ސްޕެއިންގެ އެތުލެޓިކޯ މެޑްރިޑަށް ކުޅެމުން އަންނަ އާޖެންޓީނާގެ ހޫލިއަން އަލްވަރޭޒްއާ މެދު ފުރިހަމަ އަށް އިތުބާރު އޮންނަ ކަމަށާއި، އޭނާ އާއެކު ޓީމުން ބަދަލުތަކެއް ފެންނާނެ ކަމަށް އެ ޓީމުގެ ކޯޗު ޑިއޭގޯ ސިމޯން ބުނެފި އެވެ.
މެންޗެސްޓަރ ސިޓީ އަށް ކުޅެމުން އައި އަލްވަރޭޒް ވަނީ ދާދި ފަހުން އެތުލެޓިކޯ އަށް ބަދަލުވެފަ އެވެ. އޭނާ ވަނީ ލީގުގައި އެންމެ ފަހުން ޖިރޯނާއާ ދެކޮޅަށް ކުޅުނު މެޗުގައި ކުޅެފަ އެވެ. ނަމަވެސް މެޗުގެ ވަކި ހިސާބަކުން ވަނީ އަލްވަރޭޒް ބަދަލު ކޮށްފަ އެވެ.
އަލްވަރޭޒްއާ ގުޅޭ ގޮތުން ވާހަކަ ދައްކަމުން ސިމޯން ބުނީ، އަލްވަރޭޒް އަކީ ކިހާ ފެންވަރެއްގެ، އަދި ހުނަރުވެރި ކުޅުންތެރިޔެއްކަން އޭނާ އަށް އިނގޭ ކަމަށެވެ. އަދި ޚާއްސަކޮށް އަލްވަރޭޒްގެ ފަރާތުން އެތުލެޓިކޯ އަށް ލިބޭ ކަންކަމާއި، ކުރާނެ ފައިދާ އަދި ޓީމަށް އަންނާނެ ބަދަލު ވެސް އިނގޭ ކަމަށް އޭނާ ބުންޏެވެ.
އެހެންކަމުން، އެތުލެޓިކޯ އިން ބޭނުން ވަނީ އަލްވަރޭޒްގެ ކިބައިގައި ހުރި ހުނަރު އެންމެ ފުރިހަމަ ގޮތުގައި ބޭނުން ކުރަން ކަމަށް ކަމަށް ވެސް އޭނާ ވަނީ ބުނެފަ އެވެ. އަނެއްކޮޅުން އަލްވަރޭޒް އަކީ މިހާރު ވެސް ތަފާތު ދައްކަމުން އަންނަ، މުސްތަޤުބަލު އުޖާލާ ކުޅުންތެރިޔެއް ކަމަށް ވެސް ސިމޯން ބުންޏެވެ.
ސިމޯން ބުނީ އެކަމަށްޓަކައި ކުރަން ޖެހޭނެ ކަމަކީ، އަލްވަރޭޒް އާއި ޓީމުގެ އެހެން ކުޅުންތެރިންނާ ރަނގަޅު ގުޅުމެއް އުފެއްދުން ކަމަށެވެ. އެހެން ޓީމެއްގައި ހުރެފައި އަލްވަރޭޒް އެތުލެޓިކޯ އަށް އައިއިރު، އެތުލެޓިކޯ ކުޅެމުން އަންނަ ވައްޓަފާޅި އަށް އަލްވަރޭޒް ފެތެން ދުވަސް ކޮޅެއް ނަގާނެ ކަމަށް ވެސް އޭނާ ބުންޏެވެ.
