ތުރުކީގެ ވެރިރަށް އަންކަރާ ކައިރީގައި އޮންނަ ތުރުކީ އެއަރޯސްޕޭސް އިންޑަސްޓްރީޒް (ޓީއޭއައި)ގެ ހެޑްކުއާޓަރަށް ދިން ހަމަލާއެއްގައި މަދުވެގެން 5 މީހުން މަރުވެ، 22 މީހުން ޒަޚަމްވެއްޖެއެވެ.

ތުރުކީގެ ނައިބު ރައީސް ޖެވްދެޓް ޔިލްމަޒް ވިދާޅުވި ގޮތުގައި މަރުވި މީހުންގެ ތެރޭގައި ހިމެނެނީ ޓީއޭއައިގެ 4 މުވައްޒަފުންނާއި ޓެކްސީ ޑްރައިވަރެކެވެ.

ބުދަ ދުވަހު ދިން މިހަމަލާ ތުރުކީގެ އޮފިޝަލުން ސިފަކުރައްވާފައިވަނީ ޓެރަރިސްޓް ހަމަލާއެއްގެ ގޮތުގައެވެ.

މި ހަމަލާއާ ގުޅިގެން ތުރުކީގެ އިންޓީރިއަރ މިނިސްޓަރ އަލީ ޔެރްލިކަޔާ ވިދާޅުވެފައިވަނީ "ހަމަލާ ދިން އަންހެނަކާ ފިރިހެނަކު މަރާލާފައިވާ ކަމަށާއި، މި ހަމަލާއަކީ ކުރްދު އަސްކަރީ ޖަމާޢަތް ކަމުގައިވާ ޕީކޭކޭއިން ދިން ހަމަލާއެއް ކަމަށް ތުހުމަތުކުރެވޭ،" ކަމަށެވެ. ޔެރްލިކަޔާ އިތުރަށް ކަށަވަރުކުރެއްވި ގޮތުގައި ޒަޚަމްވި 22 މީހުންގެ ތެރޭގައި 7 ސްޕެޝަލް އޮޕްސް ފޯސަސްގެ މެންބަރުން ހިމެނެއެވެ.

ޕީކޭކޭއަކީ ތުރުކީ، އެމެރިކާ އަދި އިނގިރޭސިވިލާތުގައި ޓެރަރިސްޓް ޖަމާޢަތެއްގެ ގޮތުގައި ކަނޑައަޅާފައިވާ ޖަމާޢަތެކެވެ. އަދި 1980 ގެ އަހަރުތަކުން ފެށިގެން ތުރުކީގައި ގިނަ އަދަދެއްގެ ކުރްދު މައިނޯރިޓީއަށް ޙައްޤުތަކެއް ހޯދުމަށްޓަކައި ތުރުކީ ދައުލަތާ ދެކޮޅަށް ހަނގުރާމަ ކުރަމުން އަންނަ ޖަމާޢަތެކެވެ.

ނަމަވެސް، މި ހަމަލާގެ ޒިންމާ މިހާތަނަށް އެއްވެސް ފަރާތަކުން ނަގާފައެއް ނުވެއެވެ.

އިންޓީރިއަރ މިނިސްޓަރ އަލީ ޔެރްލިކަޔާ މިހެން ވިދާޅުވެފައިވާއިރު އުތުރު ޢިރާޤާއި އުތުރު ސީރިއާގައި ހުރި ކުރްދު އަސްކަރީ ބޭސްތަކަށް ވައިގެ ހަމަލާތަކެއް ދީފައިވާ ކަމަށް ތުރުކީގެ ދިފާއީ ވުޒާރާއިން ބުދަ ދުވަހުގެ ރޭ ވަނީ އިއުލާންކޮށްފައެވެ.

ޓީއޭއައި އަށް ދިން މި ހަމަލާއާ ގުޅިގެން ސޯޝަލްމީޑިއާގައި ދައުރުވަމުންދާ އެކި ވީޑިއޯތަކުން ފެންނަ ގޮތުގައި، އަންކަރާގެ ބޭރުން 40 ކިލޯމީޓަރު (25 މޭލު) ދުރުގައި އޮންނަ ތުރުކީ ޓީއޭއައިގެ ގޭޓު ކައިރީގައި ދެ މީހަކު ބަޑިޖަހަމުން ދިޔަ މަންޒަރު ފެނެއެވެ.

މީޑިއާ ރިޕޯޓްތަކުގައިވާ ގޮތުން ހަމަލާދޭ މީހުން ފުރަތަމަ ޓެކްސީ ޑްރައިވަރު މަރާލައި، އޭނާގެ ޓެކްސީއަށް އަރާ އިތުރު ހަމަލާތައް ދީފައިވެއެވެ. މީގެއިތުރުން، ހަމަލާދީފައިވަނީ މުވައްޒަފުންގެ ޑިއުޓީ ޝިފްޓް ބަދަލުވި ވަގުތުގައި ކަމަށާއި، ހަމަލާއާ ގުޅިގެން ރައްކާތެރި ތަންތަނަށް މުވައްޒަފުން ބަދަލުކޮށްފައިވާ ކަމަށް ރިޕޯޓްތައް ބުނެއެވެ.

ބްރިކްސް ސަމިޓަށް ވަޑައިގެން ރަޝިއާގައި ހުންނެވި ތުރުކީގެ ރައީސް ރެޖެޕް ޠައްޔިބް އުރުދުޣާން ވަނީ ރަޝިއާގެ ރައީސް ވްލަދިމީރް ޕުޓިންއާ ބައްދަލުކުރައްވާ ދެއްކެވި ވާހަކަފުޅެއްގައި މި ހަމަލާ އަކީ ނުބައި ޓެރަރިސްޓް ހަމަލާއެއް ގޮތުގައި ސިފަކުރައްވާ ހަރުކަށި އިބާރާތުން ކުށްވެރިކުރައްވާފައެވެ. އޭގެ ފަހުން އެކްސް ގައި ކުރެއްވި ޕޯސްޓެއްގައި އޭނާ ވިދާޅުވެފައިވަނީ، "ސެކިއުރިޓީ ބާރުތަކުން ހަމަލާގެ ނުރައްކާ ވަރަށް އަވަހަށް ނައްތާލި ކަމަށާއި، އެއްވެސް ޓެރަރިސްޓް ޖަމާޢަތަކަށް ނުވަތަ ތުރުކީއަށް ހަމަލާއެއް ދޭން މަސައްކަތްކުރާ އެއްވެސް ބަޔަކަށް އެމީހުންގެ މަޤްޞަދު ޙާޞިލެއް ނުކުރެވޭނެ،" ކަމަށެވެ.

ތުރުކީ އިން ވަނީ މިހަމަލާއާ ގުޅިގެން މީޑިއާ ބްލެކްއައުޓެއް ތަންފީޒުކޮށްފައިވެއެވެ. އަދި މިހަމަލާއަށްފަހު، ތުރުކީގެ ގިނަ ސަރަޙައްދުތަކުގައި ޔޫޓިއުބް، އިންސްޓަގްރާމް، ފޭސްބުކް އަދި އެކްސް ފަދަ ސޯޝަލް މީޑިއާ ސައިޓްތައް ބޭނުންނުކުކުރެވޭ ކަމަށް ގިނަ ފަރާތްތަކަކުން ވަނީ ރިޕޯޓްކޮށްފައެވެ.

ތުރުކީގެ ރޭޑިއޯ އަދި ޓީވީ ސުޕްރީމް ކައުންސިލްގެ ރައީސް އެބޫބަކިރު ޝާހިން ވަނީ މި ހާދިސާއާ ގުޅުންހުރި ހުރިހާ ފޮޓޯތަކެއް ސޯޝަލް މީޑިއާއިން ނަގަންޖެހޭނެ ކަމަށް ވިދާޅުވެ އިންޒާރުދެއްވާފައެވެ. އަދި ޓެރަރިޒަމްގެ މަޤްޞަދު ހާޞިލުވާނެ ފޮޓޯތައް ޝެއަރނުކުރުމަށް އިލްތިމާސްކުރައްވާފައެވެ.

ޓީއޭއައިއަކީ ވިޔަފާރި އަދި އަސްކަރީ ބޭނުމަށް އެކި ބާވަތުގެ މަތިންދާބޯޓު ފަރުމާކޮށް، ތަރައްޤީކޮށް އަދި އުފައްދަމުން އަންނަ ކުންފުންޏެކެވެ. އެއީ ނޭޓޯގެ މެންބަރު ޤައުމުން އެމެރިކާގައި ފަރުމާކޮށްފައިވާ އެފް-16 ފައިޓަރ ޖެޓްތައް އުފެއްދުމަށް ލައިސަންސް ދީފައިވާ ކުންފުންޏެވެ. އަދި ޓީއޭއައިއިން ތުރުކީގެ އަސްކަރީ ބޭނުމަށް ކުރީގެ މަތިންދާބޯޓުތައް މޮޑަނައިޒް ކުރުމުގައިވެސް މުހިއްމު ދައުރެއް އަދާކުރެއެވެ. އެ ކުންފުނީގެ މައިގަނޑު ވެރިފަރާތްތަކަކީ ތުރުކީގެ ހަތިޔާރުއެޅި ބާރުތަކާއި، ތުރުކީ ސަރުކާރުގެ ސިވިލް ބާރެވެ. މި ސިވިލް ބާރުގެ މަސްއޫލިއްޔަތަކީ ޤައުމުގެ ދިފާޢީ ޤާބިލުކަން އިތުރުކޮށް، އަސްކަރީ ތަކެތި ހޯދުމުގެ ކަންކަން ބެލެހެއްޓުމެވެ.

ޓީއައިއޭ އަށް އަމާޒުކޮށް މިހަމަލާ ދީފައި މިވަނީ ދިފާޢީ އަދި އެއަރޯސްޕޭސް އިންޑަސްޓްރީތަކުގެ ވިޔަފާރި މައުރަޒެއް އިސްތަންބޫލްގައި ކުރިއަށްދަނިކޮށެވެ.