ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ސަސްޕެންޑު ކޮށްފައި އޮތް، ފުރަތަމަ ޑިވިޝަންގެ ކުލަބު ވެލެންސިއާގެ ސަސްޕެންޝަށް އުވިއްޖެ އެވެ.

ވެލެންސިއާ ސަސްޕެންޑު ކުރުމަށް އެފްއޭއެމްގެ ޑިސިޕްލިނަރީ ކޮމެޓީން ނިންމީ މިއަހަރުގެ މާޗު މަހުގެ ތެރޭގަ އެވެ. އެފްއޭއެމް އަށް ވެލެންސިއާގެ މައްސަލަ ހުށަހެޅީ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލާ ގާތް ގުޅުން އޮންނަ، ޙަސަން ވަޙީދު (ދޮނާ) އެވެ. އެ މައްސަލައިގައި އޭނާ ބުނެފައި ވަނީ، ވެލެންސިއާގެ ހިންގާ ކޮމެޓީން އޭނާ ވަކިކޮށްފައި ވަނީ ޤަވާއިދާ ޚިލާފަށް ކަމަށާއި، އެ މައްސަލަ ބަލައި އެކަމުގައި ޝާމިލުވެފައިވާ ފަރާތްތަކަށް ފިޔަވަޅު އަޅައި ދިނުމަށެވެ. އަދި އެކަމާ ގުޅުން ހުރި ލިޔެކިޔުންތައް އުފައްދައި، ކުލަބުގެ އަހަރީ އާންމު ޖަލްސާ (އޭޖީއެމް) ބޭއްވި ކަމަށް ދައްކައި އޮޅުވާލައިގެން ކަންކަން ތަރުތީބު ކޮށްފައިވާ ކަމަށް ވެސް ބުނެފައިވެ އެވެ.

އެ މައްސަލަ ބެލުމަށްފަހު އެފްއޭއެމްގެ ޑިސިޕްލިނަރީ ކޮމިޓީން ނިންމާފައި ވަނީ، ވެލެންސިއާގެ އޭޖީއެމް އަދި ހިންގާ ކޮމިޓީގެ އިންތިޚާބު، އެ ކުލަބުގެ ހިންގާ ޤަވާއިދާއި އެފްއޭއެމްގެ އަސާސީ ޤަވާއިދު އަދި އިލެކްޓޯރަލް ކޯޑާއި އެއްގޮތްވާގޮތުގެ މަތިން ބާއްވައި، ހިންގާ ކޮމިޓީ ސައްހަ ގޮތުގައި އިންތިޚާބުކޮށް ނިމެންދެން، ކުލަބު ވެލެންސިއާ ފުޓުބޯޅައިގެ އެންމެހައި ޙަރަކާތްތަކުން ސަސްޕެންޑު ކުރުމަށެވެ. އަދި އެ ނިންމުން އިސްތިއުނާފު ކުރުމަށް ވެލެންސިއާ މުހުލަތެއް ވެސް އޭރު ވަނީ ދީފަ އެވެ.

ވެލެންސިއާގެ ސަސްޕެންޝަން އުވުނީ، ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ނިންމުމެއްގެ ދަށުންނެވެ. އެގޮތުން ފީފާ އިން ނިންމާފައި ވަނީ، މިއަހަރުގެ ފެބްރުވަރީ މަހުގެ ތެރޭގައި އެފްއޭއެމުން ބޭއްވި އެ އިދާރާގެ ޚާއްސަ ގޮތުން ބާއްވާ ކޮންގްރެސް ބަލައި ނުގަތުމަށެވެ. ފީފާގެ މަންދޫބުން ވެސް ބައިވެރިވެ، މޮނިޓާ ކުރި އެ ކޮންގްރެސްގެ އެއްވެސް ނިންމުމެއް ވެސް ބަލައި ނުގަންނަން ފީފާ އިން ވަނީ ނިންމައިފަ އެވެ. ވެލެންސިއާ ސަސްޕެންޑު ކުރުމަށް ނިންމި ޑިސިޕްލިނަރީ ކޮމެޓީ އަކީ އެ ކޮންގްރެސް އިން އައްޔަން ކޮށްފައިވާ ކޮމެޓީ އަކަށްވާއިރު، ކޮންގްރެސް ބަަލައި ނުގަންނަން ނިންމުމުން، އެ ކޮމެޓީ ވެސް ބާތިލުވާނެ އެވެ. އެހެންވެ، ކުލަބު ވެލެންސިއާގެ ސަސްޕެންޝަން ވަނީ އުވިފަ އެވެ.

ފީފާ އިން ރާއްޖެ ނޯމަލައިޒް ކޮށްފައިވާއިރު، މިދިޔަ ހަފުތާގެ ތެރޭގައި ވަނީ ފީފާގެ ވަފުދެއް ވެސް ރާއްޖެ އަތުވެފަ އެވެ. ހަ މެމްބަރުންގެ މައްޗަށް އެކުލެވޭ އެ ވަފުދާއި، ނޯމަލައިޒިން ކޮމެޓީއާ ދެމެދު ވަނީ ގިނަ ކަންތައްތަކަކަށް މަޝްވަރާ ކޮށްފަ އެވެ. އެގޮތުން އެފްއޭމްގެ މާލީ މައްސަލަ އާއި، ކުލަބުތަކުގެ މައްސަލައިގެ އިތުރުން، ދަރަނީގެ މައްސަލަތަކަށް ވެސް ވަނީ މަޝްވަރާ ކޮށްފަ އެވެ.