ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ އެންޑްރިކް ދޫކޮށްލުމުގެ ވިސްނުމެއް އެ ކުލަބުން ނުގެން ގުޅޭ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 18 އަހަރުގެ ކުޅުންތެރިޔާ ރެއާލަށް ބަދަލުވީ މިއަހަރުގެ ޖުލައި މަހުގެ ތެރޭގަ އެވެ. އެ ކުލަބާ އެކު އޭނާ ސޮއި ކޮށްފައި ވަނީ ހަ އަހަރު ދުވަހުގެ އެއްބަސްވުމެއްގަ އެވެ. އެހެންކަމުން 2030 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ. ރެއާލުން އެންޑްރިކް ހޯދީ ޔޫރަޕުގެ ގިނަ ކުލަބުތަކަކުން އޭނާ ހޯދުމުގެ ޝައުޤުވެރިކަން ފާޅުކޮށްފައި ވަނިކޮށެވެ.

ސްޕެއިންގެ ބައެއް މީޑިއާ ތަކުގައި ބުނެފައިވާ ގޮތުން ރެއާލުން އެންޑްރިކް ދޫކޮށްލުމުގެ ފުރުސަތު އެބަ އޮތެވެ. އެގޮތުން ރެއާލް އިން އޮތީ ލޯނު އެއްބަސްވުމެއްގެ ދަށުން ވިޔަސް، އެންޑްރިކް ދޫކޮށްލަން ބޭނުންވެފައި ކަމަށް ބުނެފައިވެ އެވެ. އެހެން ނަމަވެސް، ރެއާލްގެ މަސްދަރަކާ ހަވާލާދީ މީޑިއާ ތަކުގަައި ބުނެފައިވާ ގޮތުގައި، އެންޑްރިކް ދޫކޮށްލުމަކީ އެ ކުލަބުން ގެންގުޅޭ ވިސްނުމެއް ނޫނެވެ. ޚާއްސަކޮށް ލޯނު އެއްބަސްވުމެއްގެ ދަށުން ވެސް، އެންޑްރިކް ދޫކޮށްލަން ރެއާލުން ބޭނުން ނުވާ ކަމަށް ބުނެފައިވެ އެވެ. އަދި ސައުތެމްޓަން އިން އޭނާ ހޯދަން ޝައުޤުވެރިކަން ފާޅު ކޮށްފައިވާ ވާހަކަ އާއި، އެކަމާ ގުޅޭ މަޝްވަރާ ކުރެވިފައިވާ ވާހަކަ އަކީ ދޮގެއް ކަމަށް ވެސް ބުނެފައިވެ އެވެ.

ރެއާލަށް ބަދަލުވީ ފަހުން އެންޑްރިކް ވަނީ މިހާތަނަށް އެ ކުލަބަށް 10 މެޗު ކުޅެދީފަ އެވެ. އަދި އޭނާ ވަނީ ރެއާލަށް ދެ ލަނޑު ޖަހައިދީފަ އެވެ. އޭނާއާ ގުޅޭ ގޮތުން ރެއާލްގެ ކޯޗު ކާލޯ އަންޗެލޮޓީ މީގެ ކުރިން ބުނެފައި ވަނީ، އެންޑްރިކް އަކީ ރެއާލްގެ ސިސްޓަމްގައި ކުޅެވޭނެ ފެންވަރުގެ ކުޅުންތެރިޔެއް ކަމަށާއި، އޭނާ އަކީ ރެއާލްގައި ވިދާލާނެ ކުޅުންތެރިޔަކަށް ވާނެ ކަމަށެވެ.