ދިވެހިރާއްޖެ އިން އިންޑިއާއަށް ކަނޑައަޅުއްވާފައި ހުންނަވާ އައު ސަފީރު ކަމުގެ މަޤާމަށް އައިޝަތު އަޒީމާ އައްޔަނުކުރެއްވުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވައިފިއެވެ.
އަޒީމާ މި މަޤާމަށް އައްޔަނުކުރެއްވުމަށް ރައީސް ޑރ މުއިއްޒު ނިންމަވާފައިމިވަނީ އެ މަޤާމުގައި މިހާރު ހުންނެވި އިބްރާހިމް ޝަހީބުގެ މަޤާމުގެ މުއްދަތު ހަމަވާތީ އޭނާގެ ބަދަލުގައެވެ.
ހޯމަ ދުވަހު އޭނާ މި މަޤާމަށް އައްޔަނުކުރެއްވުމަށް މަޖިލީހަށް ފޮނުއްވުމުން، މަޖިލީހުގެ ރިޔާާސަތުން މިހާރު ވަނީ އެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުއްވާފައެވެ.
1988 ވަނަ އަހަރު ފޮރިން މިނިސްޓްރީގެ ވަޒީފާއަށް ގުޅިވަޑައިގަތް އަޒީމާ މީގެކުރިން ވަނީ ރާއްޖެއިން ޗައިނާއަށް ކަނޑައަޅުއްވާފައި ހުންނަވާ ސަފީރުގެ މަގާމާއި އިނގިރޭސިވިލާތުގެ ލަންޑަންގައި ހުންނަ ދިވެހި އެމްބަސީގެ ޑެޕިއުޓީ އެމްބެސެޑަރުގެ މަޤާމުގެ އިތުރުން ޚާރިޖީ ވުޒާރާގެ އެޑިޝަނަލް ސެކްރެޓަރީގެ މަޤާމާއި ޖޮއިންޓް ސެކްރެޓަރީގެ މަޤާމުވެސް އަދާކުރައްވާފައެވެ.
