ޣައްޒާ އަދި ލުބުނާނުގައި ހިނގަމުންދާ ހަނގުރާމަ މެދުއިރުމަތިން ބޭރަށް ފެތުރިދާނެ ކަމުގެ އިންޒާރު އިރާނުގެ ފޮރިން މިނިސްޓަރު އައްބާސް އަރަގްޗީ ހޮނިހިރު ދުވަހު ދެއްވައިފިއެވެ.

"ދުނިޔެއަށް އެނގެން ޖެހޭނެ ހަނގުރާމަ ފުޅާވެއްޖެ ނަމަ، އޭގެ ނޭދެވޭ އަސަރުތައް ހަމައެކަނި ހުޅަނގު އޭޝިއާ ސަރަޙައްދަށް ޖަމާވެފައި ނޯންނާނެކަން. ނާމާންކަމާއި ހަމަނުޖެހުން އެހެން ސަރަޙައްދު ތަކަށްވެސް، އަދި ވަރަށް ދުރު ހިސާބު ތަކަށްވެސް ފެތުރިދާނެ،" އަރަގްޗީ އީރާނުގެ ސަރުކާރު ޓީވީން ދެއްކެވި ވާހަކަފުޅެއްގައި ވިދާޅުވިއެވެ.

އިރާނުގެ އެންމެ ދުޝްމަނު އިޒްރޭލުން ގެންދަނީ ޣައްޒާ ސްޓްރިޕްގައި އަހަރަކަށް ވުރެ ގިނަ ދުވަސްވީ އަނިޔާވެރި ހަނގުރާމައިގައި ކޮންމެ ދުވަހަކު އެތައް ބަޔަކު ޝަހީދުކުރަމުންނެވެ. ޣައްޒާ އަށް އިޒްރޭލުން ހަމަލާދޭން ފެށީ 2023 ވަނަ އަހަރުގެ އޮކްޓޯބަރު މަހުން ފެށިގެންނެވެ.

ފަހަކަށް އައިސް އިޒްރޭލުން ވަނީ ހަނގުރާމައިގެ މިސްރާބު ލުބުނާނަށް ބޮޑަށް އަމާޒު ކޮށްފައެވެ. ދެކުނު ލުބުނާނުގައި އިޒްރޭލުން ގެންދަނީ ސެޕްޓެމްބަރު މަހުން ފެށިގެން ހިޒްބުﷲ އާ ދެކޮޅަށް ފުރިހަމަ ހަނގުރާމައެއް ކުރިއަށް ގެންދަމުންނެވެ.

ހަމަލާތައް ފުޅާ ވަމުން ގޮސް އޮކްޓޯބަރު 26 ވަނަ ދުވަހު އިޒްރޭލުން ވަނީ އިރާނުގެ އަސްކަރީ ތަންތަނަށް ވައިގެ ހަމަލާތަކެއް ދީފައެވެ. މިއީ އޮކްޓޯބަރު 1 ގައި ތެހެރާނުން އިޒްރޭލަށް ދިން ހަމަލާއަށް ދިން ރައްދެއް ކަމަށް އިޒްރޭލުން ބުނެފައިވާއިރު، އިރާނުން އިޒްރޭލަށް ހަމަލާ ދިނީ ހަމާސް އާއި ހިޒްބުﷲ ގެ އިސްވެރިން ތަކަކާއި އީރާނުގެ ރިވޮލިއުޝަނަރީ ގާޑްސްގެ ޖެނެރަލެއް އިޒްރޭލުން އަވަހާރަކޮށްލުމުން އެކަމުގެ ބަދަލު ހިފުމުގެ ގޮތުންނެވެ.

އިރާނުގެ އޮފިޝަލުން ބުނާ ގޮތުގައި އިޒްރޭލުގެ އޮކްޓޯބަރު 26 ގެ ހަމަލާގައި އީރާނުން 4 ސިފައިން މަރުވެފައިވެއެވެ.

އޭގެ އިތުރުން އީރާނުގެ އާންމު ރައްޔިތަކު މަރުވި ކަމަށްވެސް މީޑިއާއިން ރިޕޯޓުކޮށްފައިވެއެވެ.

ބަދަލު ހިފުމުގެ ގޮތުން އިޒްރޭލަށް ހަމަލާ ނުދިނުމަށް އިޒްރޭލާއި އެމެރިކާ އިން އިންޒާރުދީފައި ވީނަމަވެސް، ތެހެރާނުން ވަނީ އިޒްރޭލުގެ ކިބައިން ބަދަލު ހިފާނެ ކަމަށް ވައުދުވެފައެވެ.

އީރާނުގެ ރައީސް މަސްއޫދު ޕެޒެޝްކިއާން ވިދާޅުވެފައިވަނީ ޣައްޒާ އާއި ލުބުނާނުގައި އިޒްރޭލުން ހިންގަމުންދާ ހަނގުރާމަ ހުއްޓާލައިފި ނަމަ އީރާނުން ދޭ ރައްދުގެ ކުޑަބޮޑު މިނަށް ބަދަލު އަތުވެދާނެ ކަމަށެވެ.

އަނެއްކޮޅުން ބުރާސްފަތި ދުވަހު، އީރާނުގެ އެންމެ މަތީ ވެރިޔާ އަލީ ޚާމަނާއީގެ މުޝީރަކު ވިދާޅުވީ، އިޒްރޭލަށް ރައްދު ހަމަލާއެއް އީރާނުން ދޭން ވާނީ ވަރަށް ވިސްނުންތެރިކަމާ އެކުގައި ކަމަށެވެ.

"އިޒްރޭލުގެ މަޤްޞަދަކީ ހަނގުރާމަ އީރާނަށް ގެނައުން. އަޅުގަނޑުމެން ވިސްނުންތެރިކަމާއެކު އެމީހުންގެ މަޅީގައި ނުޖެހެން ވިސްނަން ޖެހޭނެ،" އީރާނުގެ ލީޑަރު ގެ މުޝީރު އަލީ ލާރިޖާނީ ދައުލަތުގެ ޓީވީގައި ވިދާޅުވިއެވެ.