ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެއެމް) އިން އިންތިޒާމުކޮށްގެން މިއަހަރު ބޭއްވި އިންޓަ ސްކޫލް ވޮލީ ބޯޅަ މުބާރާތާ ގުޅޭ ގޮތުން އަަތޮޅު ތެރޭ ސްކޫލުތަކުގެ ކޯޗުން ކަންބޮޑުވުން ފާޅު ކޮށްފި އެވެ.
ވީއޭއެމް އިން އިިންތިޒާމުކޮށްގެން ހުސްވި ނޮވެމްބަރު މަހުގެ 25 ވަނަ ދުވަހުން ފެށިގެން ކުރިއަށް ގެންދިޔަ މުބާރާތް ނިމިފައި ވަނީ މިދިޔަ ހުކުރު ދުވަހުގެ ރޭ އެވެ. މި މުބާރާތުގައި އަތޮޅު ތެރޭގެ ގިނަ ސްކޫލުތަކަކުން ބައިވެރިވި އެވެ. މިއަހަރުގެ މުބާރާތުގެ މެޗުތައް ކުޅުމަށް ވީއޭއެމް އިން ހަމަޖައްސާފައި އޮތީ، ޕޮލިސް ކޯޓު އަދި މާފަންނު ޓާފް ކޯޓުގަ އެވެ. އަދި މުބާރާތުގެ ފައިނަލް ބުރުގެ ފައިނަލް މެޗުތައް ކުޅެފައި ވަނީ ޒުވާނުންގެ މަރުކަޒުގެ އެތެރޭ ކޯޓުގަ އެވެ.
މުބާރާތާ ގުޅޭ ގޮތުން ވާހަކަ ދައްކަމުން އަތޮޅު ތެރޭ ސްކޫލުތަކުގެ ބައެއް ކޯޗުން ބުނީ، ދެ ދަނޑެއްގައި މުބާރާތް ކުޅެން ޖެހުމަކީ އެކަމުގެ ސަބަބުން ވަރަށް ބޮޑެތި އުނދަގޫތަކާ ކުރިމަތިލާން ޖެހުނު ކަމެއް ކަމަށެވެ. ޚާއްސަކޮށް ސްކޫލުތަކުން އެއް ޓީމަށް ވުރެ ގިނަ ޓީމުތަކެއް ވާދަކުރިއިރު، ދެ ދަނޑުގައި އެއް ވަގުތެއްގައި ވެސް މެޗު ކުޅެން ޖެހުނު މައްސަލަ ކޯޗުން ވަނީ ފާހަގަ ކޮށްފަ އެވެ. އެކަމުގެ ސަބަބުން ޓީމުގެ އޮފިޝަލުން ދެ ޓީމަށް ބަހާލައިގެން ކުރިއަށް ދާން ޖެހޭއިރު، ޓީމަށް އެކަމުގެ ސަބަބުން އުނދަގޫތަކެއް ކުރިމަތިވި ކަމަށް ވެސް ކޯޗުން ވަނީ ބުނެފަ އެވެ.
މީގެ އިތުރުން އަތޮޅު ތެރޭގެ ކޯޗުން ފާހަގަކޮށްފައިވާ ގޮތުގައި ޓީމުތަކުން މުބާރާތަށް އަންނަނީ ރަށް ރަށުގައި ޤާއިމު ކޮށްފައި ހުރި ޓާފް ކޯޓުތަކުގައި ފަރިތަކުރުމަށް ފަހު އެވެ. އެހެން ނަމަވެސް، މާލެ އައިސް މުބާރާތް ކުޅެން ޖެހުނީ ވެލި ކޯޓުގައިކަން ފާހަގަކޮށް ކޯޗުން ބުނީ، އެކަމުގެ ސަބަބުން ކުޅުންތެރިންނަށް އެތަކެއް އުނދަގުލެއް ކުރިމަތިވި ކަމަށެވެ. ޚާއްސަކޮށް ކުޅުންތެރިންނަށް އަނިޔާވުމުގެ ފުރުސަތު ބޮޑުއިރު، ބައެއް ކުޅުންތެރިންނަށް އަނިޔާ ވެސް ވި ކަމަށް ކޯޗުން ވަނީ ފާހަގަކޮށްފަ އެވެ. އަނެއްކޮޅުން ރާއްޖޭގައި ވޮލީ އަކީ މިހާރު ކުރިއަރާފައިވާ ކުޅިވަރަކަށްވާއިރު، މުޅި ރާއްޖެ އަށް ހުޅުވާލައިގެން ބާއްވާ ބޮޑެތި މުބާރާތްތައް ވެލި ކޯޓުުގައި ކުޅެން ޖެހުމަކީ ހިތާމަ ހުރި ކަމެއް ކަމަށް ކޯޗުން ވަނީ ބުނެފަ އެވެ،
މިހާރު އަޅުގަނޑުމެން މި އަންނަނީ ރަށް ރަށުގައި މި ހުންނަ ޓާފް ކޯޓުތަކުގައި ފަރިތަކޮށްފައި. މުބާރާތަށް މާލެ އައިސް ކުޅެން މި ޖެހުނީ ވެލި ކޯޓުގައި. މިއީ ކުޅުންތެރިންނަށް ވަރަށް ބޮޑު އުނދަގުލެއް، އަނެއްކާ އަނިޔާވުމުގެ ފުރުސަތު ވަރަށް ބޮޑު ކަަމެއް. ބައެއް ކުޅުންތެރިން އެބަ ތިބޭ ޖެހިލުންވެފައި. އަޅުގަނޑުމެން ޓީމުގެ ކުއްޖަކަށް ވެލި ކޯޓުގައި ކުޅުމުގެ ތެރޭގައި އަނިޔާ ވެސް ވި. އެއީ ބޯޅަ އަކަށް މަސައްކަތް ކުރުމުގެ ތެރޭގައި. އަނެއްކާ މިފަހަރު މި ކުޅުނީ ދެ ދަނޑެއްގައި ދެ މެޗު. ވަރަށް އުނދަގޫވި މެނޭޖު ކުރަން. ދެ މެޗު ވެސް މުހިންމުއިރު، ކޯޗު ހުންނަން ޖެހުނީ އެއް މެޗުގައި. އަނެއް މެޗު ކުރިއަށް ގެންދަން ޖެހުނީ އޮފިޝަލުން ލައިގެން.އަތޮޅު ތެރޭގެ ސްކޫލަކަށް އިރުޝާދު ދެމުން އަންނަ ކޯޗެއް
މީގެ އިތުރުން ކޯޗުން ވަނީ މުބާރާތުގެ ބައެެއް މެޗުތަކުގައި އެންމެ ރެފްރީއެއް ބޭނުން ކުރި ކަމުގެ ކަންބޮޑުވުން ވެސް ފާޅުކޮށްފަ އެވެ. މިފަދަ މުބާރާތްތަކުގައި ފްސްޓް ރެފްރީގެ އިތުރުން، ސެކަންޑް ރެފްރީއެއް ހުރުމަކީ މުހިންމު ކަމެއް ކަމަށް އެ ކޯޗުން ވަނީ ފާހަގަކޮށްފަ އެވެ. އަނެއްކޮޅުން މުބާރާތުގައި ލައިން ބަލަހައްޓާނެ މީހުން ނެތް ކަމަށާއި، އެކަމުގެ ސަބަބުން ނިންމުންތައް ނިންމަން ރެފްރީންނަށް އުނދަގޫވެ، ޓީމުތަކަށް ޕޮއިންޓު ގެއްލުނު މައްސަލަ ވެސް ކޯޗުން ވަނީ ފާހަގަ ކޮށްފަ އެވެ. ހަމައެހެންމެ ވެލި ކޯޓުގައި މުބާރާތުގެ މެޗުތައް ކުޅުނުއިރު، ޓީމުތަަކުގެ ސަޕޯޓަރުންނަށް އެތަނުގައި އެންމެ އެކަށީގެންވާ ޖާގަ ނޯންނަ ކަމުގެ ކަންބޮޑުވުން ވެސް އެ ކޯޗުން ވަނީ ފާހަގަކޮށްފަ އެވެ.
މީގެ އިތުރުން މުބާރާތް ރާވާފައި އޮތް ގޮތުން ގާތް ގާތުގައި ވާދަވެރި މެޗުތަކެއް ކުޅެން ޖެހުމުގެ ކަންބޮޑުވުން ވެސް ބައެއް ކޯޗުން ފާހަގަކުރި އެވެ. ޚާއްސަކޮށް ކޮންމެ ދުވަހަކު ކަހަލަ ގޮތަކަށް ވާދަވެރި މެޗުތަކެއް ކުޅެން ޖެހުމުގެ ނަތީޖާ އަކީ، ކުޅުންތެރިންނަށް ވަރުބަލިކަން އިޙުސާސް ކުރެވި އަދި ބައެއް ކުޅުންތެރިންނަށް އަނިޔާގެ މައްސަލައާ ކުރިމަތިލާން ޖެހުން ކަމަށް ވެސް ކޯޗުން ވަނީ ފާހަގަ ކޮށްފަ އެވެ. އަނެއްކޮޅުން އެހެން އަހަރުތަކުގެ މުބާރާތުގައި ކޮންމެ މެޗެކަށްފަހު މޮޅު ކުޅުންތެރިޔާ ހޮވާ ކަމަށާއި، ނަމަވެސް މިއަހަރުގެ މުބާރާތުގައި އެކަން ކޮށްފައި ނުވާކަމަށް ކޯޗުން ބުންޏެވެ.
ކޯޗުން ބުނެފައި ވަނީ މުސްތަޤުބަލަށް ބަލާއިރު، ވީއޭއެމް އިން އެކަންކަން ރަނގަޅު ކުރާނެ ކަމަށް އުންމީދު ކުރާ ކަމަށެވެ. އަދި އިންޓަ ސްކޫލަކީ ނަމަކަށް ބާއްވާ މުބާރާތަކަށް ހެދުމުގެ ބަދަލުގައި، ވޮލީގައި ހުނަރުވެރި ކުޅުންތެރިންތަކެއް ބިނާކޮށް، މޮޅެތި ކުޅުންތެރިންތަކެއް އުފެއްދުމަށް ބާއްވާ މުބާރާތަކަށް ވާން ޖެހޭ ކަމަށް ވެސް ކޯޗުން ބުންޏެވެ. މީގެ ކުރިން ވެސް އިންޓަ ސްކޫލް މުބާރާތުން މޮޅެތި އެތައް ކުޅުންތެރިންނެއް ފެނިފައިވާއިރު، މިއަދު މުބާރާތުގެ ފެންވަރު ދަށްވުމަކީ ހިތާމަ ކުރާ ކަމެއް ކަމަށް ވެސް ކޯޗުން ވަނީ ބުނެފަ އެވެ.
