ގައުމެއްގައި ބައިވަރު ކަންކަން ބަދަލުވެގެން ދާނެ ކަމަށް އަމިއްލަ އަށް ވެސް ގަބޫލުކުރައްވާ ކަމަށެވެ. އެހެން ނަމަވެސް ވިޔަފާރިވެރިންނާ ޖެހިގަނެގެން މިކުރަން ދިމާކުރާ މަސައްކަތަކީ ގަބޫލު ކުރެވޭނެ ކަމެއް ނޫން ކަމަށް ފިރުޝާން ވިދާޅުވިއެވެ.
ފިރުޝާން އެ އިޝާރާތް ކުރެއްވީ ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ހޮޓާތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ ރޭޓުން ބޭންކަކަށް ރުފިޔާއަށް މާރުކުރަން ޖެހޭ ގޮތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި ގަވައިދަށެވެ. އެ ގަވައިދާ ގުޅިގެން ވިޔަފާރިވެރިން ފޮނުވި ކަންބޮޑުވުންތަކުގެ ސިޓީތަކަށް ރަސްމީ ޖަވާބެއް ނުދެއްވާ ރައީސުލްޖުމްހޫރިއްޔާ ސިޔާސީ ހަރަކާތެއްގައި ހުންްނަވައިގެން ވިދާޅުވީ ގަވައިދު ބަދަލު ނުކުރައްވާނެ ކަމަށެވެ. އަދި އޭގެ ފަހުން އެމްއެމްއޭ ގެ ގަވަނަރު އަހްމަދު މުނައްވަރު ވެސް ވަނީ އެ ވާހަކަ ތަކުރާރު ކުރައްވާފައެވެ. ނަމަވެސް ރައީސް ބަދަލު ނުކުރައްވާނަމޭ ވިދާޅުވި ގަވައިދަށް ގާނޫނެއްގެ ސިފަ ޖެއްސެވުމުގެ މަސައްކަތް ވަނީ ފަށާފައެވެ.
އަޅުގަނޑު މީ ކާކުތޯ މި ގައުމުގައި ދުވަސްވީ ވިޔަފާރި ވެރިންނަށް ހަވަރަށް ދޭން ޖަލްސާތަކަށް އަރާ. ރައީސުލްޖުމްހޫރިއްޔާ އަށް އެކަމެއް ނުކުރެއްވޭނެ. ހަރުދަނާ އުސޫލުތައް ހައްދަވާ. އިރު އިރުކޮޅާ އުނބަށް ޖައްސަވަން ކަންކަން ކުރައްވާނެ ކަމެއް ނެތް. އޭގެއިން ރައްޔިތުންނަށް ލިބޭ ގެއްލުން މާ ބޮޑު.މަޑަވެލީ ދާއިރާގެ ކުރީގެ މެމްބަރު ހުސައިން ފިރުޝާން
ފަތުރުވެރިކަމުގެ ދާއިރާގައި މަސައްކަތް ކުރައްވާ ފަރާތްތަކުން މިއަދު ތިބީ ބިރުވެރި ކަމެއްގައި ކަމަށާއި، އަންނަ އޮފް ސީޒަނުގައި ރިސޯޓްތައް ބަންދުކޮށްލަފާނެތީ އެކަމުގެ ބިރުގައި ކަމަށް ފިރުޝާން ވިދާޅުވިއެވެ. ފިރުޝާން ފާހަގަ ކުރެއްވި ގޮތުގައި ހަރުދަނާ އުސޫލު ހެއްދެވުމުން އެކަމަށް މަރުހަބާ ކިޔާނެއެވެ.
ރާއްޖޭގެ ރައްޔިތުންނަށް މިއަދު ޖެހިފައިވާ ނިކަމެތި ހާލަތަކީ ދުވަހަކު ނުޖެހޭ ހާލެއް ކަމަށާއި، އަތުގަ ޚަރަދު ކުރާނެ ލޯ ލާރިއެއްވެސް ނެތް ހިސާބަށް ކަންކަށް ގޮސްފައިވާ ކަމަށް ފިރުޝާން ވިދާޅުވިއެވެ.
