ފުޓުބޯޅަ ކެރިއަރުގައި ކުޅެން ޗެލްސީ އަށް ވުރެ ވަކިން ރަނގަޅު އެހެން ކުލަބެއް ނެތް ކަމަށް، ޕޯޗުގަލްގެ ޔާއޯ ފެލިކްސް ބުނެފި އެވެ.
ކުރިން ލޯނު އެއްބަސްވުމެއްގެ ދަށުން ޗެލްސީ އަށް ކުޅެފައިވާ ފެލިކްސް، މިހާރު ވަނީ ދާއިމީ އެއްބަސްވުމެއްގެ ދަށުން އެ ކުލަބަށް ބަދަލުވެފަ އެވެ. ޗެލްސީގެ އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ފެލިކްސް ބުނީ، އަލުން އަނބުރާ ޗެލްސީ އަށް އާދެވުމުން އުފާވާ ކަމަށާއި، ޗެލްސީ އާއެކު މަސައްކަތް ފަށަން ކެތްމަދުވެފައި ހުރި ކަމަށް ވެސް އޭނާ ވަނީ ބުނެފަ އެވެ.
މީގެ ކުރިން ޗެލްސީގައި ކުޅެފައިވާ ދުވަސްތަކަށް އިޝާރާތް ކުރަމުން ފެލިކްސް ބުނީ، އެއީ އުފާވެރި އަދި ހަނދާނުގައި ހުންނަ ދުވަސްތަކެއް ކަމަށެވެ. އަދި އަލުން އެނބުރި ޗެލްސީ އަށްް އަންނަން ބޭނުންވާ ވާހަކަ ވެސް، އޭނާގެ ރަޙުމަތްތެރިން ގާތު ބުނެފައިވާނެ ކަމުގައި ފެލިކްސް ބުންޏެވެ.
މީގެ އިތުރުން ފެލިކްސް ބުނީ ލޯނު އެއްބަސްވުމެއްގެ ދަށުން ޗެލްސީ އަދި ބާސެލޯނާ އަށް ކުޅުނުއިރު، ދާއިމީ ގޮތެއްގައި އެއް ކުލަބެއްގައި ހުންނަން ވެސް ބޭނުންވާ ކަމަށެވެ. އެހެންކަމުން ޗެލްސީ އަށް ވުރެ ވަކިން ރަނގަޅު އެހެން ކުލަބެއް އޮތް ކަމަށް ޤަބޫލު ނުކުރެވޭ ކަމަށް ވެސް ފެލިކްސް ބުންޏެވެ.
ފެލިކްސް ވަނީ މީގެ ކުރިން ޗެލްސީ އަށް ކުޅެދިން 20 މެޗުގައި ހަތަރު ލަނޑު ޖަހައިފަ އެވެ. ލޯނު އެއްބަސްވުމެއްގެ ދަށުން ޗެލްސީ އަށް ކުޅުމަށްފަހު، ދެން ފެލިކްސް ބަދަލުވީ ލޯނު އެއްބަސްވުމެއްގެ ދަށުން ސްޕެއިންގެ ބާސެލޯނާ އަށެވެ. ބާސެލޯނާގައި ފެލިކްސް ވަނީ 44 މެޗު ކުޅެ 10 ލަނޑު ޖަހައިފަ އެވެ. ބާސެލޯނާގެ އެއްބަސްވުން ހަމަވުމުން ފެލިކްސް ވަނީ އެނބުރި އެތުލެޓިކޯ އަށް އަންނަން ޖެހިފަ އެވެ.
