މިސަރުކާރު ޖަވާބުދާރީ ކުރުމަށް އޮތް އެންމެ ބޮޑު ބާރަކީ ރައްޔިތުންގެ ބާރު ކަމަށާއި، ރައްޔިތުން ނުކުމެ އެބާރު ބޭނުން ކުރަންޖެހޭ ކަމަށް އެމްޑީޕީގެ ޕާލަމަންޓްރީ ގްރޫޕް (ޕީޖީ) ލީޑަރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.

ބުރާސްފަތި ދުވަހުގެރޭ ބޭއްވި އެމްޑީޕީ ހަރުގެ ޖަލްސާގައި މެންބަރު ނާޒިލް ވިދާޅުވީ 10 ޑިސެންބަރު 2024 ވަނަ ދުވަހުގެ ރޭ އެމްޑީޕީން ރައްޔިތުންގެ ހައްގުގައި ބޮޑު ޖަލްސާއެއް ކާނިވާ ސަރަހައްދުގައި ބާއްވާ ކަމަށާއި، އެޖަލްސާއަށް ވީހާ ވެސް ގިނަ ރައްޔިތުން ބައިވެރިވުމަށް އެދިވަޑައި ގަންނަވާ ކަމަށެވެ. މާލެސިޓީގެ އިތުރުން، ރާއްޖޭގެ އުތުރާއި، ދެކުނުން އަދި ރިސޯޓުތަކުގައި މަސައްކަތް ކުރާ ދިވެހި ރައްޔިތުން މި ޖަލްސާ އަށް ވަޑައިގަތުމަށް މެންބަރު ނާޒިލް ގޮވާލެއްވިއެވެ.

މެންބަރު ނާޒިލް ވިދާޅުވީ މިސަރުކާރުން 24 ބިލިއަން ރުފިޔާ ހުސްކޮށްލާފައިވާ ކަމަށާއި، ރައްޔިތުންނަށް ލިބުނު މަންފާއެއް ފައިދާއެއް ނެތް ކަމަށެވެ. އަދި އަންނަ އަހަރަށް 56 ބިލިއަން ރުފިޔާ ބަޖެޓުކޮށްފައިވާއިރު، ރައްޔިތުންނަށް އެއްޗެއް ސާފުވާ ގޮތަަށް އެއްވެސް މަޝްރޫއެއްގެ ތަފްސީލު ހިމަނާފައިނުވާ ކަމަށް މެންބަރު ނާޒިލް ވިދާޅުވިއެވެ.

މީގެ އިތުރުން މެންބަރު ނާޒިލް ވިދާޅުވީ މިއަދު ރައްޔިތުންނަށް ލިބެމުންދިޔަ އާސަންދައާއި، ބޭސް އަދި ރިސޯޓު މުވައްޒަފުންނަށް ޑޮލަރުން ލިބުނު މުސާރައަށް މިސަަރުކާރު ހުރަސްއަޅާފައިވާ ކަމަށެވެ. އަދި ވިދާޅުވީ ޓެކްސީ ޑްރައިވަރުންނާއި، މަސްވެރިންނަށް ދަތިކޮށް، ފްލެޓު ވެރިންނާއި، ގޯތިވެރިންގެ ހައްގުތަކަށް އަރާގަނެފައިވާ ކަމަށެވެ. އެހެންކަމުން ރައްޔިތުންގެ އަޑު ސަރުކާރަށް އިއްވުމަށް ޖަލްސާގައި ބައިވެރިވުމަކީ މުހިންމު ކަމެއް ކަމަށް މެންބަރު ނާޒިލް ވިދާޅުވިއެވެ.

މެންބަރު ނާޒިލް ގައުމުގެ ބާރުވެރި ފަރާތަކީ ރައްޔިތުން ކަމަށާއި، ރައްޔިތުންގެ އަޑު ސަރުކާރަށް އިއްވުމަށް ހުރިހާ ރައްޔިތުން ނުކުންނަންޖެހޭ ކަމަށެވެ.

މެންބަރު ނާޒިލް ވިދާޅުވީ ރައްޔިތުން އެއްތަނަކަށް އެއްވެ ސަރުކާރަށް ރައްޔިތުންގެ އަޑު އިއްވާ ކަމަށްވާނަމަ، ރައީސް ޑރ.މުހައްމަދު މުއިއްޒަށް ރައްޔިތުންނާ މެދު އިތުރަށް ވިސްނަން މަޖުބޫރުވާނެ ކަމަށެވެ. އަދި އެމްޑީޕީން މަސައްކަތް ކުރަނީ ރައްޔިތުންގެ ހައްގުގައި ކަމަށާއި، ރައްޔިތުންގެ ލާބަޔަށް ކަމަށް މެންބަރު ނާޒިލް ވިދާޅުވިއެވެ.