ސެންޓްރަލް އޭޝިއާ ވޮލީބޯޅަ އެސޯސިއޭޝަން (ކާވާ) އަންހެން ވޮލީ ބޯޅަ ކުލަބު ޗެމްޕިއަންޝިޕް ނޭޕާލް ޕޮލިހުން ކާމިޔާބު ކޮށްފި އެވެ.

ހޮނިހިރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފައިނަލް މެޗު ނޭޕާލް ޕޮލިހުން ކާމިޔާބު ކުރީ، އުޒްބަކިސްތާންގެ ހޫމޯ ވޮލީބޯޅަ ކުލަބުގެ މައްޗަށް ކުރި ހޯދައިގެންނެވެ. އެ މެޗު ނޭޕާލް ޕޮލިހުން ކާމިޔާބު ކުރީ ސީދާ ތިން ސެޓުންނެވެ.

ނޭޕާލް ޕޮލިހުން މެޗުގެ ފުރަތަމަ ސެޓު ނޭޕާލް ޕޮލިހުން ކާމިޔާބު ކުރީ 25-16ންނެވެ. ނަމަވެސް، މެޗުގެ ދެ ވަނަ ސެޓާއި، ތިން ވަނަ ސެޓުގައި ފެނުނީ ވާދަވެރި ކުޅުމެކެވެ. ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މި ސެޓު ނޭޕާލް ޕޮލިހުން ކާމިޔާބު ކުރީ 25-22ންނެވެ. މެޗުގެ ތިން ވަނަ ސެޓު 25-23ން ކާމިޔާބުކޮށް، ނޭޕާލް ޕޮލިހުން ވަނީ މުބާރާތުގެ ޗެމްޕިއަންކަން ހޯދައިފަ އެވެ.

ރާއްޖޭގައި ކުރިއަށް ދިޔަ މުބާރާތުގައި ވަނީ ހަ ކުލަބެއް ވާދަކޮށްފަ އެވެ. މުބާރާތުގައި ރާއްޖެ އިން ވާދަކޮށްފައި ވަނީ ޕޮލިސް ކުލަބުގެ އިތުރުން، ކުލަބު ވެމްކޯ އެވެ. ވެމްކޯ އިން ވަނީ މުބާރާތުގެ ތިން ވަނަ ހޯދައިގަ އެވެ. ތިން ވަނަ ހޮވަން ކުޅުނު މެޗުގައި ވެމްކޯ އިން ވަނީ ލަންކާ އެއާފޯސްގެ މައްޗަށް ކުރި ހޯދައިފަ އެވެ. އެއީ މެޗުގެ ފުރަތަމަ ދެ ސެޓު ލަންކާ އެއާފޯސް އިން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ކާމިޔާބު ކޮށްގެންނެވެ.