ރައްޔިތުންގެ މަޖިލީހުގެ މެންބަރުން އިންތިޚާބުވާ އިރު ތިބި ޕާޓީ ނޫން އެހެން ސިިޔާސީ ޕާޓީ އަކަށް ބަދަލު ވެއްޖެ ނަމަ ގޮނޑި ގެއްލޭ ގޮތަށް ޤާނޫނު އަސާސީ އަށް ބަދަލު ގެނައުމަށް ސަރުކާރުން ހުށަހަޅައިފިއެވެ.

ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އަށް މި ބަދަލު ގެނައުމުގެ ބިލުގެ ސަރުކާރުގެ ފަރާތުން ބުދަ ދުވަހު މަޖިލީހަށް ހުށަހެޅުއްވީ ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ ހުޅުދޫ ދާއިރާގެ މެންބަރު މުޙައްމަދު ޝާހިދުއެވެ.

މިފަދަ ބަދަލެއް ޤާނޫނު އަސާސީ އަށް މި ހުށަހެޅީ ރައްޔިތުންގެ މަޖިލީހުގެ މެންބަރުން އިންތިޚާބުވާ އިރު ތިބި ޕާޓީ ނޫން އެހެން ޕާޓީއަކަށް ސޮއިކޮށްފި ނަމަ މަގާމުން އިސްތިއުފާ ދޭންޖެހޭ ގޮތަށް އެކުލަވާލާފައިވާ އެންޓި ޑިފެކްޝަން ގާނޫނުގެ މާއްދާ އެއް ބާތިލް ކުރުމަށް ހައި ކޯޓަށް މައްސަލައެއް ހުށަހަޅާފައި ވަނިކޮށެވެ.

އެ ޤާނޫނުގެ ތިން ވަނަ މާއްދާ އުވާލަން ހުށަހަޅާފައި ވަނީ އަމިއްލަ ފަރާތަކުންނެވެ.

އެންޓި ޑިފެކްޝަން ގާނޫނުގެ ތިން ވަނަ މާއްދާ އުވާލަން ހުށަހަޅާފައި ވަނީ ޕާޓީ ބަދަލުކޮށްފި މެންބަރަކު އިސްތިއުފާ ދޭންޖެހޭނެ ކަމަށް ގާނޫނުގައި ބުނެފައި ވަނީ ގާނޫނު އަސާސީވއާ ހިލާފަށް ކަމަށް ޤަބޫލު ކުރާތީ ކަމަށް ވަނީ ބުނެފައެވެ.

މި ބިލަކީ 2024 އެޕްރީލް މަހުގެ 1 ވީ ހޯމަ ދުވަހު ބޭއްވި ރައްޔިތުންގެ މަޖިލީހުގެ ފުރަތަމަ ދައުރުގެ 20 ވަނަ ޖަލްސާގައި ފާސްކުރި ބިލެކެވެ. އެންޓި ޑިފެކްޝަން ބިލު (ޤާނޫނު ނަންބަރު: 2024/3) ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ތަސްދީގު ކުރައްވާފައި ވަނީ އެޕްރީލް 16 ގައެވެ.

ޕާޓީ ބަދަލު ކޮށްފި ނަމަ ގޮނޑި ގެއްލޭ ގޮތައް ގާނޫނު އަސާސީ އަށް ބަދަލު ގެނައުމަށް ސަރުކާރުން ހުށަހަޅާފައި ވަނީ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 73 ވަނަ މާއްދާގެ (ރ) ގެ ފަހަތައް އަކުރެއް އިތުރުކޮށްގެންނެވެ.

މިގޮތުން ގާނޫނު އަސާސީ އަށް ގެންނަ ބަދަލާއެކު ރައްޔިތުންގެ މަޖިލިހަށް ހޮވިފައިވާ މެމްބަރަކު ތިން ހާލަތެއްގައި އެމީހަކު ރައްޔިތުންގެ މަޖިލީހުގެ މެމްބަރު ކަމުން ވަކިވާނެ އެވެ.

އެއީ،

- ވަކި ސިޔާސީ ޕާޓީއެއްގެ ފަރާތުން ވާދަ ކޮށްގެން ރައްޔިތުންގެ މަޖިލިހަށް އިންތިޚާބު ވުމަށްފަހު، އެ މެންބަރަކު ރައްޔިތުންގެ މަޖިލިހަށް އިންތިޚާބުވި ރައްޔިތުންގެ މަޖިލީހުގެ އުމުރުގެ ތެރޭގައި، އެ މެންބަރަކު ތަމްސީލު ކުރާ ސިޔާސީ ޕާޓީން އަމިއްލަ އަށް ވަކިވުން ނުވަތަ އެ ސިޔާސީ ޕާޓީގެ މެންބަރު ކަމުން ގާނޫނުގައި ބަޔާން ކުރާ ގޮތުގެ މަތިން ވަކި ކުރުން ނުވަތަ އެ މެންބަރަކު ތަމްސީލު ކުރާ ސިޔާސީ ޕާޓީ ނޫން އެހެން ސިޔާސީ ޕާޓީއެއްގެ މެންބަރަކަށް ވުމާއި،

- ރައްޔިތުންގެ މަޖިލީހުގެ މެންބަރަކު، އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ އުމުރުގެ ތެރޭގައި، އެ މެމްބަރަކު ތަމްސީލު ކުރާ ސިޔާސީ ޕާޓީން އަމިއްލަ އަށް ވަކިވުން ނުވަތަ އެ ސިޔާސީ ޕާޓީގެ މެންބަރު ކަމުން ގާނޫނުގައި ބަޔާން ކުރާ ގޮތުގެ މަތިން ވަކިކުރުން ނުވަތަ އެ މެމްބަރަކު ތަމްސީލު ކުރާ ޕާޓީ ނޫން އެހެން ސިޔާސީ ޕާޓީއެއްގެ މެންބަރަކަށް ވުމާއި، އަދި

- އަމިއްލަ ގޮތުން ވާދަ ކޮށްގެން ރައްޔިތުންގެ މަޖިލީހަށް އިންތިޚާބު ވުމަށްފަހު، އެ މެންބަރަކު ރައްޔިތުންގެ މަޖިލީހަށް އިންތިޚާބުވި ރައްޔިތުންގެ މަޖިލީހުގެ އުމުރުގެ ތެރޭގައި ސިޔާސީ ޕާޓީ އެއްގެ މެންބަރަކަށް ވުމެވެ.

ސަރުކާރުން ކުއްލި ގޮތަކަށް ގާނޫނު އަސާސީ އަށް މި ބަދަލު ގެންނަން ހުށަހެޅި އިރު، 19 ވަނަ މަޖިލީހުގައި އެމްޑީޕީ ތަމްސީލު ކުރި 13 މެމްބަރުން ޕީއެންސީ އަށް ވަނީ ގެންގޮސްފައެވެ. އޭގެ އިތުރުން 20 ވަަނަ މަޖިލީހަށް އަމިއްލަ ގޮތުން އިންތިޚާބުވި ބައެއް މެންބަރުން ވެސް ވަނީ ރައީސުލްޖުމްހޫރިއްޔާގެ ހާޒިރުގައި ޕީއެންސީ އަށް ސޮއިކޮށްފައެވެ.