ހުޅުމާލޭގައި ޤާއިމްކުރާ އިންޑޯ ފުޓްސަލް ކޮމްޕްލެކްސް އާއި އެކު މާލެ ސަރަހައްދުގައި ކުޅިވަރުކުޅުމަށް ތޮއްޖެހުން ނިމުމަކަށް އަންނާނެ ކަމަށް މިނިސްޓަރ އޮފް ސްޕޯޓްސް ފިޓްނަސް އެންޑް ރެކްރިއޭޝަން ޢަބްދުالله ރާފިޢު ވިދާޅުވެއްޖެއެވެ.

ބުދަ ދުވަހު މަޖިލީހުގައި ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް ވަނީ ގަލޮޅުގައި ފުޓްސަލް ދަނޑެއް ނެތުމުން އެކަމުގެ ކަންބޮޑުވުން ފާޅުކުރައްވާފައެވެ. އަދި އެކަމަށް ހައްލު ހޯދާދިނުމަށް ކުރަނީ ކޮން ކަމެއްތޯ ސުވާލު ކުރެއްވިއެވެ. މިނިސްޓަރ ވަނީ އިންޑޯ ފުޓްސަލް ކޮމްޕްލެކްސް އެއްގެ މަސައްކަތް ކުރިއަށް ދާ ކަމަށާއި އެކަން ނިމުމުން އެކަމަށް ލުއިކަމެއް ލިބޭނެ ކަމަށް އޭނާ ވިދާޅުވިއެވެ. އެ މަޝްރޫޢުގެ ސަބަބުން ކުޅިވަރު ކުޅޭ ތަންތަން ހޯދުމަށް ފަސޭހަ ވާނެ ކަމަށް މިނިސްޓަރ ވިދާޅުވިއެވެ. އެ ތަނުގައި 5 ފުޓްސަލް ދަނޑު ހަދާނެ ކަމަށް ވެސް މިނިސްޓަރ ވިދާޅުވިއެވެ.

ބުދަ ދުވަހު މިނިސްޓަރ މަޖިލީހަށް ހާޒިރު ކުރީ، ކެންދޫ ދާއިރާގެ މެންބަރު މަޢުރޫފް ޒާކިރު, މިނިސްޓްރީ އޮފް ސްޕޯޓްސް ފިޓްނަސް އެންޑް ރެކްރިއޭޝަންގެ ދަށުން ކުރީގެ ސަރުކާރުން ލައިޓް ޖަހަން ނިންމާފައިވާ ބ.ކެންދޫގެ ފުޓުބޯޅަ ދަނޑުގައި ލައިޓް ޖެހުމުގެ އިތުރުން ފުޓްސެލް ދަނޑެއް އަދި ހޭންޑްބޯލް ކޯޓެއް އެޅޭނީ ކޮންއިރަކުންތޯ ކުރެއްވި ސުވާލަށް ޖަވާބު ހޯއްދެވުމަށެވެ. ބ.ކެންދޫގެ ފުޓުބޯޅަ ދަނޑުގައި ލައިޓް ޖެހުމުގެ މަޝްރޫޢު ނުފަށާ އޮތީ މަސައްކަތް ފަށާފަ ހުއްޓެން ބޭނުން ނުވާތީ ކަމަށް މިނިސްޓަރ ވަނީ އެ ސުވާލަށް ޖަވާބުދެއްވަމުން ވިދާޅުވެފައެވެ.

ބ.ކެންދޫގެ ފުޓުބޯޅަ ދަނޑުގައި ލައިޓް ޖެހުމުގެ މަޝްރޫޢު 2023 ވަނަ އަހަރު އިޢުލާންކުރި ނަމަވެސް އެ މަސައްކަތް އެވާޑްކުރެވިފައި ނުވާ ކަމަށާއި އެ ޕްރޮޖެކްޓް އެވާޑްކުރާނީ މި އަހަރު ކަމަށް މިނިސްޓަރ ވިދާޅުވިއެވެ.

ޕްރޮޖެކްޓްގެ އަގަކީ 2.6 މިލިއަން ރުފިޔާ ކަމަށާއި އެ މަސައްކަތަށް ބަޖެޓްކުރެވިފައި ވަނީ 534،689 ރުފިޔާ ކަމަށް މިނިސްޓަރ ވިދާޅުވިއެވެ. އެ މަސައްކަތަށް ފަށަން ގަސްތުކޮށްފައި ވަނީ މި އަހަރުގެ ހަތަރުވަނަ ކުއާޓާގައި ކަމަށް ވެސް މިނިސްޓަރ ވިދާޅުވިއެވެ. އެ މަސައްކަތް އަހަރުގެ ކުރީކޮޅު ފެށި ނަމަ ހުއްޓޭނެ ކަމަށާއި ބޭނުން ވަނީ ލައިޓުގެ މަސައްކަތް ނުހުއްޓި ކުރިއަށްދާންކަމަށް މިނިސްޓަރ ވިދާޅުވިއެވެ. އަހަރުގެ 4 ވަނަ ކުއާޓާގައި މަސައްކަތް ފަށައިފި ނަމަ އެ މަސައްކަތް ނުހުއްޓި ކުރިއަށް ދާނެ ކަަމަށް އެ މަނިކުފާނު ވިދާޅުވިއެވެ.

އެ ރަށުގެ ހޭންޑް ބޯލް ކޯޓުގެ މަސައްކަތް ކުރިއަށް ގެންދިއުމަށް ކައުންސިލުން އިއުލާން ކުރި އަގަށް 20 ޑިސެމްބަރ 2022ގައި ހުއްދަ ދީފައިވާ ކަމަށް އޭނާ ވިދާޅުވިއެވެ. އެ މަސައްކަތުގެ އަގަށް ވާ 50% ފައިސާ، 735،320.42 ރުފިޔާ ކައުންސިލަށް ވާނީ ދޫކޮށްފައި ކަމަށް މިނިސްޓަރ ވިދާޅުވިއެވެ. ނަމަވެސް ހޭންޑްބޯލް ކޯޓު ހަވާލުކުރާ ބިން ކައުންސިލުން މަސައްކަތް ކުރާ ފަރާތާއި ހަވާލު ނުކޮށް ވާތީ އަމަލީ މަސައްކަތް ލަސްވާ ކަމަށް މިނިސްޓަރ ވިދާޅުވިއެވެ. އެ ސައިޓް ހަވާލުކުރުން ލަސްވަނީ އެއި ޖަމިއްޔާއަކަށް ދޫކޮށްފައިވާ ބިމަކަށް ވާތީ ނިންމަން ޖެހޭ ކަންކަން ނިންމަން ކޯޓު މަރުހަލާއިން ލަސްވާތީ ކަމަށް ވެސް މިނިސްޓަރ ވިދާޅުވިއެވެ. އެ ކޯޓުގެ ސައިޒް ސްޓޭންޑާޑް ހޭންޑް ބޯލް ކޯޓުގެ ސައިޒަށް ނުފެތޭ މައްސަލަ ވެސް މިނިސްޓަރ ވަނީ ފާހަގަކުރައްވާފައެވެ. އެކަން ހައްލުކުރުމަށް ކައުންސިލުން ނިންމި ގޮތެއް އަދި ލިޔުމުން ނިމިފައި ނުވާ ކަމަށް މިނިސްޓަރ ވިދާޅުވިއެވެ. އަދި ފުޓްސަލް ދަނޑު ނުފެށި ވަނީ އެ މަސައްކަތް ނުފެށި ވަނީ ބަޖެޓުގައި ނުހިމެނޭތީ ކަމަށް މިނިސްޓަރ ވިދާޅުވިއެވެ.

އިތުރަށް ވަޒީރާއި ސުވާލުކުރަން ލިބުނު ފުރުސަތުގައި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވަނީ ކުޅިވަރުގެ ދާއިރާއިން ކުރެއްވީ ކޮން މަސައްކަތެއްތޯ ސުވާލުކުރައްވާފައެވެ. އެ ސުވާލަށް ޖަވާބުދެއްވަމުން، ދައުރު ފެށުނު އިރު ވަރަށް ގިނަ ޕްރޮޖެކްޓްތައް ހުރި ކަމަށާއި އިސްކަންދެއްވީ އެކަންކަން އަވަސްކުރުމަށާއި، ޕްރޮޖެކްޓްތަކަށް ނުދެއްކި ހުރި ފައިސާ ދެއްކުމަށް ކަމަށް މިނިސްޓަރ ވިދާޅުވިއެވެ. އޭގެ ތެރެއިން ވަރަށް އިސްކަމެއް ދެއްވައިގެން އައްޑޫ ސްޓޭޑިއަމް ނިންމުމުގެ މަސައްކަތް ކުރިއަށް ގެންގޮސް އެ މަސައްކަތް ނިންމާލާފައިވާ ކަމަށް މިނިސްޓަރ ވިދާޅުވިއެވެ.