ފަލަސްޠީނުން ހިފާފައިވާ ސަރަޙައްދުތަކުގައި އަންރުވާ އިން ފަލަސްތީނުގެ ރެފިއުޖީންނަށް ތައުލީމު ދިނުމަށް ހިންގާ ޙަރަކާތްތައް ކުރިއަށް ގެންދިއުމަށް ތާއީދުކޮށް ޔުނެސްކޯގެ އެގްޒެކެޓިވް ބޯޑުގެ 8 ވަނަ އެކްސްޓްރާ އޯޑިނަރީ ޖަލްސާގައި ހޯމަ ދުވަހު ގަރާރެއް ފާސްކޮށްފިއެވެ.
މި ޤަރާރުގައި ފާހަގަކޮށްފައިވަނީ ފަލަސްޠީނު ރެފިއުޖީންނަށް ތަޢުލީމު ހޯދައިދިނުމަށް ޔުނެސްކޯއިން ދެމި އޮންނާނެ ކަމަށެވެ.
58 މެންބަރު ޤައުމުތަކުގެ ތެރެއިން 50 ޤައުމަކުން މި ޤަރާރަށް ތާއީދުކުރިއެވެ. ދެ ޤައުމަކުން ވޯޓު ނުދީ ތިބި އިރު، ދެ ޤައުމެއް ވޯޓުގައި ބައިވެރިވުމަށް ޙާޟިރުވެފައި ނުވެއެވެ. އަދި ހަތަރު ޤައުމަކުން މި ޤަރާރާ ދެކޮޅަށް ވޯޓުދިނެވެ.
ޔުނެސްކޯގެ އެގްޒެކެޓިވް ބޯޑުގެ މި ޚާއްޞަ ޖަލްސާ ބޭއްވުނީ ބާރަ މެންބަރު ޤައުމެއްގެ އެދުމުގެ މަތިންނެވެ. އެއީ ޗިލީ، ކިއުބާ، ޖިބޫތީ، އިންޑޮނޭޝިއާ، ޖޯޑަން، މެކްސިކޯ، ނައިޖީރިއާ، ޕާކިސްތާން، ޤަޠަރު، ސައުތު އެފްރިކާ، ސްޕެއިން އަދި ތުރުކީއެވެ.
މި ގަރާރު ހުށަހެޅީ އިޒްރޭލުގެ ގާނޫނު ހަދާ މަޖިލިސް ކެނެސެޓުން ފާސްކޮށްފައިވާ ޤާނޫނުތަކުން އަންރުވާގެ މަސައްކަތަށް ނުރައްކާވެފައިވާތީ، އޭގެ ސަބަބުން ފަލަސްތީނުގައި އަންރުވާއިން ފޯރުކޮށްދޭ ތަޢުލީމީ ޚިދުމަތްތަކަށް ނޭދެވޭ އަސަރުކުރާނެތީ، އަންރުވާގެ ތަޢުލީމީ ޚިދުމަތްތައް ކުރިއަށް ގެންދިއުން ކަށަވަރުކުރުމަށެވެ.
