މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ މިޑްފީލްޑަރު ބްރޫނޯ ފެނާންޑޭސް، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކުރުމަށް ތައްޔާރު ވަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 29 އަހަރުގެ ކުޅުންތެރިޔާ ޔުނައިޓެޑަަށް ބަދަލުވީ 2020 ވަނަ އަހަރު އެވެ. އޭގެ ފަހުން 2022 ވަނަ އަހަރު އޭނާ ވަނީ އެ ކުލަބުގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

ނަމަވެސް، ފެނާންޑޭސްގެ އެއްބަސްވުމުގައި ބާކީ ދެ އަހަރު އޮއްވާ ޔުނައިޓެޑުން އަންނަނީ އޭނާގެ އެއްބަސްވުން އައު ކުރުމަށް މަސައްކަތް ކުރަމުންނެވެ. އެކަމާ ގުޅުން ހުރި މަޝްވަރާތައް ޔުނައިޓެޑުން ފެނާންޑޭސް އާއެކު ކޮށްފައިވާ ކަމަށާއި، އެކަމުގައި އެއްބަސްވުމަކަށް އާދެވިފައިވާ ކަމަށް ވެސް ރިޕޯޓުތައް ބުނެ އެވެ.

އެގޮތުން ވަރަށް އަވަހަށް ފެނާންޑޭސް ޔުނައިޓެޑުގެ އެއްބަސްވުން އައު ކުރާނެ ކަމަށް މީޑިއާ ތަކުން އަންނަނީ ބުނަމުންނެވެ. އެ ކުލަބާ އެކު އޭނާ ސޮއި ކުރާ އައު އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށް ކަމަށް ވެސް ރިޕޯޓުތައް ބުނެ އެވެ. އައު އެއްބަސްވުމާއެކު، ޔުނައިޓެޑުގައި އެންމެ ބޮޑު އާމްދަނީއެއް ލިބޭ ކުޅުންތެރިންގެ ތެރޭގައި ފެނާންޑޭސް ހިމެނޭނެ ކަމަށް ވެސް ރިޕޯޓުތައް ބުނެ އެވެ.

ފެނާންޑޭސް ވަނީ މިހާތަނަށް ޔުނައިޓެޑުގައި ހޭދަކޮށްފައިވާ ހަ ސީޒަންގެ ތެރޭގައި އެ ކުލަބަށް ކުޅެދިން 234 މެޗުގައި 79 ލަނޑު ޖަހައިފަ އެވެ. ޔުނައިޓެޑަށް ބަދަލުވެ އެ ކުލަބުގައި ފެނާންޑޭސް މޮޅު ކުޅުމެއް ދައްކަމުން އަންނައިރު، އެ ކުލަބާ އެކު އޭނާ ވަނީ މިހާތަނަށް އެފްއޭ ކަޕް އަދި ކަރަބޯ ކަޕް ކާމިޔާބު ކޮށްފަ އެވެ.