ބުދަ ދުވަހުގެ ފަތިހު ޣައްޒާ ސްޓްރިޕްގެ އެކި ސަރަޙައްދުތަކަށް އިސްރާއީލުގެ ބާރުތަކުން ދިން ބޮމުގެ ހަމަލާތަކުގެ ސަބަބުން އެތައް އާންމު ރައްޔިތުންނެއް ޝަހީދުވެ އެތައް ބަޔަކު ޒަޚަމް ވެއްޖެއެވެ.
ސިއްހީ އޮފިޝަލުންނާ ހަވާލާދީ މީޑިއާ ރިޕޯޓުތައް ބުނާ ގޮތުގައި ޣައްޒާ ސްޓްރިޕްގެ މެދުތެރޭގައި ހުންނަ ދީރުލް-ބަލާޙް އަދި އަލް-ބުރެއިޖް ކޭމްޕްގައި ހުރި ގެދޮރު ގެއްލިފައިވާ މީހުން ތިބޭ ސްކޫލަކަށް ޔަހޫދީ ސިފައިންގެ ބާރުތަކުން ދިން ވަރު ގަދަ ހަމަލާތަކުގައި ތިން ފަލަސްޠީނު މީހުން މަރުވެ އަދި އިތުރު މީހުން ޒަޚަމްވެފައިވެއެވެ.
އަލް-ބުރެއިޖް ކޭމްޕްގައި ހުރި އަބޫ ހަމީސާ ސްކޫލަށް އިޒްރޭލުން ދިން ބޮމުގެ ހަމަލާގެ ސަބަބުން 15 ޓެންޓުގައި ރޯވެ ވަރަށް ބޮޑަށް އަލިފާނުގެ ގެއްލުން ލިބުނެވެ.
އޭގެ އިތުރުން އިޒްރޭލު ސިފައިން އާޓިލަރީން ޣައްޒާ ސިޓީގެ ތާލް އަލް-ހަވާ އަދި އަލް-ސަބްރާ ސަރަޙައްދުތަކުގައި ހުރި ރައްޔިތުންގެ ގެތަކަށް ބޮމުގެ ހަމަލާ ދިނެވެ. އަދި އޮކިއުޕޭޝަން ބާރުތަކުގެ ހަނގުރާމަ ވެރި މަތިންދާބޯޓުތަކުން ސްޓްރިޕްގެ އުތުރު ސަރަޙައްދުތަކަށް އަމާޒުކޮށް ހަމަލާ ދިނެވެ.
އިޒްރޭލުގެ ހަނގުރާމަ މަތީ މަތިންދާބޯޓުތަކުން ބައިތު ލަހިޔާއަށް، ޚާއްޞަކޮށް އަބޫ ތަމާމް ސްކޫލާއި ކަމާލް އަދްވާން ހޮސްޕިޓަލް ކައިރި ސަރަޙައްދުތަކަށް ބޮމުގެ ހަމަލާ ތައް ވަނީ ދީފައެވެ.
ހުސްވި އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ހުއްޓުމެއް ނެތި ފަލަސްތީނުގެ ރައްޔިތުންނާ ދެކޮޅަށް އިސްރާއީލުގެ ބާރުތަކުން ޣައްޒާ އަށް ދެމުންދާ ހަމަލާތަކުގައި މަރުވި މީހުންގެ އަދަދު މިހާރު ވަނީ 44،502ށް އަރާފައެވެ. އޭގެ އިތުރުން އިސްރާއީލުގެ އަނިޔާވެރި ހަމަލާތަކުގައި ޒަޚަމްވި ފަލަސްތީނު މީހުންގެ އަދަދު މިހާރު ވަނީ 105،454ށް އަރާފައެވެ.
